Lëtzebuerg gëtt an där Etüd e puer Mol als Muster-Beispill zitéiert. D'ECDC mécht sech nämlech Suergen, well d'Infektiounszuelen an der EU erëm geklomme sinn. Déi Länner, déi de Large-scale-testing maachen an, en plus, en effikassen Traçage-System hunn - esou wéi Lëtzebuerg - wieren am beschten ausgerëscht fir een neien Ausbroch séier ze detektéieren, awer och fir Risikogruppen ze identifizéieren an de Risk vun enger neier Infektiounswell deemno ze limitéieren.
D'ECDC stellt och fest, datt den Taux vun den Nei-Infektioune ganz kloer vun der Zuel vun den Tester ofhänkt. Och hei gëtt Lëtzebuerg erëm als Beispill zitéiert, et gëtt och confirméiert, datt Lëtzebuerg dat Land an der ganzer EU ass, dat bei Wäitem déi meeschten Tester mécht, mat ronn 10.700 Tester pro 100.000 Awunner, an der Woch vum 20. Juli. Dat wier quasi siwe Mol méi, wéi dat Land, dat op der zweeter Plaz, hanner Lëtzebuerg, am Klassement kënnt.
Large-scale-testing spillt eng Schlësselroll
De Large-scale-testing géif eng Schlësselroll spille fir d'Nei-Infektiounen am Grëff ze behalen, awer och fir en effikassen Traçage ze maachen, an e wier och d'Basis fir d'Situatioun permanent ze iwwerwaachen. Déi grouss ugeluechten Tester, esou wéi Lëtzebuerg se mécht, géifen och eng kruzial Roll spille fir lokal Hotspotte séier kënnen ze identifizéieren.
Da warnt den europäesche Krankheets-Preventiouns-Zenter awer och viru vireilege Conclusiounen, wann d'Infektiounszuelen an engem Land staark klammen. Dat wier de Fall fir Lëtzebuerg, dat vu verschiddene Länner dowéinst als Risikogebitt agestuuft gouf. Et misst een do nämlech en Ënnerscheed maachen, ob et effektiv een neien Ausbroch gëtt, oder ob déi Zuelen esou héich sinn, well vill getest gëtt, a well do och déi asymptotesch Fäll mat gezielt ginn. D'ECDC recommandéiert den anere Länner, och méi ze testen an och ze probéieren, déi asymptotesch Fäll erauszepicken.
Nidderege Mortalitéitstaux zu Lëtzebuerg
Lëtzebuerg läit an der Statistik iwwer den Taux de mortalité op der leschter Plaz. Do gëtt d'Zuel vun den Doudesfäll verglach mat der Zuel vun de confirméierten Infektiounsfäll. Deen Taux läit zu Lëtzebuerg ënner zwee Prozent. Ganz uewen an där Statistik läit Frankräich mat iwwer 15 Prozent, dann d'Belsch an dann Holland.