Lëtzebuerg entdecken Camping Troisvierges

Wéi hätt Dir et gär? Ulflingen, Troisvierges? Oder Ëlwen? An eiser Summer-Serie "Lëtzebuerg entdecken" kann de Claude Faber et net loossen, op sengem Tour iwwer d'Lëtzebuerger Campingen ëmmer nees an d'Geschicht vun de besichten Dierfer anzedauchen. Oder wousst Dir, datt den Numm Ëlwen eppes mat Fabelwiesen ze dinn huet?

Claude Faber / cz

Camping Troisvierges - Sentier des passeurs

1353 gëtt Ëlwe fir d'éischt an engem Dokument erwäänt, allerdéngs mam Numm Ulvelingen, dee sech vun "Ulf" ofleet, wat esou vill bedeit wéi "Elf". Net d'Zuel eelef, op Däitsch, ass domat gemengt! Mee enger al-iwwerliwwerter Seechen no soll Ëlwe vun Naturgeeschter, vun Elfe gegrënnt gi sinn. An de Suffix "ingen" weist dann nach op eng germanesche Siidlung hin, wat mat der Besiidlung vun dëser Regioun vu germanesche Franken och aliicht.

Am 17. Joerhonnert ass Ulflingen dann zu enger beléifter Pilger-Uertschaft ginn. Am Joer 1641 hunn nämlech Franziskaner do ee Klouschter opgebaut, en Uerden, deen deemools e Veréierungs-Kult vun den dräi hellege Jongfraen Fides, Spes a Caritas gefleegt huet. A well haaptsächlech Pilger aus der Wallonie dohi koumen, mat Franséisch als Mammesprooch, huet et geheescht "Nous allons aux Trois-Vierges". Dohier also de franséischen Numm vun Ëlwen.

Ëlwe war geografesch gesinn iwwer laang Zäit zimlech isoléiert. En éischten Opschwong koum eréischt um Enn vun den 1850er Joren, mam Bau vun enger Strooss vu Wolz iwwer Ëlwe bis op St. Vith. Ronn 15 Joer duerno koum d'Zuchstreck vun der Stad bis op Ëlwen dobäi. International bekannt gouf dat klengt Éisleker Dierfchen dann um Enn vum 19. Joerhonnert, wéi de Kaiser Wilhelm I. de Bau vun enger Zuchstreck vun Oochen bis op Ëlwen ordonnéiert huet, fir d'Industrie- a Kuele-Gebidder ronderëm Oochen op kierztem Wee mat der neier Stol-Héichbuerg Lëtzebuerg ze verbannen.

Mokka-Express

Déi sougenannte Vennbahn ass aus strategesche Grënn am Zweete Weltkrich vill zerbommt an duerno ni méi nees ganz sanéiert ginn. E ganz anert Geschäft huet an der Nokrichszäit dunn d'Grenzregioun markéiert, nämlech de Schmuggel, haaptsächlech vu Kaffi an Tubak, tëschent Däitschland an der Belsch. Op ville Plazen huet d'Vennbahn dowéinst - bis haut nach - de Spëtznumm Mokka-Express behalen. Am Joer 1976 ass dunn dee leschten offiziellen Zuch op dëser Streck gefuer, no an no sinn d'Schinnen op ville Plazen ofgebaut ginn.

Viru gutt zéng Joer ass d'Vennbahn - mat senge ronn 125 km - an ee Vëloswee verwandelt ginn, iwwregens ee vun de längsten a beléiftsten an Europa. An, wann Dir net equipéiert sollt sinn, direkt nieft dem Ëlwener Camping kënnt Dir Iech e Vëlo lounen.

E komplette Vakanzeresort

Den Ëlwener Camping selwer kann ee scho bal mat engem Vakanze-Ressort vergläichen. Net nëmmen datt een hei Stellplazen, nei Mobilhomer a grouss Glamping-Safarizelter loune kann, de ganze Camping läit och nach matten am Ëlwener Activity-Park mat Beachvolleyball-, Fussball-, Basketball-, Tennis- a Squashfelder, Petanque-Pisten, enger oppener an enger zouener Schwämm. Wann dat keng Offer ass!

Um Enn kommen ech dann nach op déi sëllech Wanderweeër ze schwätzen, déi vun Ëlwen aus fort ginn. Insgesamt 17 Stéck, bei deene fir all Alterskategorie an Erfahrungsgrad eppes dobäi ass. A well ech mat Geschicht ugefaangen hunn, halen ech dann och mat Geschicht nees op. Ee vun dëse Weeër nennt sech nämlech Sentier des passeurs. Hei kritt een op ville Panneauen eng ganz wichteg Episod aus der Lëtzebuerger Occupatiounszäit méi nobruecht, andeems een genee déi Weeër ofgeet, déi Lëtzebuerger an auslännesch Widerstandskämpfer, Aarbechtsverweigerer a Krichsdeserteuren um Enn vum Zweete Weltkrich gaange si fir iwwer d'Grenz bis an d'Belsch a Sécherheet bruecht ze ginn.

An der Mediathéik:

Lauschteren

Méi zum Thema

Héijuewe Belval 2
Lëtzebuerg entdecken

Um Belval kann een eng Visite vum Héichuewen A maachen, fir méi iwwer d'Stolindustrie gewuer ze ginn. Wann een dann um Héichuewen ass, huet een e gudde Bléck doriwwer, wéi sech de Site entwéckelt huet a wat haut do wichteg ass.

Klierf Camping
Lëtzebuerg entdecken

De Klierfer Camping ass dem Wëlle vun engem fréieren Generaldirekter vun der ARBED ze verdanken. De Claude Faber war fir eis Summer-Serie "Lëtzebuerg entdecken" Klierf - fir sech selwer - och nei entdecken.

Programm

  • Moies-Magazin

  • On air

    Iwwer Mëtteg

  • Resonanzen

  • Spektrum

  • Ënnerwee

Dossieren

  • 76. Filmfestival zu Venedeg

    Zu Venedeg ass déi 76. Editioun vum Filmfestival. Den Tom Dockal ass fir de radio 100,7 op der Plaz. All Dag pickt hie sech ee Film eraus, fir deen da méi genee ënner d'Lupp ze huelen.

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen