Coque "Mir hu gutt zesumme geschafft"

D'Onstëmmegkeeten tëschent der Coque an de Sportfederatioune sinn aus der Welt geschaaft. Dat seet den neien Direkter vun der Coque, de Christian Jung. Hie gëtt zou, datt verschidde Kritiken awer berechtegt waren.

Rick Mertens / cbi

Christian Jung
De Christian Jung ass zanter dräi Méint den neien Direkter vun der Coque.

Eng Rei Federatiounen haten d'Coque d'lescht Joer kritiséiert, well veschidde Servicer wéi zum Beispill de Catering, ze héich fakturéiert wären. De Coque-Direkter Christian Jung seet am 100,7-Interview, déi Kritike wieren deelweis berechtegt gewiescht.

Eng Onlineplattform fir d'Federatiounen

D'Zesummenaarbecht mat de Federatiounen hätt sech awer mëttlerweil verbessert. Zum Beispill wier eng Onlineplattform geschaaft ginn, op där d'Federatiounen sech iwwer d'Servicer vun der Coque kënnen informéieren. Op dëser Plattform kéinten all d'Utilisateure vun de Federatiounen zeréckgräifen, déi dës Informatioune brauchen.

"Domat hu mir e grousse Schrëtt an déi richteg Richtung gemaach, fir d'Kommunikatioun ze verbesseren", seet hien. De Christian Jung seet, datt et him wichteg wier, fir de Kontakt mat de Sportfederatiounen an Zukunft weider ze verbesseren an ze intensivéieren.

Catering: Coque mécht kee Gewënn dorop

D'Kritik, datt de Catering, deen d'Coque offréiert, ze deier wier, wier och aus der Welt geschaaft ginn, esou de Christian Jung. "Mir hunn de Federatiounen awer erkläert, datt mir eis Akafspräisser eent zu eent weiderginn, ouni e Gewënn dropzeschloen. Nodeems mir déi Diskussioun gefouert haten, gouf dat och esou akzeptéiert."

Dat géif awer net heeschen, datt een an Zukunft verschidde Saache kéint adaptéieren, esou den neien Direkter vun der Coque.

Trainingszenter: Aarbechte lafen dem Plang no

Mëtt Abrëll soll an der Coque um Kierchbierg en neien Trainingszenter fir Héichleeschtungssportler opgoen. D'Aarbecht doru géif gutt lafen, seet de Christian Jung. "Mir hunn am Juni d'lescht Joer ugefaangen. Deemools hate mir eis d'Zil gesat, Mëtt Abrëll prett ze sinn, an am Moment gesäit dat ganz gutt aus. D'Aarbechte lafen esou no Plang wéi geduecht, dofir denken ech, datt mir Mëtt Abrëll kennen do opmaachen." Eent vun den Ziler wier et, datt Athlete sech fir d'Olympiad vun 2020 an der Coque kënne preparéieren.

An der Mediathéik:

Invité vum Dag / / Rick Mertens
Lauschteren

Méi zum Thema

Coque
Sport

Um rezente COSL-Kongress huet virun allem d'Dëschtennis-Federatioun d'Coque kritiséiert: Et goung ënner anerem ëm Servicer, déi a Rechnung gestallt gi sinn an ëm d'Héicht vun eenzelen Tariffer.

Marc Mathekowitsch
Spëtzesport

Déi nei Offer fir Spëtzesportler soll am Laf vum nächste Joer prett sinn. Dat huet de Marc Mathekowitsch, den neie President vum nationale Sport- a Kulturzenter, confirméiert.

Programm

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Sozialwahlen 2019

    Den 12. Mäerz ware Sozialwahlen. A ronn 3.800 Betriber, an deene méi wéi 15 Leit schaffen, goufen d'Personaldelegatioune bestëmmt. An déi 60 Vertrieder an der Salariatskammer goufen nei gewielt.

Communiquéen

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen