Jugendschutz "Eng super-grouss Katastroph"

"Eng super-grouss Katastroph", sou nennt de Gilbert Pregno d'Tatsaach, datt nach ëmmer Mannerjäreger zu Schraasseg sëtzen. Dat wier net acceptabel. Zënter déi nei Sécherheetsstruktur zu Dräibur op ass, dierft am Fong geholl keen eenzege Jugendleche méi am Erwuesseneprisong sinn, betount de President vun der consultativer Mënscherechtskommissioun.

Serge Kesseler / cbi

Gilbert Pregno
Gilbert Pregno (Archivphoto radio 100,7)

De Gilbert Pregno hat et komme gesinn: "Déi Befierchtung, déi mir haten, déi ass agetratt", bedauert de President vun der consultativer Mënscherechtskommissioun.

Et hätt een am Gespréich mam Félix Braz, wéi och mat de Magistraten, ganz kloer gesot, datt mat der Aféierung vun der Unité de sécurité zu Dräibur, Mannerjäreger net méi op Schraasseg solle kommen. Dëst hätt och dem Wonsch vun de Parlamentarier entsprach. D'Unisec wier gebaut ginn, fir datt kee Mannerjärege méi an den Erwuesseneprisong soll placéiert ginn, sou de Gilbert Pregno. D'Politik hätt e ganz kuerzt Gediechtnes, well dat elo net méi agehale géif ginn. Dat wier net acceptabel.

E Projet éducatif

De Psycholog a President vun der Mënscherechtskommissioun verlaangt, datt ganz kloer soll gesot ginn, wat de Sënn vun der Sécherheetsunitéit zu Dräibur ass. Fir déi Jugendlech, déi dohinner ginn, géif et e Projet éducatif ginn. Déi aner, déi géifen an den Erwuesseneprisong op Schraasseg goen. Dat wier e Bricolage, esou de Gilbert Pregno. Et wier bei de Jugendlechen awer wichteg, datt ee ganz genee weess, firwat si op déi eng Platz ginn, an net op déi aner.

Zu Schraasseg wieren d'Konditiounen net erfëllt, fir Mannerjäreger do ënnerzebréngen. Wa Jonker a Konflikt mam Gesetz geroden, da misste si gehollef kréien. Dat wier awer net de Fall, wa si mat erwuessene Prisonéier agespaart ginn, seet de Gilbert Pregno. De Prisong wier net equipéiert, fir Mannerjäregen dat Richtegt unzebidden. Duerfir wier d'Unité de sécurité do.

Positioun net verhandelbar

D'Positioun vun der consultativer Mënscherechtskommissioun wier nach ëmmer déi gewiescht, datt kee Mannerjäregen an de Erwuesseneprisong gehéiert. Dem Gilbert Pregno no ass dës Positioun net verhandelbar.

Dem Justizministère no, soll bei der Reform vum Jugendschutzgesetz d'Fro behandelt ginn, ob an Zukunft a raren a begrënnte Fäll awer nach Mannerjäreger op Schraasseg ginn. De Projet soll am Mäerz an de Regierungsrot kommen.


Lauschteren

Méi zum Thema

Handschellen
Jugendschutz

Dräi Jonker ënnert 18 Joer souzen de leschte Freideg am Prisong. Dat huet de Justizministère op eis Nofro hi confirméiert. An der Sécherheetsunitéit fir Mannerjäreger si momentan fënnef Plaze beluecht.

D'UNISEC zu Dräibur
Centre socio-éducatif

Véier Jugendlecher sinn aktuell an der zouener Sécherheetsunitéit zu Dräibur. D'Zil ass et, datt keng Mannerjäreg am Prisong fir Erwuessener agespaart ginn. Et ginn awer keng fest Critèrë fir e Placement.

Programm

Dossieren

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Dateschutz

    De 25. Mee trëtt an der EU en neit Dateschutzreglement a Kraaft. Wat bedeit dat fir d'Bierger an d'Betriber? A wat ännert wierklech? Detailer an eisem Themeschwéierpunkt.

Communiquéen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen