De Camille Gira (déi gréng), Staatssekretär am Ëmweltministère, ass onerwaart am Alter vun 59 Joer gestuerwen. Dat huet de grénge Parteipresident Christian Kmiotek op Nofro hi confirméiert. De Camille Gira, Regierungsmember vun déi gréng, krut am spéiden Nomëtteg während enger Ried an der Chamber e Malaise.
Zwee Deputéiert déi berufflech Doktere sinn, hunn hien direkt op der Plaz behandelt. Hien ass trotz där rapider Interventioun géint 19:30 Auer am Spidol verstuerwen.
E Mann, e Gréngen, esou grouss a gradlinneg bannen dra wéi baussen.
- Christian KMIOTEK (@KmiotekC) May 16, 2018
Ëmgefall wéi eng Eech am Stuerm. pic.twitter.com/auxQAcDUQV
Énorme tristesse .... ......
- Francois Bausch (@fbausch) May 16, 2018
D'Chamberssëtzung vum Donneschdeg ass ofgesot.
.@Mars_Bartolomeo : D'Chamber dréckt der Famille vum Staatssekretär Camille Gira hiert éierlecht an déifste Matgefill mat. D'ëffentlech Sëtzung vun Donneschdeg ass ofgesot. pic.twitter.com/9Uo6evOI8h
- Chambre des Députés (@ChambreLux) May 16, 2018
An engem Communiqué dréckt d'Regierung dem Camille Gira senger Famill hiert Bäileed aus.
Ech sinn déif getraff an immens traureg iwwer deen onerwaarten Doud vum Staatssekretär, Kolleg a Frënd Camille Gira. Am Numm vun der Regierung an a mengem perséinlechen Numm wënschen ech der Famill Courage. Eis Gedanken an eis Matgefill ass bei senger léiwer Fra a senge Kanner.
- Xavier Bettel (@Xavier_Bettel) May 16, 2018
Eis géigeniwwer sot de Xavier Bettel dëst:
Eng laang politesch Carrière
De Camille Gira war zanter 1993 offiziell Member vun deene Gréngen. Mee seng politesch Carrière fänkt mat 23 Joer un, wéi hien 1982 zu Biekerech eng éischte Kéier an de Gemengerot gewielt gouf. 30 Joer laang ass hien ëmmer erëm gewielt ginn, a vun 1990 un bis 2013 war hie Buergermeeschter.
1989 geet hien eng éischte Kéier mat an d'Chamberwahlen an dat op der selwechter Lëscht ewéi den aktuellen CSV-Deputéierte Marco Schank. Op der Lëscht "Ekologiste fir de Norden" ware Leit, déi sech fir d'Ëmwelt agesat hunn, ouni direkt un eng Partei gebonnen ze sinn.
De Camille Gira huet déi gréng zesumme gefouert
De Camille Gira, grad ewéi de Marco Schank, ware laang beim Mouvement écologique aktiv. Déi gréng politesch Zeen war deemools gespléckt. Déi zwou gréng Parteien "déi Gréng Alternativ Partei" (GAP) an "déi Gréng Lëscht Ekologesch Initiativ" (GLEI) waren zerstridden. Fir eng Zesummeféierung z'erméigleche goufen onofhängeg Perséinlechkeete gefrot fir eng Mediatioun z'assuréieren.
De Camille Gira, de Marco Schank an den Historiker Michel Pauly hunn dat deemools mat Succès gemaach. De Camille Gira hat et als Konditioun gesat fir Member ze gi vun der grénger Partei, an datt et just nach eng eenzeg soll ginn. 1994 gouf et dunn eng gemeinsam GLEI-GAP Lëscht.
Deputéierten a Staatssekretär
De Camille Gira gëtt eng éischte Kéier am Norde gewielt, an duerno ëmmer erëm gewielt. 2013 gëtt hie Staatssekretär am Nohaltegkeetsministère, wou hien d'Ëmwelt-Dossieren iwwerhëlt.
Als Deputéierten oder als Staatssekretär huet de Camille Gira sech ëmmer am Sënn vum Naturschutz duerchgesat. Hien huet sech ëm vill diskutéiert Dossiere gekëmmert, ewéi de Waasserschutz an de Waasserpräis, oder nach d'Juegd an de Verbuet vun der Fuussejuegd, a grad och d'Naturschutzgesetz, dat hien elo nach verdeedege wollt.
Vu Beruff war hie Fluchlotsen an huet sech fir besser Aarbechtskonditiounen a fir den Erhalt vun den Aarbechtsplazen agesat. Deemools war hie fir den OGBL gewerkschaftlech aktiv. De Camille Gira war bestuet a Papp vun zwee Kanner.