Bilan Meteo 2022 2022 war dat wäermste Joer jeemools zu Lëtzebuerg
De Klimawandel huet d'Joer 2022 zu Lëtzebuerg däitlech markéiert: Et war dat wäermsten Joer, dat jee hei am Land gemooss gouf, esou de Bilan vum Météo-Service vum Landwirtschaftsministère. D'Landwirtschaft huet ënner der extremer Dréchent deels staark gelidden.
Fréijoer, Summer, Hierscht a Wanter - all d'Joreszäite waren dëst Joer iwwerduerchschnëttlech waarm.
Duerchschnëttstemperature klammen
Am extreemste waren d'Temperaturen am Summer: Mat 60 Deeg vun iwwer 25 Grad an enger Maximaltemperatur vun 36 Grad, war et deen zweetwäermste Summer, deen zanter 1838 zu Lëtzebuerg gemooss gouf.
An och am Wanter war et an der Moyenne 1,3 Grad méi waarm ewéi am selwechten Zäitraum bannent den 30 Joer virdrun.
Zu Lëtzebuerg sinn d'Duerchschnëttstemperaturen iwwer d'ganzt Joer gekuckt mëttlerweil schonn ëm 2,5 Grad par Rapport zur virindustrieller Zäit geklommen.
Méi héije Risiko vun Dréchenten
Mam Klimawandel ass besonnesch de Risiko vun Dréchenten geklommen, schreift de Meteoservice vum Landwirtschaftsministère. Wärend dee Risiko virdru just am Juni a Juli méi héich war, riskéiert et mëttlerweil bal dat ganzt Joer iwwer méi dréchen ze sinn ewéi fréier üblech.
Dëst Joer hunn dorënner virop den Ubau vu Kären, Gromperen a Geméis gelidden. Dee laangen a waarme Summer wier fir d'Geméis zwar engersäits gutt. Mee wéinst der Dréchent hätten d'Geméisbaueren misse vill Suen ausginn, fir hir Felder ze bewässeren.
D'Friichten profitéiere vum méi waarme Klima: d'Recolte vu Kiischte, Mirabellen, Äppel a Biere war gutt. D'Wäilies huet iwwerdeem nach ni esou fréi ugefaangen, ewéi dëst Joer - nämlech schonn Enn August, ee Mount méi fréi wéi soss üblech.
Klimawandel ass responsabel
Den Trend vun de leschten Joerzéngten ass kloer, stellt de Meteoservice vum Landwirtschaftsministère fest:
Déi zéng wäermste Joren, déi zu Lëtzebuerg gemooss goufen, waren all am Zäitraum zënter 2002. A responsabel ass dofir dee vum Mënsch verursaachte Klimawandel.
Méi zum Thema
Hëtzt & Dréchent
2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?
Andrew Ferrone: "Bis elo een dréchent Joer"
Déi zwee éischt Fréijoersméint waren am Verglach zur Moyenne méi dréchen, seet den Andrew Ferrone, Chef vum Meteo-Service am Landwirtschaftsministère. De Manktem u Reen kéint Problemer mat sech bréngen.
