Dem Raphael Stacchiotti säin nächst Zil ass et sech fir d'olympesch Spiller d'nächst Joer zu Tokyo ze qualifizéieren. Dofir muss hien eng hallef Sekonn am Verglach mat senger perséinlech Beschtzäit um 200 Meter 4-nages gutt maachen. Et wier awer net esou einfach, sech ëm eng hallef Sekonn ze verbesseren:
"Wann ee weess, datt ech zanter 2011 un där 2:00 knabberen, ass eng hallef Sekonn enorm vill. Elo sinn ech bei 2:00,21, déi ech 2016 bei den olympesche Spiller zu Rio geschwommen hunn. Do virdru war meng Beschtzäit 2:00,22 vum Euromeet hei am Januar 2012. Also si véier an een halleft Joer vergaange fir eng Honnertstel ze gewannen. Ech hoffen, datt et dëst Joer e bësse méi séier geet."
Wéini sech entscheet, ob de Raphael Stacchiotti bei den olympesche Spiller dobäi ass, ass nach net kloer. Déi nächst Versich fir sech ze qualifizéieren si bei der Weltmeeschterschaft a Südkorea am Juli oder nach beim Euromeet am Januar.
Géint de Leeschtungsdrock ukommen
Bis zu d'Halschecht vun der Leeschtung vu Sportler géif vu mentaler Stäerkt ofhänken, schätzt de Schwëmmer Raphael Stacchiotti. U kierperlecher Fitness géif hie bei Kompetitiounen net scheiteren, et misst een awer eng Konstanz am Training all Dag hunn.
Virun allem fir d'Schlussphas virun enger Kompetitioun géif et drop ukommen, datt ee konzentréiert ass. Fir de Raphael Stacchiotti ass et wichteg ze wëssen, datt een a Saachen Ernärung a Recuperatiouns-Zäiten alles richteg gemaacht huet:
"Wann een da schonn an d'Kompetitioun geet an et weess een, "ech si wierklech um Top vum Top" - dat hëlleft natierlech fir d'Confiance. Dono ass et natierlech wann een am Call-room bis steet, dee Moment virun der Kompetitioun, do gewënnt een zwar keng Course, mee et kann ee se do verléieren. Do geet et wierklech drëm, dat gutt ze kanaliséieren, seng Gedanken an enger gudder Reiefolleg ze hunn, seng Routine ze fannen an dann ass dat kee Problem. Mee dat ass net ëmmer esou einfach natierlech."
Fir mat Leeschtungsdrock ëmzegoen schafft de 27-Jährege Schwëmmer och mat engem Mental-Coach zesummen.
Bei de Spiller vun de klenge Länner huet de Raphael Stacchiotti bis ewell 40 Goldmedaile gewonnen. Déi Kompetitioun wier sportlech gesinn awer net sou e wichtege Rendez-vous fir hien. Iergendwann géif eng gewëss Routine entstoen - de Spaassfaktor wier awer ëmmer do.
De Raphael Stacchiotti wëllt seng professionell Carrière als Schwëmmer iwwerdeems bei den nächste Spiller vun de klenge Länner 2021 zu Andorra ophalen. Konkret Zukunftspläng huet hien awer nach net.