Zënter e puer Wochen organiséiert “Pulse of Europe” all Sonnden e Rassemblement op der Clairefontaines-Plaz an der Stad. Déi meeschte Leit wäre bis elo fir de siechzegsten Anniversaire vun de Réimesche Verträg komm, esou den Organisateur Jonathan Ponchon: “Do hate mer 200 Leit. Mir hate Kuch a Fräibéier, dat huet vill Leit ugezunn.” Et géing op dëse Maniffen drëms goen “Europa ze feieren” a “Spaass ze hunn”.
De Jonathan Ponchon seet awer och hie kéint gutt novollzéien datt d’EU am Moment dacks kritiséiert gëtt: “Ech ka Leit verstoen, déi fir d’Marine Le Pen oder de Nigel Farage wielen.” Et wär “offensichtlech”, datt een net onbedéngt e Fan vun Europa ass, wann een als franséischen oder däitschen Aarbechter seng Plaz verléiert, well d’Produktioun a Polen oder Bulgarien verluecht gëtt. Eng Äntwert op esou Problemer kéint hien awer “leider och net ginn”, esou de Jonathan Ponchon.
Keng politesch Revendicatiounen
“Pulse of Europe” wéilt d’europäesch Iddi “erëm mat positiver Energie fëllen.” Et wär net d’Ziel vun der Bewegung fir mat politesche Revendicatiounen eppes un der EU ze änneren: “Vue datt mir keng Politiker sinn, an och net wëlles hu Politiker ze ginn, wëlle mir datt d’Politiker selwer Léisunge fannen,” esou de Jonathan Ponchon. Seng Bewegung wéilt eng europawäit Debatt kreéieren, déi dozou bäidréit datt “mëttelfristeg” politesch Léisunge fonnt ginn.
Den Organisateur vun de Maniffen betount dofir och d’Bewegung wär “komplett onofhängeg” vun den europäeschen Institutiounen oder politesche Parteien. Kuch, Fräibéier a Gadgeten fir d’Rassemblementer hätt hien mat sengen eegenen Erspuernisser a mat Donatioune vun de Manifestanten finanzéiert.
Déi äermst Leit si “schwéier ze areechen”
Als Student fir “European Governance” schreift de Jonathan Ponchon selwer eng Master-Aarbecht iwwert d’Leit déi u “Pulse” deelhuelen. Hie seet et wär am Moment “nach relativ schwéier soen” wéi eng Leit op d’Manifestatiounen kommen, déi hien organiséiert, hien hätt awer de “Verdacht”, datt “déi äermst Leit schwéier ze areechen sinn”. Des Leit géife vläicht manner vun Europa profitéieren, zum Beispill well se net kenne reesen.
“Pulse of Europe” ass am November zu Frankfurt vum Affekot Daniel Röder a senger Fra Sabine gegrënnt ginn. Mëttlerweil geet d’Bewegung an 13 europäesche Länner fir d’EU op d’Strooss. A Süd- an an Osteuropa huet d’Initiative awer bis elo kee grousse Succès, sou ware nach keng Manifestatiounen an Italien an a Griicheland. D’Griichen hätten am meeschten ënnert der Finanzkrise gelidden, esou de Jonathan Ponchon, dofir kéint hie verstoen “datt si elo am Moment net mega europabegeeschtert sinn.”