Corona-Kris D'Zesummeleeë vun de Schoulklassen

Déi verschidde Lycéeë ginn ënnerschiddlech mat der neier Situatioun ëm. Den Direkter vun der Akerbauschoul, Tom Delles, hat beim Ministère eng Derogatioun ugefrot, fir d'Andeelung an A- a B-Gruppe weider bäibehalen ze kënnen. Hien hätt hei Bedenken, wat déi sanitär Situatioun ugeet.

En anere Grond fir seng Ufro wiere Fäll vu vulnerabele Schüler a Proffen, déi bis elo awer komm sinn, well d'Gruppenandeelung déi néideg Sécherheetsofstänn méiglech gemaach huet. Verschidde Leit, souwuel vum Personal wéi och vun de Schüler, hätten och Bedenken a wiere bereet, fir op en Zertifikat vum Dokter zeréckzegräife fir net méi ze kommen, well si Angscht hätten, esou den Tom Delles.

D'Proffekonferenz vun der Akerbauschoul huet sech an engem Communiqué hanner hiren Direkter gestallt. Den Tom Delles seet awer, datt hien nach keng Äntwert vum Ministère krut an dofir elo en Zesummeleeë vun de Klasse vun e Méinden u plangt.

Educatiounsministère verteidegt d'Decisioun

De Lex Folscheid aus dem Educatiounsministère seet, datt hien näischt vu esou enger Ufro wéisst. Hie verteidegt awer d'Decisioun, d'Klassen nees zesummenzeleeën. D'Zuelen an d'Informatiounen, déi ee vum LIH hätt, géife weisen, datt d'Schoul net déi Plaz wier, wou de Virus sech am meeschte weiderverbreet.

De ganzen Interview mam Lex Folscheid lauschteren

Iechternach: keng Maskeflicht an de Klassen

Och den Direkter vum Lycée zu Iechternach, den Henri Trauffler, huet Bedenken, wat déi sanitär Implicatioune vum Zesummeleeë vun de Klassen ugeet. Hie betount awer, datt déi aner Sécherheetsmesurë weider en place bleiwen. Am Klassesall géif et bei him am Lycée awer keng Fliicht ginn, eng Mask unzehunn, ausser den Enseignant géif drop halen. An deem Fall misst eng Mask ugedoe ginn, preziséiert den Henri Trauffler.

De Ministère huet keng Maskeflicht ausgesprach. Souwuel de Lycée zu Iechternach, wéi och d'Akerbauschoul, wëllen de Mask awer weiderhin obligatoresch maachen, soubal de Klassesall verlooss gëtt.