De Lëtzebuerger Grupp vum franséische Konzern hat d’lescht Woch annoncéiert, 126 Aarbechtsplaze wëllen ze sträichen, well eng Produktiounslinn am Wierk zu Lenzweiler bei Klierf Enn dës Joers gestoppt gëtt.
D’Mandy Noesen vum LCGB betount, datt et vill positiv Beispiller aus dem Secteur géif ginn, vu Betriber an deenen iwwer e Plan de maintien dans l‘emploi Dosenden Aarbechtsplazen hätte kënne gerett ginn. Mee d‘Direktioun wier vum Siège zu Paräis wuel mandatéiert ginn, fir e Sozialplang auszehandelen. Domat wieren d‘Gewerkschaften awer net averstanen.
LCGB an OGBL gesinn d‘Direktioun muer de Mëtteg um 13 Auer nees. Do virdru kënnt d‘Spëtzt vum Betrib mam Aarbechtsminister Georges Mischo zesummen, fir iwwert d‘Situatioun ze diskutéieren.