Lëtzebuerg entdecken Iwwer d'Grenzen ewech

Mir ginn haut an der Serie "Lëtzebuerg entdecken" an den Norden, wou mir eis d'Wander- a Vëlosweeër ukucken. An dës Weeër féieren een dacks bis an eis Nopeschlänner. De Pit Walté huet sech informéiert.

Pit Walté / cz

Rondonnée ORT Eisleck
Foto: ORT Eisleck / Dan Castiglia

Datt et beim Wanderen keng Grenze ginn, mierkt een, wann een am Norde vum Land ënnerwee ass, relativ séier. Esou huet den ORT Éislek eng Partie Weeër ausgeschafft, déi eis bis an Däitschland oder d'Belsch féieren. De Paul Ihry vum Ort Éislek nennt d'Beispill vum Naturwanderpark Delux, engem Interreg-Projet, bei deem ee mat de Kolleegen aus der Süd-Eifel zesummegeschafft hätt. "Et gi Ganzsdaags- oder Hallefdaags-Tier, bei deenen een déi Grenzregioun entdecke kann", sou de Paul Ihry.

Wann ee mam Vëlo ënnerwee ass, kann ee sech iwwer d'Grenze vum Grand-Duché op de Wee maachen, dat op der Vennbahn, déi vun Ooche bis op Ëlwen geet. De Wee kann een natierlech och den ëmgedréite Wee fueren, an de Paul Ihry encouragéiert d'Leit och vun Ettelbréck aus lasszefueren, wann een nach e puer schéi Kilometer un déi virgesinnen 125 drun hänke wëllt.

Foto: ORT Eisleck

Mee et ass net nëmmen dat grenziwwerschreidend Wanderen a Vëlo-Fueren, wat am Éislek am Fokus steet, och de sougenannte Gedenktourismus, gëtt gäre gemaach, seet de Paul Ihry vum ORT Éislek.

"Ech menge jiddweree weess, datt d'Éislek, d'Lëtzebuerger Ardennen, am Zweete Weltkrich eng gewësse Roll gespillt hunn. A mir bidden Touren un, bei deenen een einfach Erklärungen zu deenen eenzele Sitte kritt. Et kritt een dann och eppes aus enger Gamelle ze iessen, wéi dat dann och déi Zäit war."

Fir déi, déi gären e bësse méi wäit Weeër wanderen, gëtt et den Escapardene Lee Trail, dee mam Label Leading Quality Trail - Best of Europe zertifizéiert gouf. "Dee Wee geet an dräi Etappe vun Ettelbréck bis op Kautebaach. Et si vill flott Plateauen dertëschent, wou een dann eng schéi Vue huet. Mee och déi méi roueg Deeler, wann een an den Däller ënnerwee ass, sinn eppes ganz Eenzegaarteges fir eis Wanderregioun."

Fir déi, déi um Éislek-Trail ënnerwee sinn, gëtt dann de Service ugebueden, datt d'Hoteller d'Gepäck op déi nächste Statioun nobréngen. A Verfleegung fir ënnerwee, kann een do natierlech och ufroen.

An der Mediathéik:

Lëtzebuerg entdecken / / Pit Walté
Lauschteren

Méi zum Thema

fonds de gras 1
Lëtzebuerg entdecken

Am Minett Park am Fond-De-Gras kann ee mat enger Damp- oder Diesellokomotiv fueren, a mat der Minièresbunn geet et dono bis an de Bierg. De Pit Walté war fir d'Serie "Lëtzebuerg entdecken" en Nomëtteg dohinner.

Abtei Neimënster Gronn
Lëtzebuerg entdecken

An eiser Summer-Serie "Lëtzebuerg entdecken" geet et an d'Stad. Et geet ëm verschidde Weeër, déi een do goe kann, fir d'Geschicht vu Lëtzebuerg ze entdecken. De Pit Walté huet sech puer schéin Ecke weise gelooss.

Programm

Dossieren

  • 76. Filmfestival zu Venedeg

    Zu Venedeg ass déi 76. Editioun vum Filmfestival. Den Tom Dockal ass fir de radio 100,7 op der Plaz. All Dag pickt hie sech ee Film eraus, fir deen da méi genee ënner d'Lupp ze huelen.

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

Net verpassen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen