Riicht Eraus Besteierung ouni Grenzen?

0,5 Prozent vun den Entreprisë bezuelen d'Hallschent vun den direkte Betribssteieren. D'Patronatsorganisatioune fuerderen dowéinst eng Baisse vum Steiersaz vun 26 op 21 Prozent. Dëst fir d'Kompetitivitéit vun de Betriber um internationale Plang ze stäerken, esou den Jean-Jacques Rommes, Vize President vum Conseil économique et social. Am CES plädéiert d'Salariat fir d'Aféiere vun engem Mindeststeiersaz fir Betriber. Esou kéint een d'Konkurrenz tëschent de Länner verhënneren, seet de President vum Wirtschafts- a Sozialrot Marco Wagener.

Carole Schimmer / cz

Jean-Jacques Rommes a Marco Wagener
Jean-Jacques Rommes a Marco Wagener

De Steiersaz fir d'Betriber läit zu Lëtzebuerg bei 26 Prozent. De Grand-Duché positionéiert sech an Europa domat op déi 25. Plaz. Aner Länner wéi Irland applizéieren en Taux vun 12,5 Prozent. Changementer an der Besteierung ginn et iwwerdeems a Groussbritannien, Holland, grad wéi a Frankräich. Déi Länner, déi zu den Haaptkonkurrente vun der Finanzplaz zielen, wieren am gaangen hir Steiersätz erofzesetzen, warnt den Jean-Jacques Rommes. Wann dës Regierung dat net géing fäerdegbréngen, fir där Situatioun entgéintzewierken, da riskéieren déi Betriber d'Land ze verloossen. Deen Ament géifen déi Steierrecettë verluer goen.

International Aktiounspläng am A behalen

Am Kampf géint Steieroptimiséierung vun den internationale Konzerner hunn d'EU an d'OECD, d'Organisatioun fir wirtschaftlech Zesummenaarbecht an Entwécklung, Direktiven an Aktiounspläng ausgeschafft. Net gewosst ass, wéi eng Konsequenzen déi Aktiounspläng fir de Grand-Duché wäerten hunn, seet de Jean-Jacques Rommes. Duerch Steieroptimiséierung hu grouss Konzerner, wéi Google zum Beispill, hire Benefice an enger Rei Länner esou ëmverdeelt, datt se quasi keng Steiere méi bezuelt hunn. Deem wëllt d'EU an d'OECD entgéintwierken. Ënner anerem solle grouss Konzerner mat engem Ëmsaz vu méi wéi 750 Milliounen hire Benefice méi transparent deklaréieren. Geplangt sinn iwwerdeems gemeinsam Norme fir d'Assiette fiscale festzeleeën. Diskutéiert gëtt an deem Kontext doriwwer, ob d'Steieren do bezuelt ginn, wou d'Firma hire Sëtz huet oder wou de Produit consomméiert gëtt.

An deem Kontext wier et wichteg, de Lëtzebuerger Steiersaz fir d'Betriber erofzesetzen, seet de Jean-Jacques Rommes. Eng Ausso, déi de President vum Conseil économique et social, de Marco Wagener, aus der Siicht vum Salariat a Fro stellt. D'Analys, datt d'Steierrecetten eventuell kéinten a Gefor sinn, deelt de Marco Wagener, mee et misst ee géint de System vun der Steierkonkurrenz tëschent de Länner kämpfen, ënner anerem an deem een eng Mindeststeier um internationale Plang aféiert.

Fir d'Betriber gëtt et eng batter Legislaturperiod

All déi Moossnamen déi d'Koalitioun annoncéiert huet, géinge weisen, datt et fir d'Betriber eng ganz batter Legislaturperiod géif ginn, sot de Jean-Jacques Rommes. Vun all deem sollt ee sech am mannste iwwer d'Erhéijung vum Mindestloun bekloen, sot hie weider. De Staat géif zwee Drëttel dovunner iwwerhuelen an d'Moossnam kéim wéinstens deenen ze gutt, déi et am meeschte brauchen. Ob dat de Problem géif léisen, dat wier eng aner Fro, esou den Jean-Jacques Rommes. De Logement bleift an deem Kontext ee Problem fir d'Stéit, ënnersträicht de Marco Wagener. Fir deen ze léise misst de Staat vill an de soziale Wunnengsbau investéieren, ënnersträicht den Marco Wagener, President vum CES a Vertrieder vum Salariat.

An der Mediathéik:

Riicht eraus / / radio 100,7
Lauschteren

Méi zum Thema

Comité économique et social
Steierlandschaft

De Wirtschafts- a Sozialrot huet eng aktualiséiert Analys presentéiert. Schwéierpunktthema ass d'Betribsbesteierung. Déi misst op 21 Prozent erofgoen, fuerdert de Patronatsvertrieder Jean-Jacques Rommes.

Pia Oppel Analys
Chamberwahlen 2018

Vill Parteie wëllen d'Grondsteier an d'Steierklasse reforméieren, grad ewéi kleng Revenuen a Betriber entlaaschten. An hire Wahlprorammer engagéieren d'Parteie sech awer zu wéineg Konkretem.

Pia Oppel Analys
Chamberwahlen 2018

All d'Parteie si géint Aarmut an ze grouss sozial Inegalitéiten. Mee vill Wahlprogrammer evitéiere méi sensibel Aspekter vun dëser Thematik, notamment d'Inegalitéite vum Patrimoine, fënnt d'Pia Oppel.

monoparental Famill
Steierreform

Déi gréisste Verléierer bei der Steierreform wieren d'monoparental Famillen, esou d'Kritik op enger rezenter Diskussiounsronn. Si géife bis zu fënnef mol méi Steiere bezuelen, wéi bestuete Koppelen ouni Kanner.

Etienne Schneider.jpg
Stabilitéits- a Wuesstums-Programm

Aktuell wuessen d'Depensë méi staark wéi d'Recetten. D'Regierung hätt hir Depensepolitik net am Grëff, kritiséiert d'Oppositioun. De Wirtschaftsminister Schneider verweist op déi héich Investissementer.

Steierrulingen.jpg
Steierregelen

Lëtzebuerg setzt nei Regele vun der EU an der OECD ëm. Resultat: Steierrulingen vu virum 1. Januar 2017 sinn – enger rezenter Circulaire no – net méi gülteg. Dat huet Konsequenzen, soen Experten.

Steierpolitik
Steierpolitik

D’EU-Kommissioun plangt eng nei, eenheetlech Besteierung vun de Konzerner, ACCIS. Fir Lëtzebuerg kéint dat fatal sinn, fäert d'UEL. D'Lëtzebuerger Betribsbesteierung wier dann net méi kompetitiv genuch.

Business Hands Put Coin
Steierreform

D'Steierverwaltung fuerdert méi Informatioune vun de Betriber iwwer d'Salairen, déi se a Form vun Optiounen op Aktien ausbezuelen. Déi Donnéeë sinn och fir d'Steierreform relevant.

Programm

  • Iwwer Mëtteg

  • On air

    Resonanzen

  • Spektrum

  • Ënnerwee

  • Time Out

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Sozialwahlen 2019

    Den 12. Mäerz ware Sozialwahlen. A ronn 3.800 Betriber, an deene méi wéi 15 Leit schaffen, goufen d'Personaldelegatioune bestëmmt. An déi 60 Vertrieder an der Salariatskammer goufen nei gewielt.

Communiquéen

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen