Atelier a Rockhal Berechtegt Kritik oder PR?

D'Rockhal respektéiert net d'Traditioun an de géigesäitege Respekt tëschent Concerts-Organisateuren zu Lëtzebuerg. Sou kritiséiert den Atelier den Etablissement Public. Hannergrond ass en Open-Air Concert vum Sting, deen d'Rockhal organiséiert. Dee selwechten Dag organiséiert den Atelier de Siren's Call Festival am Gronn.

Yves Stephany / cz

Laurent Loschetter - Olivier Toth
Laurent Loschetter an Olivier Toth (Montage aus Archiv-Biller)

Den 30. Juni ass de Siren's Call Festival am Gronn. Tête d'Affiche ass déi amerikanesch Band MGMT. Dëse Mëttwoch de Moien huet d'Rockhal fir dee selwechten Dag e Concert vum britesche Sänger Sting virun den Héichiewen um Belval annoncéiert. Um Site, dee sech iwwert de Parvis vun der Rockhal zitt, solle bis zu 9.000 Spectateure Plaz fannen.

An engem zynesche Communiqué felicitéiert den Atelier der Rockhal an hirem Conseil fir dee Choix a mécht op säi Festival opmierksam. Et géif ënnert Concertsorganisateuren eng Traditioun vu géigesäitegem Respekt ginn, heescht et am Schreiwes. "Mir hunn elo festgestallt, datt den Etablissement public Rockhal mat deene Staatssuen, déi si kréien, engem private Promoteur, Live Nation, de Virrang loossen op déi Traditioun", seet de Laurent Loschetter vum Atelier. Dat hätt een e "bësse witzeg a bëssen traureg gläichzäiteg fonnt."

Zilpublikum oder net?

De Rockhal-Direkter Olivier Toth gesäit keng direkt Konkurrenz tëschent deenen zwou Manifestatiounen. De Sting géif en anere Public cibléieren. De Laurent Loschetter vum Atelier widdersprécht, d'Zilclientèle vum Siren's Call géif bis 45 Joer goen. An der Kategorie vu 35 bis 45 Joer wier een a Konkurrenz mam Sting.

Hie géif sech gutt Wieder fir déi zwou Manifestatioune wënschen, an datt déi zwee Organisateure Sold out missten affichéieren, seet den Olivier Toth. "An da wäerte mir eis duerno net méi géigesäiteg doriwwer mussen iergeren." Et géif ëmmer gesot ginn, datt d'Privatwirtschaft aggressiv un de Maart géif erugoen, seet de Laurent Loschetter. Elo wier et en Etablissement mat ëffentleche Gelder a mat Hëllef vun engem auslännesche Promoteur, dat "un d'Kulturzeen geet."

Ugeschwat op de Concert vun der amerikanescher Pop-Sängerin Anastasia, deen den Atelier dee selwechten Dag wéi den Out Of The Crowd-Festival organiséiert, seet de Laurent Loschetter, datt dat mat der Kulturfabrik ofgeschwat gi wier. "An do ass gesot ginn, datt d'Anastacia an den Out Of The Crowd wierklech net a Konkurrenz sinn."

Konkurrenz belieft d'Geschäft

Déi grouss Offer u Concerten a Manifestatiounen, déi haut zu Lëtzebuerg existéiert, wier nëmmen duerch de kollektiven Effort vun deene verschiddenen Acteure méiglech ginn, seet den Olivier Toth. "Natierlech ass dee Wee net gemaacht ginn, andeems ni een deem aneren op d'Féiss getrëppelt ass." Dat géif bei all Geschäft dozou gehéieren. D'Rockhal hätt ëmmer probéiert, déi aner Acteuren ze respektéieren.

"Mir sinn immens Karma-orientéiert", seet de Laurent Loschetter. "Mir wäerten net eis Philosophie änneren, just well een Aneren dat gemaacht huet." Den Atelier wéilt och an Zukunft Manifestatioune wéi de Rock um Knuedler oder och de Sonic Visions, dee vun der Rockhal organiséiert gëtt, respektéieren.

Dem Ateiler ass et mat sengem Communiqué gelongen, datt um Dag vun der Annonce vum Sting-Concert, vill vum Siren's Call an de Medie geschwat gouf.

De Laurent Loschetter ass och President vum Verwaltungsrot vum radio 100,7.

Atelier a Rockhal

Méi zum Thema

Food For Your Senses
Musek a Konscht

D'Organisateuren hunn nees Problemer mam Terrain. Obwuel mam Fonds Kirchberg eng Konventioun bis 2020 ënnerschriwwe gouf. D'Baueren, déi dës Terraine kultivéieren, wëllen dëst Joer keng Wiss uplanzen.

Vu lénks no riets: Pim Knaff, Ralph Waltmans, Andreas Wagner, Guy Arendt.
Esch 2022

D'Gemeng Käerjeng hätt eng positiv Approche géintiwwer der Participatioun un Esch 2022. Et misst elo en transparente Mapping fir all Gemeng a vun alle Projeten erstallt ginn, seet den Andreas Wagner.

Guy Arendt.JPG
Kultur

Virun engem Joer hunn Acteuren aus der lëtzebuergescher Kultur en Entwécklungsplang fir d'Zeen ausgeschafft. Elo ass den Tëschebilan presentéiert ginn. D'Resultater gi gemëscht opgeholl.

Net verpassen

  • Dëse Sonndeg um 11:00 LIVE aus der Congresshalle zu Saarbrécken

    DRP

    Eng Symphonie mat Piano - Esou gëtt dacks dem Johannes Brahms säin zweete Pianosconcerto beschriwwen. De russesche Pianist Nicolai Lugansky spillt dëst Wierk an där nächster Matinée vun der Deutschen Radio Philharmonie Saarbrücken Kaiserslautern, déi de radio 100,7 zesummen mat SR2 KulturRadio e Sonndeg, 15. Dezember 2019, vun 11.00 Auer u live aus der Congresshalle zu Saarbrécken iwwerdréit.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen