Ëmstridde Mesure Tankrabatt: Jonk Gréng sinn "net enttäuscht" iwwer hir Mammepartei
De Spriecher vun de jonke Grénge seet hie wier zwar "net glécklech" iwwer der Regierung hir Decisioun fir den Tankrabatt bis Enn vun dësem Mount ze verlängeren. Enttäuscht doriwwer, datt och Ministeren aus senger eegener Partei déi Mesure duerchgewenkt hunn, wier hien awer och net, esou de Fabricio Costa.
Als Regierungspartei hätt een net nëmmen einfach Decisiounen ze huelen an déi jonk Gréng wiere frou, datt d'Mammepartei hir Bedanken iwwer den Tankrabatt prinzipiell géife deelen.
De Fabricio Costa geet och dovun aus, datt d'Regierung d'CO2-Steier ufanks d'nächst Joer erhéijt, sou wéi dat geplangt ass "[...] well ech nach virun e puer Wochen de Vertrieder vun der LSAP an der Steierdebatt héieren hu soen, datt d'CO2-Steier natierlech misst weider erop goen."
An der Mediathéik:
LauschterenMéi zum Thema
Tankrabatt gëtt bis Enn August verlängert
Den Tankrabatt gëtt ëm ee Mount bis Enn August verlängert. Dee Kompromëss gouf et am Regierungsrot: dofir soll mam Staatsbudget fir d'nächst Joer ë.a. d'TVA op Solaranlagen a Vëloen op 3 Prozent erofgoen.
Verlängerung vum Tankrabatt: Gemëschte Reaktiounen
E Freideg gëtt am Regierungsrot iwwer d'Verlängerung vum Tankrabatt diskutéiert. D'CSV, d'ADR an de Groupement Energie Mobilité begréissen dat, Kritik kënnt vun de jonke gréngen, déi Lénk an der Piratepartei.
