Am Gesetzesprojet gëtt festgehalen, datt just Polizist:innen déi personaliséiert Kamera umaache kënnen. Se gëtt visibel am Broschtberäich gedroen a blénkt, wann opgeholl gëtt.
Déi 30 Sekonnen, ier déi eigentlech Opnam start, wäerten och gespäichert ginn, seet den Alain Engehlart, Zentraldirekter fir d'Strategie an d'Performance bei der Police.
Dat wier "extrem wichteg" fir ee Gesamtbild vun der Situatioun ze hunn: soss géif de Kontext feelen, wisou eppes geschitt ass.
Ee komplett Bild vun der Situatioun kréien
Datt betraffe Persoune scho gefilmt ginn, ier d'Kamera en Zeeche gëtt, soll an enger Opklärungscampagne méi genee erkläert ginn, seet den Alain Engelhardt.
Et géifen Iwwerleeunge gi fir méi Kamerae gläichzäiteg auszeléisen, fir esou nach e bessert Gesamtbild ze kréien, seet den Alain Engelhardt: wann e puer Policebeamt:inne gläichzäiteg intervenéieren, wier et "scho logesch", datt d'Kamerae gläichzäiteg uginn.
Eng weider Iddi wier et, datt d'Kamera automatesch lancéiert, wann d'Waff gezu gëtt.
Kloer Instruktiounen, wéini Kamerae benotzt ginn
De Gesetzesprojet gesäit vir, datt d'Kamera op alle Plaze benotzt ka ginn, och bei Hausduerchsuchungen, esou den Henri Kox op eis Nofro hin. Hie wier sech awer bewosst, datt d'Police an dësem Fall an d'Privatsphär geet, an heifir missten et da kloer Instruktioune ginn, datt et zu kengem Abus kënnt.
De Policeminister wier a Reunioune mat de Gewerkschafte gewiescht, sou Polizist:innen dat néidegt Vertrauen an d'Kameraen hunn.
Intern Formatioune sollen d'Polizist:innen op d'Asetze vun esou enger Kamera preparéieren och fir ze wëssen, wéini et Sënne mécht se ze benotzen.
Ganz restriktiven Accès op Videoen
D'Filmmaterial gëtt op interne Servere gespäichert a gëtt am Normalfall no 28 Deeg geläscht, heescht et am Gesetzesprojet.
Just d'Polizist:inne kënnen Accès op d'Videomaterial kréien, concernéiert Bierger:inne solle keen direkten Accès op d'Videomaterial kréien, esou den Alain Engelhardt op eis Nofro hin.
Eenzeg Ausnam: wa Bierger:inne sech beschwéieren oder eng Plainte maachen, well eng Infraktioun geschitt ass. An deem Fall géif dat de penale Wee goen an d'Biller gi vun Enquêteure vun der IGP saiséiert. Spéider solle concernéiert Bierger:innen dann Accès op d'Biller kréien.
De Projet vun de Kamerae soll 6 Milliounen Euro kaschten, esou de Policeminister Henri Kox.