Groussbritannien an EU Brexit: Verlängerung ass Chefsaach

A 15 Deeg trëtt Groussbritannien aus der EU eraus. Am Prinzip, well datt de Brexit an d'Verlängerung geet, ass ëmmer méi wahrscheinlech. Wéi vill méi Zäit soll d'EU de Brite ginn? Dat ass eng vun de kriddelege Froen. Eng Decisioun doriwwer fält eréischt um EU-Sommet déi nächst Woch.

Danièle Weber / cbi

Den Donald Tusk um EU-SOmmet am Dezember 2018
De Rotspresident Donald Tusk um EU-Sommet am Dezember 2018. Foto: Dario Pignatelli.

Et ass ee klore Message, dee vu Bréissel op London geschéckt gëtt. Mir hunn een Accord, a wa Groussbritannien net ouni Deal erausgoe wëllt, da gëllt dëse Brexit-Accord a just deen.

D'Brite missten elo kloer soen, wat si wëllen, sou de Chef-Negociateur vun der EU, de Michel Barnier e Mëttwoch am Europaparlament. Déi Fro misst gekläert ginn, éier een iwwer eng méiglech Extensioun nodenkt.

Iwwer ee Verleeë vum Datum, op deem Groussbritannien aus der EU austrëtt, dee bis elo um 29. Mäerz fixéiert ass, gëtt vill diskutéiert.

De Countdown leeft

Mee d'EU ass sech eens. Eng Verlängerung mécht just da Sënn, wann ee genee weess, firwat. Mat anere Wierder: Zesumme mat der britescher Demande fir eng Extensioun muss eng Propos kommen, déi vun enger Majoritéit am britesche Parlament gedroe gëtt.

Ee gudde Grond fir den Datum no hannen ze réckele wier een zweete Referendum. Där Meenung waren e Mëttwoch eng ganz Partie Europadeputéiert, wéi si iwwer d'Situatioun diskutéiert hunn.

Brexit kéint Wahlcampagne sabotéieren

Eng Angscht war am Parlament däitlech ze spieren: De Sujet Brexit kéint d'Campagne vun den Europawahlen, déi jo Enn Mee sinn, dominéieren. Dat muss verhënnert ginn, sou d'Fuerderung queesch duerch d'Parteien.

D'Längt vun enger méiglecher Extensioun mécht iwwerdeems den EU-Vertrieder Kappzerbrieches. Iwwer den Datum Enn Mee vun den Europawahlen erauszegoe kéint problematesch ginn - legal gesinn. Op d'mannst, wa Groussbritannien net bei deene Wahle matmécht.

All EU-Bierger huet ee Recht drop, am Europaparlament vertrueden ze sinn, steet nämlech am Traité.

Am Europaparlament gëtt et awer Juristen déi soen, datt net den 29. Mee mee den 2. Juli do den decisiven Datum ass. Op deen Dag kënnt dat neit Parlament fir d'éischt zesummen, et kéint een also de Brexit bis dohi verlängeren, ouni dat a Groussbritannie gewielt muss ginn.

Laangfristeg Extensioun kéint problematesch sinn

Alles awer wat doriwwer erausgeet, also eng Verlängerung vun iwwer dräi Méint, wier juristesch wackeleg ouni Europawahlen op der Insel. Eng Klo virum Europäesche Geriichtshaff, datt dat neit Parlament géint den Traité verstéisst, kéint duerchaus Chancen hunn, sou d'Aschätzung vun Experten.

Wéi d'Ambassadeuren e Mëttwoch zu Bréissel zesummekoumen, war eent kloer: D'Fro vun der Extensioun ass Chefsaach. D'Kommissioun krut de kloren Optrag, eng juristesch Analys ze maachen. D'Resultat soll dann um EU-Sommet déi nächst Woch analyséiert ginn.


An Zesummenaarbecht mat Euranet Plus, dem gréissten europäesche Radio-Reseau fir EU-Aktualitéit.

An der Mediathéik:

Europa Aktuell / / Danièle Weber
Lauschteren

Méi zum Thema

Brexit
Brexit

E Mëttwoch soll am britesche Parlament e Gesetz gestëmmt ginn, dat en No-Deal-Brexit soll verhënneren. Mee och wann en No-Deal-Brexit vum Dësch wier, bleift ee grousse Problem: Der Politik leeft d'Zäit fort.

Brexit-Helpline
Brexit

"Wéi preparéieren ech mäi Betrib op de Brexit?" Op dës Fro soll eng Helpline vun der Chambre de Commerce deene Betriber zu Lëtzebuerg Ried an Äntwert stoen, déi direkt an indirekt vum Brexit betraff sinn.

Danièle Weber
​EU-politesche Wocheréckbleck

De 26. Mee sinn Europawahlen, den 29. Mäerz verléisst Groussbritannien d'EU. Ass et sécher, datt d'Briten dës Kéier net bei deene Wahlen dobäi sinn? Erklärunge vun der radio 100,7-EU-Korrespondentin Danièle Weber.

Programm

Dossieren

  • Festival de Cannes 2019

    Alleguer d'Artikele vum Festival de Cannes 2019.

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen