Iwwerdeems huet no den USA elo och London annoncéiert, Diplomaten aus Kiew zeréckzezéien. Dee Schratt wier néideg, wéinst enger méi grousser Menace vu Russland, sou de britteschen Ausseministère.
D'EU huet dat bis elo net Wëlles, Personal aus den Ambassaden an hir Familljen opzefuerderen, d'Ukrain ze verloossen, sot de Moien den EU-Chefdiplomat Josep Borrell. Zu Bréissel sinn haut d'EU-Ausseministere beieneen, fir iwwer d'Situatioun ze beroden.
EU-Ausseminister: Ee Krich verhënneren
Hie wielt sech net an d'Logik vun engem Krich erasetzen, sot virun der Reunioun de Lëtzebuerger Ausseminister Jean Asselborn. D'europäesch Ausseministere wieren an éischter Linn dofir do alles ze maachen, fir ee Krich ze verhënneren. Et géif och net schlecht ausgesinn, mengt de Jean Asselborn.
D'Russen hätten am Weste vum Land eng Drohkuliss opgebaut - et géif ee mat tëschent 100.000 an 150.000 Zaldote rechnen. D'NATO an d'Europäesch Unioun hätt dat "net oneescht" geholl, esou de Lëtzebuerger Ausseminister. Elo wéilt ee kucken "mat de Waffe vun der Diplomatie" no de Suerge vu Russland kucken. Dëse Prozess wier bis elo vu Russland net refuséiert ginn, esou de Jean Asselborn.
Verschidde Länner, wéi déi baltesch Republicken, sinn iwwerdeems dofir, d'Ukrain mat Waffen ze ënnerstëtzen. D'Reunioun vun den Ausseministeren dauert bis den Owend, an der Mëttesstonn steet och eng Entrevue mam amerikaneschen Ausseminister Antony Blinken um Programm.