Chamberwahlen 2018 Joé Thein: "Mir rechne mat zwee Prozent vun de Wielerstëmmen"

Mam Slogan: "Déi Konservativ, méi Demokratie a Fräiheet fir Lëtzebuerg", geet d'Partei déi Konservativ mat enger Kandidatelëscht am Südbezierk mat an d'Chamberwahlen. Zentral Themen am Parteimanifest sinn d'Identitéitspolitik, d'Integratioun, d'Lëtzebuerger Sprooch. Déi Konservativ, mam fréieren ADR-Member a fréiere Péitenger Gemengeconseiller Joé Thein un der Spëtzt, representéiere ronn 130 Parteimemberen. Am politesche Spektrum situéiere si sech tëscht der, an hiren Aen ze lénksgeriichter CSV, an der ze populistescher ADR.

Carole Schimmer / cz

Déi Konservativ virun de Chamberwahlen 2018

"Et ass de feste Wëlle fir bei den nächste Chamberwahlen op d'mannst am Südbezierk mat enger kompletter Lëscht ze kandidéieren". Esou formuléiert d'Partei déi konservativ hiert Zil fir d'Chamberwahlen am Oktober. D'Spëtzekandidate sinn de Joé Thein an de Mario May.

Et wier een am gaangen och an deenen anere Bezierker u Lëschten ze schaffen, allerdéngs gëtt et eng wesentlech Schwieregkeet. Fir eng Lëscht ze deponéiere muss een 100 Ënnerschrëfte vu Wieler aus dem Bezierk sammelen, oder et muss een d'Ënnerstëtzung kréie vun engem Deputéierten oder vun dräi Gemengeconseilleren aus deem Bezierk.

Et géif een net mat Ënnerstëtzung vu bestoende Parteie rechnen, dofir géif ee momentan probéieren, fir déi néideg 100 Ënnerschrëften ze sammelen. "Et bleift eis jo och nach Zäit, op de Braderien, déi elo ustinn, fir dat ze maachen", seet de Joé Thein. Enn Juli, Uganks August wéilt een d'Wahllëschte verëffentlechen, sou d'Partei.

Am Südbezierk huet ee sech dann och d'Ziler festgeluecht.

"Eist Zil ass et, fir am Süden e markante Score ze maachen. Mir rechnen hei mat zwee Prozent vun de Wielerstëmmen. Mir sinn och iwwerzeegt, datt mir dëse Seuil kënnen erreechen, well mir och schonn an de Gemengewahle bei 2,40 Prozent konnte punkten."

Och bei den Europawahle wéilt ee mat an d'Course goen.

"Vollwäerteg Integratioun" nëmmen iwwer Assimiléierung

Am Mëttelpunkt vum Wahlmanifest vun déi Konservativ, sti Sujete wéi Identitéitspolitik, Integratioun a Sprooch. Der Konservativer Partei no misst Jiddwereen d'Lëtzebuerger Sprooch schwätzen a verstoe kennen. D'Integratioun stellt de Joé Thein gläich mat enger Assimilatioun op verschidden Niveauen. Eng "vollwäerteg Integratioun" kéint nëmmen iwwer de Wee vun "institutioneller, kultureller a linguistescher Assimiléierung a Bildung" geschéien, seet de Parteipresident.

D'Pierrette Heintz, Member vum Nationalcomité vun déi Konservativ ergänzt: "Fir de Migrantestatut heescht dat, datt all Mënsch, deen eng legal Awanderung op Lëtzebuerg vollzitt, fir sech hei permanent néierzeloossen, an domat als Migrant mat dauerhaftem Bleiwerecht zielt, sech dem integralen Integratiounsprozess verschreiwe muss."

"Null Toleranz" géigeniwwer "Extremfäll"

"Extremfäll", déi deen Integratiounsprozess net maachen, misst ee mat "Null Toleranz" begéinen. D'Netverlängere vun der Openthaltserlaabnis, d'Sträiche vu Sozialleschtungen oder d'Réckféierung an d'Hierkonftslänner, kéint hie sech als Konsequenze virstellen, seet de Joé Thein. Dat wier noutwenneg, fir e gudden a gesonde Fonctionnement vun der Integratiounspolitik.

Europapolitik, Schoulpolitik, Verkéierspolitik an direkt Demokratie

Nieft dem Thema Identitéit geet et am Wahlmanifest vun déi Konservativ och ëm d'Sécherheet an d'Aussepolitik. D'Partei fuerdert, ënner anerem, eng Reform vum Schengener Accord.

A Punkto Schoulpolitik maachen déi Konservativ d'Propos, vun engem obligatoresche Militär- oder Zivildéngschtjoer. Dat géif "d'erwuesse Jugend op d'Berufswelt virbereeden", seet d'Sandra Schwartgen. Dat Joer soll mat enger Jorespai entlount an als Pensiounsjoer ugerechent ginn.

Am Beräich Verkéierspolitik, ass et ee Plädoyer fir de Monorail, engem mobille Wee duerch d'Luucht, deen zu enger Entlaaschtung vum Stroossennetz kéint féieren, sou d'Partei.

Déi direkt Demokratie soll mat Referende gestäerkt ginn. D'Instrument soll, der Virstellung vun déi Konservativ no, virun all wichteger Fro an der Chamber zum Asaz kommen.

déi Konservativ maache sech iwwerdeems fir d'Iddi vun engem eenzege Wahlbezierk bei de Chamberwahle staark.

An der Mediathéik:

Aktuelles / / Gilles Wunsch
Lauschteren

Méi zum Thema

Fernand Kartheiser
Chamberwahlen 2018

Sprooch an d'Zukunft vum Land wiere wichteg Thematike fir Lëtzebuerg, seet de Fernand Kartheiser. Bei dëse Wahlen géifen dës Sujete méi am Zentrum vun der ëffentlecher Opmierksamkeet stoen.

Joe Thein
Déi Konservativ

"Den ADR ass eng Partei, déi de Patriotismus aus populisteschen Ursaache mëssbraucht", seet de Joé Thein. Et wier him net gelonge fir d'Partei, op de "richtege Patriotismus" ëm z'orientéieren.

Gast Gibéryen
ADR

D'ADR hätt bei den nächste Chamberwahlen déi bis elo "bescht Méiglechkeet", fir an d'Regierung ze kommen, mengt de Gast Gibéryen. D'CSV wär an deem Fall de "logesche" Koalitiounspartner.

ADR
Alternativ Demokratesch Reformpartei

Den Ausschloss vum Joé Thein hätt näischt mat den Ambitioune vun der Partei bei de Chamberwahlen 2018 ze dinn, seet den ADR-President Jean Schoos. De Joé Thein schwätzt vun engem interne Muechtkampf.

Kartheiser Riicht Eraus
Fernand Kartheiser

​Virun de Wahlen 2013 ass d'CSV schonn un d'ADR erugetrueden, en vue vun enger eventueller Koalitioun. Den ADR-Deputéierte Fernand Kartheiser schwätzt vun engem héije Vertrieder, nennt awer keen Numm.

Dossieren

  • Mënscherechter

    Den 10. Dezember 1948 sinn zu Paräis déi universell Mënscherechter deklaréiert ginn. Um 70. Joresdag vun dëser Deklaratioun steet de Programm vum radio 100,7 ganz am Zeeche vun de Mënscherechter.

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Communiqué du Conseil d’administration du 100,7

    Le Conseil a décidé de créer un comité de transition présidé par Mme Nancy Braun pour la période du 15/12/2018 jusqu'à l'entrée en fonction du nouveau Directeur (m/f). Mme Michèle Vallenthini est nommée suppléante.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen