Studiebäihëllef fir Frontalieren "Ausschléisse kann ee keen"

Den LCGB ass der Meenung, datt an Zukunft keng Restriktioune fir Frontaliere méi an d'Gesetz fir d'Studiebäihëllefe kënne geschriwwe ginn. Dat nodeems den Europäesche Geriichtshaff gëschter fir d'drëtt en entspriechend Gesetz gekippt huet.

Françoise Keller / cbi

Studenten
Symbolbild. Foto: Bigstock / snowing

Den Ament musse Frontalieren, wann hiert Kand eng Studentebourse ufreet, op d'mannst fënnef Joer bannen de leschte siwe Joer hei am Land geschafft hunn. Datt ee manner restriktiivt Gesetz awer méiglecherweis mat engem méi grousse Käschtepunkt verbonne wier, gesäit den LCGB kritesch. Een Argument dogéint wier zum Beispill, datt d'Frontalieren hei am Land cotiséieren an deemno géifen dozou bäidroen, datt d'Studenteboursse bezuelt géife ginn, esou de Christophe Knebeler vum LCGB.

Restriktiv Gesetzer

Déi aktuell Reegelunge fir d'Boursse wiere scho vill méi restriktiv, wéi déi al Reegelung an d'Bourse ass a verschidden Deeler opgedeelt, erkläert de Gewerkschaftler. Den LCGB kritiséiert "schonn zanter Joren", datt d'Basis vun der Bourse ze niddreg wier. "A wann Dir dat eleng vergläicht mam Kannergeld, wat deemools eng Famill kritt huet virun 2010, ouni eng Bourse ze kréien, dat war vill méi héich, wéi de Basis-Montant vun de Bourssen. An och dat ass deemools u jiddweree bezuelt ginn."

Et sollt een dofir bei de Studiebäihëllefe fir Frontalieren net an enger Logik vu Käschten iwwerleeën, esou de Gewerkschaftler, mee:

"Et muss een éischter kucken: wat ass an deem Sënn den Notzen, dee Lëtzebuerg kann doraus zéien? An do ginn et sécherlech ganz vill Aspekter, wou mir een Notzen doraus zéien, a wou et méi wéi gerechtferdegt wier, fir déi doten Depensen do ze maachen."

Et missten och weiderhi sozial Krittären am Gesetz fir d'Studenteboursse gëllen, mee dës Krittäre kéinten net "als Excuse duerhale fir verschidde Gruppe vu Leit wëllen auszeschléissen", esou de Christophe Knebeler. "Ech mengen et muss einfach eng Logik sinn, datt Verschiddener méi staark ënnerstëtzt ginn. Mee ausschléisse kann ee kenn."

Restriktiv Gesetzer

Grad dat wier awer de Problem mat der Gesetzgebung hei am Land déi lescht Jore gewiescht, kritiséiert de Christophe Knebeler. En éischt Uerteel vun den europäesche Riichter aus dem Joer 2013 hat schonn d'Reegel gekippt, datt Kanner vu Frontalieren kee Recht op eng Bourse hätten. Duerno gouf d'Gesetz geännert. Frontaliere missten duerno onënnerbrach bannent fënnef Joer den Ament vun der Ufro fir d'Studiebäihëllef hei schaffen.

Mee domat - grad wéi mat der momentaner Reegelung - huet Lëtzebuerg erëm géint EU Recht verstouss, esou de Christophe Knebeler. D'Politik, déi zanter 2010 gemaach gouf, hätt an deem Sënn "och net wesentlech geännert". Et wier déi falsch Politik fir d'Gesetz esou restriktiv ze halen an et net ze vill grouss opzemaachen, "datt eigentlech déi, déi missten en Urecht drop hunn, net ëmmer een Urecht drop hu wéinst verschiddene Krittären".

"Ähnlech Uerteeler kéinten nokommen"

Den LCGB gesäit eng ähnlech Politik och an aneren Domainer, "an do ass et natierlech och ze fäerten, datt nach ähnlech Uerteeler kéinten nokommen", seet de Christophe Knebeler, ënner anerem iwwer d'Kannergeld fir Frontaliere bei sougenannte Patchwork-Famillen.

Den Héichschoulministère huet ugekënnegt am Dossier vun de Studiebäihëllefe wëllen ze legiferéieren. Deemnächst soll een Avant-projet de loi mat zousätzleche Krittären am Regierungsrot presentéiert ginn, fir dem Uerteel Rechnung ze droen, heescht et an engem Schreiwes vum Héichschoulministère.

An der Mediathéik:

Aktuelles / / Françoise Keller
Lauschteren

Dossieren

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

  • Literaturfestival "étonnants voyageurs"

    Iwwer de Päischtweekend stoung d'Literatur aus der ganzer Welt, awer och de Film an d'Ausstellungen am Mëttelpunkt an der klenger bretonescher Festungsstiedche Saint Malo.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen