Spiert Dir als Titelverdeedeger an Toppfavorit den Drock, bei de Spiller vun de klenge Länner gewannen ze mussen?
Gewannen ze mussen u sech net, an Drock eigentlech och net. Ech kann dat Ganzt méi relax ugoen, wann ech weess, datt ech eng méi héich Beschtleeschtung hunn, wéi déi aner. Da muss een net ëm all Zentimeter raiberen. Wann ee seng Leeschtung aus dem Training, déi een drophuet, kann ofruffen, da misst dat alles klappen. Fir mech hëlt d'Favoritteroll also éischter Drock ewech.
D'Zil vun Ärer Saison ass d'Weltmeeschterschaft, déi ass dëst Joer immens spéit, eréischt Enn September, Ufank Oktober. Huet dat Iech an der Preparatioun fir d'Spiller vun de klenge Länner gehënnert?
E bësse schonn. An et ass awer wichteg, hei bei de Spiller matzemaachen. Et muss een ebe kucken, wéi een et mam Training mécht. Vläicht "peakt" (Remark vun der Redaktioun: de Maximum u Potential erreechen) een da scho fir d'Spiller.
Dat heescht, Dir sidd am Moment net an Toppform?
Toppform net, mee Toppform vun deem, wat fir de Moment méiglech ass. Mir hu vun Ufank u gesot, mir géife kucken, wéi et beim Training leeft. Bis elo ass alles no Plang verlaf. Ech sinn do, wou ech wëll sinn, souguer schonn e bësse méi wäit. Et mécht Sënn hei ze sinn.
Är Preparatioun fir d'Weltmeeschterschaft hutt Dir also net verännert?
Just geringfügeg. Beim Kugelstousse muss een explosiv sinn. A mir hunn dat ganz gutt hikritt, datt ech hei eng gutt Leeschtung kann ofruffen. Et ass am Fong nach esou wäit bis d'Weltmeeschterschaft, datt dat net esou vill ausmécht.
Ee vun Äre gréisste Konkurrente bei de Spiller vun de klenge Länner ass en Athlet aus Montenegro, dem Gastgeberland. Wéi ee Virdeel huet een, wann ee virun den eegene Supportere ka stoussen?
Ech denken ee Virdeel ass, datt ee vun de Fans Ënnerstëtzung kritt. Mee et kann och en Nodeel sinn, wann s de an d'Competitioun eragees a sees, du muss elo eng gutt Leeschtung bréngen. Als Net-Montenegriner kanns de heihinner kommen an dat maachen, wat een ëmmer mécht. Dann huet een deen Drock net.
D'Competitioun am Kugelstoussen ass en Dag no hanne geréckelt gi vun der Organisatioun. Mécht dat een nervös?
Mir spillt dat u sech an d'Kaarten. Mir sinn eréischt vun engem anere Meeting zeréckkomm. Ech kann also een Dag méi recuperéieren an trainéieren.
Hutt Dir Iech eng Wäit virgeholl, déi Dir wëllt erreechen?
U sech net, et hänkt e bëssen dovunner of, wat mäi gréisste Konkurrent stéisst. Ech hat am Virfeld scho gesot, dat dierft sech a Richtung vun den 20 Meter ofspillen. Wien dann Éischten an Zweete gëtt, musse mir dann e Mëttwoch kucken.