Europaparlament National Interêten net onwichteg bei Posteverdeelung

Am Europaparlament sinn déi meescht vun de nei gewielten Deputéiert ukomm. An de nächste Wochen ginn déi intern Poste verdeelt. Dobäi spillen och national Interêten eng Roll. Dat weist eng Analyse vun der Fondation Schuman.

Danièle Weber (Bréissel) / cbi

Europaparlament
Wéi wichteg sinn déi national Interêten am Europaparlament? Foto: European Union 2019 - Source : EP / Marc Dossmann

Sechs vun den 751 Europadeputéiert komme bekanntlech aus Lëtzebuerg. Domat ass de Grand Duché zwar proportional zur Bevëlkerung am Parlament iwwerrepresentéiert - an awer ass déi Delegatioun kleng fir zu Bréissel a Stroossbuerg mat vill Gewiicht lëtzebuergesch Interêten duerchzesetzen.

Anescht gesäit dat bei de grousse Memberlänner wéi Däitschland, Frankräich oder Italien aus. Datt d'Europadeputéiert sech dacks och als Vertrieder vun nationalen Interête gesinn, läit schonn dorun, wéi d'Wahlen organiséiert ginn, seet de Paul Butcher vum European Policy Center. D'Europaparlament sollt eigentlech e Parlament vun der ganzer Europäescher Unioun sinn, "mee d'Deputéiert ginn op de Lëschte vun nationale Parteie gewielt."

"Normalerweis vu Bierger, déi hir Stëmmen op mannst zum Deel op der Basis vun der nationaler Politik an net no europäesche Prioritéite verdeelen. Also bestinn d'Europawahlen net aus engem groussen Europäesche Vott, mee éischter aus 28 klengen nationale Wahlen."

Kampf ëm d'Dossieren

Tatsaach ass, datt een a ville legislative Votte geographesch Divisiounen erëmfënnt - d'Deputéiert also net onbedéngt hirer Partei, mee éischter den nationalen Interête follegen, seet den Eric Maurice, de Chef vum Bréisseler Bureau vun der Fondation Robert Schuman.

Ee Beispill wier hei d'Direktive vun den detachéierte Salariéen. Et wier keen Zoufall, datt hei ee Fransous de Rapporteur vun deem Dossier am Parlament war. Et géif ee Muechtkampf tëscht de politesche Fraktiounen, mee och tëscht de nationalen Delegatioune ginn, wann et ëm Posten am Parlament geet, sou den Expert.

Däitsch Dominanz ass ongesond

Am leschte Parlament war net z'iwwersinn, datt vill Spëtzeposte vun Däitsche besat waren: Mam Manfred Weber an Udo Bullmann koumen d'Cheffe vun den zwou grousse Fraktiounen, der Europäescher Vollekspartei an de Sozialisten allebéid aus Däitschland. Genee esou wéi d'Gaby Zimmer bei der Gauche Unie an d'Ska Keller bei deene Gréngen. Fir de Paul Butcher vum European Policy Center sollt dat offiziell kee Problem sinn:

"Well d'Fraktiounscheffe sollten hir europäesch Parteifamillje representéieren. Sou sollt et op alle Fall sinn. Ech ka verstoen, datt verschidde Leit eng Iwwerrepresentatioun vun Däitschen hei gesinn. Mee vläicht läit dat jo och drun, datt déi Däitsch zueleméisseg déi meeschte Bierger an der Europäescher Unioun hunn."

Den Eric Maurice awer ass iwwerzeegt, datt et besser wier dofir ze suergen, datt d'Spëtzeposte besser ënner de Natioune verdeelt ginn: "National Sensibilitéite si wichteg an et ka problematesch sinn, wann een eenzelt Land dominéiert."

D'EVP bleift bis op Weideres ënner däitscher Féierung. Déi lescht Woch gouf de Manfred Weber als Chef vun der EVP-Fraktioun erëmgewielt. Et ass awer nach net eraus, ob hien net Kommissiounspresident gëtt.

An de nächsten Deeg a Woche wäerten déi aner Gruppen hir Spëtzte wielen an och déi aner Posten am Parlament, wéi déi vun de Presidente vun de Kommissiounen, verdeelt ginn.


An Zesummenaarbecht mat Euranet Plus, dem gréissten europäesche Radio-Reseau fir EU-Aktualitéit.

An der Mediathéik:

Europa Aktuell / / Danièle Weber
Lauschteren

Méi zum Thema

Danièle Weber Analys
Réckbléck op d'Europapwahlen

Europa huet gewielt. An d'Resultat ass dës Kéier eent, wat vill Froen opléisst. D'Parlament schéngt dës Kéier manner presséiert ze sinn, ze reagéieren. Dat kéint de Spëtzekandidate-System schwächen.

Europäesch Kommissioun
Europawahlen 2019

Bei der Fro, wien nächsten EU-Kommissiounspresident gëtt, géif et prioritär ëm Inhalter goen. Dat soen déi nei gewielten Lëtzebuerger EU-Deputéiert. Hanner zouenen Diere siche verschidde Lageren no Majoritéiten.

Programm

  • Notturno

  • On air

    Virum Dag

  • Moies-Magazin

  • Iwwer Mëtteg

  • Resonanzen

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen