Affär Dieschbourg/Traversini Gilles Roth: De Risiko vu Prozedurfeeler ass grouss

Datt de Verfassungsexpert Luc Heuschling e Méindeg der Presidentekonferenz an dem Chamber-Büro op Demande vun der grénger Fraktioun Ried an Äntwert wäert stoen, wier "e bësse Moutarde après dîner", stellt den CSV-Co-Fraktiounschef Gilles Roth fest. Domat géif an der Affär Gaardenhaischen-Carole Dieschbourg e Schrack zréck gemaach ginn, mat alle Prozedur-Risiken. Wann den Dossier zeréck un de Parquet géif goen, mam Motiv, datt d'Chamber net zoustänneg wier, da kéint no Meenung vum Gilles Roth eng Verletzung vum Untersuchungs-Geheimnis opgeworf ginn, well déi 60 Chamber-Deputéierten Accès zum Dossier iwwert d'Virenquête an der Affär haten.

Serge Kesseler / cz

Gilles Roth
Foto: Archiv

Den Expert Luc Heuschling hätt misste gehéiert ginn, éier virun e puer Wochen all d'Deputéierten Zougank zu dësem Dossier kritt hunn, seet de Gilles Roth.

"Iwwregens wëll ech ganz kloer soen, dass séier d'Deputéierten Accès zum Dossier kruten, een avis juridique vun dem Service vun der Chamber gemaach gouf, an deen och deemools esou ëmgesat gouf, vu sämtleche Membere vum Chamberbüro an der Presidentekonferenz. An dofir fannen ech dat do keng gutt Léisung."

Déi gréng Fraktioun hat proposéiert, datt de Luc Heuschling soll gehéiert ginn, grad wéi eventuell weider Experten. Hien hätt d'Impressioun, datt am dësem Dossier géif op Zäit gespillt ginn an d'CSV wéilt och net, datt iwwer Prozedur-Tricke probéiert gëtt, den Dossier "am Sand z'erstécken", dat géif enger Demokratie net gutt zu Gesiicht stoen, sou de Gilles Roth.

Gilles Roth: Deputéiert mussen d'Verfassung applizéieren

Déi fréier Ministerin Carole Dieschbourg soll déi selwecht Rechter wéi all anere Bierger an engem moderne Rechtsstaat hunn, huet hiren Affekot François Prum am 100,7-Interview verlaangt: dowéinst soll de Parquet den Dossier iwwerhuelen, esou seng Fuerderung. Deelt de Gilles Roth dës Aschätzung?

"Et ass net hei, ob een eng Aschätzung deelt oder net deelt. D'Chamber huet den Dossier kritt, vun der Procureure Générale gemäss enger Prozedur, nämlech den Artikelen 82 an 116 aus eiser Verfassung. Och wann déi Verfassung al ass, muss se awer esou vun den Deputéierten applizéiert ginn."

D'Carole Dieschbourg war den 22. Abrëll als Ministerin zeréck getrueden, nodeem de Parquet den Dag virdrun den Dossier an der Affär Gaardenhaischen un d'Chamber geschéckt hat.

Yves Cruchten: Et ass net d'Zil eppes ze verschleefen

An den LSAP-Fraktiounschef Yves Cruchten ass iwwregens der Meenung, datt et am Interesse vu kengem wier, dës Affär an d'Längt ze zéien: kee wéilt eppes verschleefen. Et wier "net verkéiert" den Expert Luc Heuschling e Méindeg ze héieren. An den Deeg duerno soll eng "raisonéiert Decisioun" vun der Chamber geholl ginn, wéi et an dëser Affär viru geet. D'Chamber dierft sech keng Feeler erlaben, esou nach de Fraktiounschef vun der LSAP.

Méi zum Thema

François Prüm
Causa Dieschbourg

Den Affekot vun der fréierer Ëmweltministesch Carole Dieschbourg géif et begréissen, wann de Parquet den Dossier géif iwwerhuelen. D'Membere vum Parquet wieren "héichspezialiséiert" an deem Droit, erkläert de François Prum.

Traversini Gaardenhäisschen
Affär Dieschbourg/Traversini

An der Affär ronderëm d'Carole Dieschbourg stelle sech nei Froen. Déi fréier Ëmweltministesch wousst virun den zoustännegen Deputéiert vum Chamberbüro Bescheed, datt de Parquet seng Vir-Enquête ofgeschloss hätt.

Net verpassen

  • Rapport d'activités 2021

    Banner.jpg

    De Rapport d'activités 2021 vum radio 100,7 ass verëffentlecht ginn. E gëtt en Abléck an d'Aktivitéite vun de verschiddene Servicer a Redaktiounen am leschte Joer.

Programm

Dossieren

  • Dossier: Relatiounen tëscht Portugal a Lëtzebuerg

    Haut ass et den zweeten a leschten Dag vun der Staatsvisitt a Portugal. Eng grouss Lëtzebuerger Delegatioun ass den Ament zu Lissabon. An eisem Dossier fannt dir all eis Bäiträg an Artikelen iwwer d'Theema.

  • De Krich an der Ukrain

    De 24. Februar 2022 huet Russland d'Ukrain militäresch iwwerfall. Déi westlech Länner hu mat Sanktioune reagéiert, Millioune vu Leit sinn aus der Ukrain geflücht.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen