Regierung ruddert beim Referendum iwwer d’Auslännerwahlrecht zeréck.

Och de grénge Justiz-Minister wollt sech net drop festleeën, ob während dëser Legislatur-Period e Referendum iwwer d’Auslännerwahlrecht gemaach gëtt. E Mëttwoch schonn hat de Premier, Xavier Bettel, dozou keng kloer Ausso gemaach. Am 100,7-Interview seet de grénge Justiz-Minister, Félix Braz, dass d’Lëscht vun de Referendum’s-Froen an der Chamber-Kommissioun iwwer d’Verfassung’s-Revisioun festgeluecht gëtt. D’Regierung an hier Majoritéit hätten e Virschlag op den Dësch geluecht, mee als gutt Demokrate géifen se dee Virschlag net gäre mam Kapp duerch d’Mauer forcéieren. Et wär der zoustänneger Kommissioun iwwerlooss. Op Twitter huet den Alex Bodry geschriwwen : “Bis op weideres gëllt a Saache Referendum de Regierung’s-Programm. Alles anescht géif duerchernee bréngen...”.

De ganzen Interview vum Gil Goebbels mam Felix Braz :

 

Hei wat de Felix Braz den 3. Dezember 2013 sot, wéi déi Gréng um ausseruerdentleche Kongress iwwert de Regierungsprogramm ofgestëmmt hunn: “D’Chamber an d’Regierung si fundamental wichteg Institutiounen, mee si sinn net alles. Mir wäerten de Biergerinnen a Bierger d’Wuert dowéinst méi oft ginn, a net nëmmen d’Wuert, mee och d’Entscheedung an deene Froen, déi vun zentraler Natur si fir de Grondkonsens ënnert eis, och ginn. (...) De Referendum wäert an de nächste 5 Joer eng wichteg Roll spillen, et wäerten 2 Referende gi – zumindest 2 Referenden, déi d’Regierung wäert ustoussen. An zwar wëlle mer déi Aarbechten, déi zënter elo bal 10 Joer am Gaange si fir eng Verfassungsrevisioun ze maache fir d’éischt engem Referendum ënnerwäerfen op e puer präzise Froen, Froe vun enger besonnescher Bedeitung. Déi Lëscht hu mir nach net exhaustif ausgestallt, et stinn am Moment 4 Froen am Koalitiounsaccord. “Notammant” 4 Froen, fir déi déi dat iwwersinn haten, an do kënnen der dobäi kommen am Gespréich mat den anere Fraktiounen a Parteien aus der Chamber.

Mir wëlle Froen, wéi zum Beispill de Saz aus der Verfassung dass d’Salairë vun de Ministres de Cultes zu Laaschte vum Staat sinn engem Referendum ënnerwäerfen; d’Fro op eis auslännesch Matbierger zu de Chamberwahle kënnen zougelooss ginn; d’Fro op d’Ministermandater bei 2 solle limitéiert ginn. Beispiller vu Froen, déi mer dem Referendum wëllen ënnerwäerfen a wann se da géingen ugeholl ginn am Referendum, féiere mer d’Aarbecht weider iwwert d’Verfassungsrevisioun, déi dann an engem éischte Vote vun der Chamber ugeholl gëtt an dann, sou gesi mer et fir, an engem zweete Vote erëm eng Kéier iwwert e Referendum soll bestätegt ginn, oder als ganzt Wierk soll vun de Biergerinnen a Bierger verworf ginn.”

Net verpassen

  • Offre d'emploi: Redakter/Redactrice Web

    radio 100,7

    Den Média de service public 100,7, deen de radio 100,7 bedreift, sicht en/eng neie/nei Redakter/Redactrice fir d'Onlineredaktioun mat engem Aarbechtskontrakt op onbestëmmten Dauer (CDI) fir 40 Stonnen d'Woch.

Programm

Dossieren

  • Chamberwalen 2023

    Am November gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

  • Hëtzt & Dréchent

    2022 ass bis elo vun héijen Temperaturen an extreemer Dréchent markéiert. Wéi eng Impakter huet dat op Mënsch an Ëmwelt?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen