Dateschutz Méi Sécherheet duerch Privacy Shield?

Privacy Shield ass deen neien Dateschutzaccord fir den Transfert vun Donnéeë vun EU-Bierger an d'USA. Den EU-Autoritéiten no garantéiert de Privacy Shield e bessere Schutz fir d’Europäesch Bierger. Zum Beispill soll d'Sammele vu grousse Quantitéiten Donnéeën duerch d'US-Geheimdéngschter limitéiert ginn. Kritiker soen, datt d'Ofkommes den Notzer keng Rechtssécherheet garantéiert.

Maxi Pesch / ys

Max Schrems & Jan Philipp Albrecht
De Max Schrems an de Jan Philipp Albrecht kritiséieren den Accord (© Zora Siebert)

Privacy Shield ass en neit Dateschutzofkommes, dat den 12. Juli a Kraaft getrueden ass. Et ersetzt de Safe Harbour Accord, deen den Europäesche Geriichtshaff am Oktober 2015 fir ongëlteg erkläert hat. Privacy Shield sollt europäesche Bierger, deenen hir perséinlech Donnéeën an d'USA geschéckt ginn, méi Garantie a méi Sécherheet ginn, erkläert d'Tine Larsen vun der Dateschutzkomissioun CNPD.

"E semanteschen Ënnerscheed"

Donieft soll d'"Bulk Collection", also d’Sammele vu grousse Quantitéiten un Date vun EU-Bierger duerch US-Geheimdéngschter limitéiert ginn. Déi amerikanesch Regierung géif sech selwer Limitatiounen, Garantien an Iwwerwaachungs-Mechanisme ginn, sou d'Tine Larsen. Domat soll massiv Masseniwwerwaachung verhënnert ginn.

Mam neien Accord géif d'USA awer nach ëmmer kee Schutz bei enger disproportionéierter Iwwerwaachung bidden, mengt den däitsch-franséischen Europadeputéierte Jan Philippe Albrecht (déi gréng). "D'USA huet zwar versprach, datt si elo manner ouni Grond jidderee wäerten iwwerwaachen. Awer d'Donnéeë späichere si trotzdem a ville Fäll ouni Grond." Et géif ee semanteschen Ënnerscheed ginn, deen den Europäesche Geriichtshaff awer net als Ënnerscheed géif gesinn. All Späicherung vun Donnéeë wär och ëmmer een Agrëff an d'Grondrecht op Dateschutz.

Kann den Ombudsman hëllefen?

D'Privacy Shield Ofkommes gesäit een Ombudsmann am US-Ausseministère vir. Do kenne Persounen, déi sech ongerecht iwwerwaacht spieren, an Zukunft reklaméieren. Den Ombudsman hätt awer net genuch Muecht, sou de Jan Philippe Albrecht. Déi Persoun wär e relativ ofhängegen Ënnerstaatssekretär am Ausseministère, dee keng Méiglechkeeten hätt, fir d'Decisioune vun de Sécherheets-Administratiounen ze beaflossen.

Den Éisterräicher Max Schrems hat am Oktober mat senger Klo géint Facebook dofir gesuergt, datt den Europäesche Geriichtshaff de Safe Harbor Accord gekippt huet. Hien ass dovun iwwerzeegt, datt och de Privacy Shield op den Europäesche Geriichtshaff wäert kommen. Den Europadeputéierten deelt déi Meenung.

Den Jan Philippe Albrecht plädéiert fir ee generellt Dateschutzgesetz an den USA a fir onofhängeg Dateschutzautoritéiten. De 25. Juli kennt de Grupp "Artikel 29" vun den europäeschen Datschutzkommissiounen zesummen. Do wäert och d'CNPD hiren Avis presentéieren.


Bäitrag vum Maxi Pesch

Méi zum Thema

Tine Larsen.JPG
Dateschutz

Mam "Privacy Shield" si sech d'EU an d'USA iwwert en neien Accord fir den Transfert vun Donnéeë vun der EU an d'USA eens ginn, den zukënftege Nofolger vu "Safe Harbour". D'Tine Larsen vun der CNPD begréisst dat, mee gëtt och ze verstoen: den Däiwel wäert am Detail leien.

Safe-Harbour.jpg
Dateschutz

D’EU-Kommissioun handelt een neien Accord mat den USA aus. D’US-amerikanesch Entreprisen, déi an der EU operéieren, mussen an der Tëscht Alternativen aussiche fir d’Donnéeën ze geréieren.

Max Schrems
Dateschutz

Den Internet-Aktivist Max Schrems huet a senger Affaire géint Facebook Recht kritt. Europäesch Notzer sinn doduerch besser viru Masseniwwerwaachung aus den USA geschützt.

Programm

Dossieren

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Dateschutz

    De 25. Mee trëtt an der EU en neit Dateschutzreglement a Kraaft. Wat bedeit dat fir d'Bierger an d'Betriber? A wat ännert wierklech? Detailer an eisem Themeschwéierpunkt.

Communiquéen

  • radio 100,7: Changement à la tête de la rédaction musicale

    M. Yves Stephany a été nommé à la tête de la rédaction musicale de la radio de service public radio 100,7. M. Stephany, 37 ans, y prend la relève de M. Fred Medernach qui a fait valoir ses droits à la retraite.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen