Europawahlen 2019 CSV verléiert massiv u Stëmmen

D'CSV huet bei den Europawahlen am Verglach mat 2014 a verschidde Gemenge bis zu 20 Prozentpunkten u Stëmme verluer. Am ganze Land gëtt et bei de Chrëschtsozialen dee selwechten Trend, sief et a Gemengen, déi vun CSV-Buergermeeschtere geréiert ginn, oder aneren.

Carole Schimmer / cbi

Verglach Europawahlen 2014 an 2019
A ville Gemengen ass d'CSV net méi déi stäerkste Partei. Grafik: elections.public.lu / Montage: radio 100,7

D'Landkaart um offiziellen Internetsite vun de Resultater vun den Europawahlen zu Lëtzebuerg war 2014 komplett orange, an alle Gemengen hat d'CSV d'Nues vir.

Fënnef Joer drop gesäit et ganz anescht aus: am Zentrum dominéiert d'DP, déi gréng sinn am Südbezierk staark, grad wéi zu Biekerech, d'Gemeng vum verstuerwene grénge Politiker Camille Gira, souwéi zu Sëll.

LSAP: an Héichbuergen e gudde Score

D'LSAP huet an den traditionelle roude Gemengen Diddeleng, Rëmeleng, Keel grad wéi zu Suessem, wou d'Simone Asselborn-Bintz am Schäfferot ass, déi meeschte Stëmme kritt.

Och den LSAP-Kandidat Nicolas Schmit huet a senger Gemenger Bäerdref ee gudde Score erreecht, mat engem Plus vu véier Prozentpunkten. D'ADR läit an enger Gemeng ganz vir: zu Fréiseng, d'Gemeng vum Kandidat Gast Gibéryen.

CSV: Keng staark Lëscht

D'Analys iwwert d'Resultater vun der CSV ass par konter eng ganz aner. D'Isabel Wiseler-Lima, CSV-Spëtzekandidatin a Schäffin vun der Stad Lëtzebuerg, kënnt op knapp 17 Prozent, dat ass e Minus vun 20 Prozentpunkten am Verglach mat den Europawahlen 2014. Och an de Gemengen Hesper a Mamer ginn et gréisser Verloschter fir déi chrëschtsozial Vollekspartei. Fir den CSV-Generalsekretär Felix Eischen kéint een d'Europa- an d'Kommunalwahlen net vergläichen. Datt d'CSV drastesch u Stëmme verluer huet, hätt och mat der Lëscht ze dinn.

2014 ass d'CSV mat bekannte Gesiichter an d'Wahle gaangen. De Jean-Claude Juncker war deemools zwar net op der Lëscht vun der CSV, mee war europäesche Spëtzekandidat fir d'EVP. Dat hätt viru fënnef Joer eng Roll gespillt, seet de Raphael Kies, Politolog vun der Uni Lëtzebuerg.

D'CSV hätt sech elo mat neie Gesiichter an d'Wahle lancéiert, de Choix vun der Spëtzekandidatin Isabel Wiseler-Lima wier och wahrscheinlech net optimal gewiescht, mengt de Raphael Kies.

DP: Monica Semedo war e gudde Choix

D'DP hätt mam Charles Goerens een Zuchpäerd gehat, esou d'Analys vum Felix Eischen.

De Raphael Kies ënnersträicht, datt d'DP mam Monica Semedo ee Risiko agaangen ass. Hatt wier ee Quereinsteiger, mee schlussendlech awer ee gudde Choix gewiescht.

Jonk Wieler wielen anescht

D'Wieler hunn och hir Gewunnechte geännert. Bis elo hunn d'Leit traditionell d'CSV an d'LSAP gewielt ouni sech vill Froen ze stellen, déi Jonk hätten eng ganz aner Haltung. Déi Jonk tëschent 18 a 24 Joer géifen tendenziell weder d'CSV nach d'LSAP wielen.

D'CSV wier haut eng Partei wéi eng aner. Weider géifen d'Wieler sech ëmmer méi spéit entscheeden, wat och net zu Gonschte vun der CSV wier, esou de Raphael Kies.

An der Mediathéik:

Aktuelles / / Carole Schimmer
Lauschteren

Méi zum Thema

20150607-Kies-L1007255.jpg
Europawahlen 2018

D'Wieler hätte sech eréischt ganz spéit decidéiert, fir wie si hir Stëmmen ofginn. Dat hätt een iwwer d'Plattform smartwielen.lu erausfonnt, seet de Raphael Kies vun der Uni Lëtzebuerg.

Europawahlen 2019
Lëtzebuergesch Resultater

D'DP ass de grousse Gewënner vun der Europawahl zu Lëtzebuerg. Déi Liberal gewannen en zweete Sëtz, kommen op 21,44 Prozent vun de Stëmmen a sinn domat déi stäerkste Kraaft. D'CSV verléiert méi wéi 16 Prozent a kënnt just nach op 21,1 Prozent.

Programm

  • Moies-Magazin

  • On air

    Iwwer Mëtteg

  • Resonanzen

  • Spektrum

  • Ënnerwee

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Festival de Cannes 2019

    Alleguer d'Artikele vum Festival de Cannes 2019.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen