Gewaltentrennung zu Lëtzebuerg Chamberdebat iwwer Gewaltentrennung?

Soll an der Suite vun der ëmstriddener Virgoensweis vum Mobilitéitsminister François Bausch d'Gewaltentrennung prinzipiell an der Chamber thematiséiert ginn? An där Fro ginn d'Meenunge vun de Parteien ausenaner. De Minister stoung an der Kritik wéinst engem Bréif, deen hien d'lescht Joer un d'Procureure générale geschriwwen hat.

Françoise Keller / cz

Justiz
Foto: Archiv

D'Juriste si sech net eens, ob d'Virgoe vum Minister eng Amëschung an d'Justiz ass oder net. D'Procureure générale Martine Solovieff ass der Meenung, datt et keng Amëschung ass. Den Deputéierte vun de Piraten, Sven Clement, stellt sech awer ënner anerem d'Fro, ob den Deontologie-Kodex vun der Regierung eventuell misst iwwerschafft ginn, fir esou Interpretatiounsdivergenzen an Zukunft guer net opkommen ze loossen.

Den ADR-Deputéierte Roy Reding plaidéiert sengersäits dofir, datt an der Chamber iwwer de Pouvoir vun der Justiz misst diskutéiert ginn. "Wéi funktionéiert se? Wat fir ee Kontrollmechanismus kann et ginn? Checks and balances."

Fir de lénken Deputéierte Marc Baum wier et sënnvoll fir prinzipiell eng Kéier an der Institutiounekommissioun iwwer d'Verhältnis vun de Gewalten hei am Land ze diskutéieren. Hien hofft datt et méiglech wier, déi Diskussioun ouni Partei-Politik ze féieren. Hie verweist dorop, datt d'CSV eng eventuell Demissioun vum François Bausch an d'Gespréich bruecht huet, mee elo awer net fuerdert. "Dat heescht, do ass e bësse partei-politeschen Drock aus dem Kessel geholl", seet de Marc Baum.


De Panorama-Bäitrag vum Françoise Keller:

Lauschteren


Op Nofro bei der CSV heescht et, d'Diskussioun ronderëm de François Bausch wier en Thema en Dënschdeg an der Fraktiounssëtzung. Déi gréng Fraktiounscheffin Josée Lorsché ass dofir, parteiiwwergräifend an an engem fairen Toun doriwwer ze diskutéieren, wéi een an Zukunft mat esou Fäll, wéi deem ronderëm de Mobilitéitsminister kéint ëmgoen. Fir d'LSAP géif et no der Reaktioun vun der Procureure générale kee Besoin méi gi fir eng weider Diskussioun ze féieren. Et sief dann, wann eng ausdrécklech Demande vun enger Fraktioun oder Sensibilitéit dofir kéim.

Den LSAP-Fraktiounschef a President vun der Institutiounekommissioun Alex Bodry sot op Nofro, datt d'Chamber sech awer deemnächst nach eng Kéier mam Volet vun der Onofhängegkeet vum Parquet an dem geplangte Conseil national de la justice géif befaassen. Der Commission de Venise no soll dee Rot de Garant vun der Onofhängegkeet vun der Justiz ginn.

Méi zum Thema

Martine Solovieff
Kritik géint Minister

De François Bausch huet d'Justiz net beaflosst, seet d'Procureure générale. Datt de Mobilitéitsminister ee Bréif u si adresséiert hätt, wier "net verwonnerlech". Hien hätt als "Responsable civil" agéiert.

Luc Heuschling
Kritik um Minister

De François Bausch hätt sech duerch säi Bréif un d'Procureure générale an d'Justiz agemëscht. Där Meenung ass de Luc Heuschling, Professer fir Verfassungsrecht op der Uni Lëtzebuerg.

De Frank Engel an de François Bausch
Kritik um Minister

Den CSV-President bréngt d'Demissioun vum François Bausch an d'Gespréich. Hannergrond ass ee Bréif, deen de Mobilitéitsminister un d'Procureure générale d'Etat geschriwwen huet.

Net verpassen

  • 08.12. Klassik Live: L'enfance du Christ

    Berlioz.jpg

    De Philharmoneschen Orchester Lëtzebuerg an d'Gächinger Cantorey an der Philharmonie: De radio 100,7 iwwerdréit de Concert haut den Owend live vun 20:00 Auer un.

Programm

Dossieren

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen