Nei EU-Kommissioun Paritéit bal erreecht

​13 Fraen a 14 Männer sinn op der provisorescher Lëscht vun de neien EU-Kommissären, déi d'Ursula von der Leyen proposéiert. De Nicolas Schmit ass och dobäi. Déi zukünfteg Presidentin vun der Europäescher Kommissioun hat am Juli annoncéiert, si géif mam gudde Beispill virgoen an eng komplett Egalitéit an hirem Collège vun de Kommissären assuréieren.

Danièle Weber / Maxi Pesch / cz

Ursula von der Leyen
Foto: picture alliance / Fabian Sommer / dpa

Mat 13 Fraen an enger Equipe vu 27 huet si dat Zil bal erreecht. Nach ni waren esou vill Fraen an der Kommissioun. Den aktuelle Kommissiounspresident Jean-Claude Juncker huet néng Fraen a sengem Team.

Dräi dovu bleiwen an der Equipe vun der Ursula von der Leyen: Déi aktuell Kompetitivitéits-Kommissärin, d'Dänin Margreth Vestager, d'Bulgarin Marya Gabriel, bis elo fir Digital Ekonomie zoustänneg an d'Tschechin Vera Jourova, déi sech aktuell em d'Justiz bekëmmert.

Nicolas Schmit ass op der Lëscht

Bekannt Nimm gëtt och bei de Männer op der Lëscht: den Erweiderungs-Kommissär Johannes Hahn gouf fir d'drëtt vun Éisträich nominéiert, och de Lett Valdis Dombrovskis, de Slowen Maros Sefkovic, den Ir Phil Hogan an den Hollänner Frans Timmermans bleiwe Member vun der Kommissioun.

Fir d'Belsch geet de fréieren Ausseminister Didier Reynders an d'Kommissioun, fir Frankräich ass et déi fréier Europadeputéiert Sylvie Goulard, déi och kuerz Verdeedegungsministerin war.

Lëtzebuerg hat bekanntlech de fréieren Aarbechtsminister an aktuellen Europadeputéierten Nicolas Schmit als EU-Kommissär designéiert. Hien ass och op der Lëscht vun de proposéierte Kommissären, déi um Méindeg Mëtteg publizéiert gouf.

Hie muss wéi all déi aner Kandidaten an engem Hearing am Europaparlament Ried an Äntwert stoen. Eréischt nodeems d'Parlament déi ganz Kommissioun guttgeheescht ka si hiert Mandat untrieden. Dat ass fir den 1. November geplangt. D'Hearinge sollen Enn September an Uganks Oktober am Parlament ofgehale ginn.

Kontrovers Kandidaten

Am ëmstriddensten dierft wuel d'Nominatioun vum Ungar Lazslo Trocsanyi sinn. Hie war an Ungarn Justizminister a steet deemno hannert där ëmstriddener Reform vum ungaresche Justizsystem, a vun den neien Gesetzer iwwert d'Finanzéierung vun den ONGen an dem Gesetz, wat dozou gefouert huet dat dem George Soros seng Zentraleuropäesch Universitéit huet missen hire Sëtz vu Budapest op Wien verleeën.

Fir den Lazslo Trocsanyi dierft et am Hearing am Europaparlament net ganz einfach ginn. Och de polnesche Kandidat kéint mat desagreabele Froe rechnen. Den Ament enquêtéiert d'europäesch Anti-Bedruchs-Agence OLAF géint den Janusz Wojciechowski wéinst Irregularitéiten bei Spesen-Ofrechnungen.

Sozialisten stelle méi Kommissären wéi d'Chrëschtdemokraten

An der neier Kommissioun verännert sech dat politescht Kräfteverhältnis.

An der Juncker-Kommissioun hat d'Europäesch Vollekspartei mat 14 Kommissären bei Wäitem déi meescht, dono koumen d'Sozialisten mat aacht an déi Liberal mat fënnef. An der Equipe vun der Ursula von der Leyen si néng Kommissären Member vun der EVP, d'Sozialisten stelle mat zéng Kommissären déi meescht.

Sechs EU-Kommissären si vun de Liberalen.

Portefeuillen: Gëtt de Nicolas Schmit Kommissär fir Soziales?

Sécher ass bis elo dat ganz uewen an der Hierarchië un der Säit vun der Ursula von der Leyen de Sozialist Frans Timmermans an déi Liberal Margrethe Vestager stoen dierften.

Si representéieren dat, wat vum Spëtzekandidatesystem iwwereg bliwwen ass. Deem System no hätt jo éischter een vun hinne solle Kommissiounspresident ginn. Aplaz dovu wäert d'Ursula von der Leyen déi zwee wuel als iewescht Vizepresidenten nominéieren.

Iwwer d'Fro vun de Portefeuillen gouf an de leschten Deeg zu Bréissel vill spekuléiert. De Frans Timmermans géif sech verschiddenen Source no net méi ewéi an dëser Kommissioun em d'Rechtsstaatlechkeet, mee em de Klimaschutz bekëmmeren. D'Margrethe Vestager kéint de Portefeuille vum digitale Marché kréien.

Den aktuelle Landwirtschaftskommissär Phil Hogan gëtt als Nofolger vun der Cecilia Malmström am Dossier internationale Commerce gehandelt.

Fest steet, dat de Spuenier Josep Borrel de Ressort vum Federica Mogherini als EU-Chefdiplomat iwwerhëlt.

Et kurséieren verschidden Lëschte mat Ressort-Verdeelungen, dorënner eng, an där ausgerechent de Lëtzebuerger Kandidat Nicolas Schmit den Dossier Finanzservicer géif kréien

De Nicolas Schmit wollt dozou kee Commentaire ofginn.

Am léifste géif hien de Portefeuille vun der Sozialpolitik iwwerhuelen. Dat hat de fréiere Lëtzebuerger Aarbechtsminister vrun der Summerpaus am 100Komma7-Interview gesot.

De Marc Angel réckelt an d'Europaparlament

De Marc Angel réckelt fir den Nicolas Schmit an d'Europaparlament no. Dat seet den LSAP Deputéierten a President vun der Aussepolitescher Chamberkommissioun eis op Nofro hin. De Marc Angel war bei den Europawalen dëst Joer Zweetgewielten nom Nicolas Schmit. Déi nei Kommissioun soll den éischten November mat hirer Aarbecht ufänken. De Marc Angel betount, datt hie sou laang Deputéierte géif bleiwen, bis déi nei EU-Kommissioun am Amt wier. "An ech hunn nach puer Projeten déi ech well fäerdeg maachen. Ech well mengen Nofolger an der Aussepolitescher Chamberkommissioun propper Dossieren iwwerloossen", sou de Marc Angel.


De Marc Angel

Méi zum Thema

D'Urula von der Leyen
Nei EU-Kommissiounspresidentin

Mat knapper Majoritéit gouf d'Ursula von der Leyen als éischt Fra un der Spëtz vun der EU-Kommissioun gewielt. Eng dënn Basis, op där déi däitsch CDU-Politikerin elo hir Kommissioun opbaue muss.

D'Ursula von der Leyen
Presidence vun der EU-Kommissioun

D'Ursula von der Leyen huet an enger Ried am Europaparlament hir Iddie presentéiert. Et war hir lescht Chance méiglechst vill Deputéiert fir sech ze gewannen. Nach ass onkloer, ob et duer geet.

Lëtzebuerger Europadeputéiert
Méiglech Presidentin vun der EU-Kommissioun

Duerch d'Nominatioun vun der Ursula von der Leyen als nei Kommissiounspresidentin stellt sech d'Fro, wéi sech déi lëtzebuergesch EU-Deputéiert beim Vott decidéieren. Déi meescht vun hinne sinn, eegenen Aussoen no, nach ondecidéiert.

Matthias Kirsch
Chronik

D'Nominatioun vun der Ursula von der Leyen kéint d'Enn vun der Grousser Koalitioun bedeiten. Dat mengt eisen Däitschlandkorrespondent Matthias Kirsch a senger Chronik.

Programm

  • Notturno

  • On air

    Notturno

  • Virum Dag

  • Moies-Magazin

  • Iwwer Mëtteg

Dossieren

  • 76. Filmfestival zu Venedeg

    Zu Venedeg ass déi 76. Editioun vum Filmfestival. Den Tom Dockal ass fir de radio 100,7 op der Plaz. All Dag pickt hie sech ee Film eraus, fir deen da méi genee ënner d'Lupp ze huelen.

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen