Medien "Reporter": Een anere Journalismus?

Zwee fréier Wort-Journaliste wëllen en Online-Magazin fir "onofhängege, kriteschen, investigativen a partizipative" Journalismus grënnen. Ee spannende Projet, deen de Mediepluralismus zu Lëtzebuerg stäerke kéint. Als éischt muss e beweisen, datt e sengen héijen Uspréch gerecht ka ginn.

Pia Oppel / fk

Meenung Pia Oppel
Pia Oppel

"De Correspondent" an Holland, "Krautreporter" an Däitschland, an elo ganz rezent och "Republik" an der Schwäiz hunn et virgemaach: Wa kleng Equippe vu Journaliste sech zesummendinn an eng aner Zort Journalismus verspriechen, loosse sech séier genuch Leit iwwerzeegen, déi de Projet wëllen ënnerstëtzen. Nach ier Contenu do ass, si si bereet een Abonnement ze huelen. Bei dëser éischter Ronn "Crowdfunding" hëlleft de Bekanntheetsgrad an de Ruff vun den implizéierte Journalisten, grad wéi d'Onzefriddenheet vun den Ënnerstëtzer mat der Medielandschaft.

"Onofhängeg, kritesch, investigativ a partizipativ"

Den Timing fir "Reporter" ze lancéiere kéint an deem Sënn kaum besser sinn. Ëmmerhin ass d'Opreegung ëm de forcéierten Depart vum Wort-Chefredakter Jean-Lou Siweck an d'Amëschung vum Saint-Paul-Verwaltungsrot an d'Alldagsgeschäft vum Wort knapps verklongen. A mam fréiere Wort-Journalist Christoph Bumb steet ee jonkt, mä am Lëtzebuerger Polit-Mikrokosmos wuel bekannt Gesiicht hannert dem geplangten Online-Magazin.

"Onofhängeg, kritesch, investigativ a partizipativ" wëllt "Reporter" sinn. Nei ass dat net onbedéngt. Et gi politesch a wirtschaftlech onofhängeg Zeitungen zu Lëtzebuerg, déi Hannergrondrecherche maachen. Och de radio 100,7 huet deen Usproch an ass doriwwer eraus net op Revenuen duerch Reklammen ugewisen. Als ëffentlech-rechtleche Radio ass e souguer "crowdfunded", ebe mat Steiergelder.

Alternativen nieft etabléierten Acteuren

Dominéiert gëtt d'Medielandschaft awer vun dräi groussen Acteuren: RTL, Saint-Paul an Editpress. Hei bréngen déi kommerziell oder politesch Interessie vun den Aktionäre Contraintë fir d'Berichterstattung mat sech. Datt jonk, motivéiert Journalisten net onbedéngt mengen, datt si hei hiren Dram vun enger anerer Zort Journalismus kënnen erfëllen, ass novollzéibar. Deemno och de Wonsch, nei Alternativen ze schafen.

En éischten Test, ob et eng reell Demande fir de Projet gëtt, ass d'Crowdfunding-Initiativ, déi "Reporter" deemnächst wëll lancéieren. Et kann awer gutt sinn, datt dës éischt Hürd, déi einfachst ass. Déi eigentlech Erausfuerderung besteet doranner, fir d'Versprieche vun engem "anere Journalismus" duerno laangfristeg anzeléisen.

Erausfuerderungen

An dat hänkt vun enger Rei, deels ganz prakteschen, Froen of. Zum Beispill, ob "Reporter" an deem klenge Lëtzebuerg genuch qualifizéiert Journaliste fënnt, déi bereet sinn, sech op d'Experiment anzeloossen.

Da stellt sech d'Fro a wéi engem Verhältnis um Enn de Präis vum Abonnement zur Quantitéit vun interessantem Contenu steet. Investigativ Recherchen, d'Geschichten hannert der Alldagshektik a spannende Storytelling verlaange vill Zäit. Déi um Ufank viraussiichtlech kleng Journalisten-Equipe muss hir Lieser also drop gefaasst maachen, datt net regelméisseg Meeschterwierker geliwwert ginn. De Risiko ass, datt d'Begeeschterung bei de Lieser séier noléisst. Den däitschen Online-Magazin "Krautreporter" huet a sengem zweete Joer zwee Drëttel vun den Ënnerstëtzer verluer.

Dann hu kleng Publikatiounen et besonnesch schwiereg, fir eng Äntwert op déi komplizéiert Sproochesituatioun am Land ze fannen: Den Ament presentéiert de Site "Reporter.lu" sech op Däitsch a schléisst domadder vill potentiell Lieser aus.

Beräicherung fir de Mediepluralismus?

A wann de Projet säin Usprooch Eescht hëlt, fir investigative Journalismus ze maachen, stellt sech d'Fro, wéi gutt een als kleng Equipe opgestallt ass, fir sech géint Aschüchterungs- a Instrumentaliséierungsversich vu baussen ze wieren.

Konkurrenz belieft d'Geschäft. Wa "Reporter" et also fäerdeg bréngt, all dës Defien ze meeschteren, da kéint de Projet eng kleng, mä wierkungsvoll Beräicherung fir de Mediepluralismus am Land bedeiten.

An der Mediathéik:

Chronik / / Pia Oppel
Lauschteren

Méi zum Thema

Hilgert Bumb Zenthöfer Lorang Riicht Eraus
Medien

D'Wort huet versicht méi onofhängeg ze beriichten an doduerch Lieser ze gewannen. Mä d'politesch a wirtschaftlech Contraintë fir d'Dagespress si grouss, sou d'Konklusioun vun der Diskussiounsronn.

Jean-Lou Siweck
Demissioun vum Chefredakter

De Jean-Lou Siweck hält Enn September als Chefredakter vum Lëtzebuerger Wort op. Hien ass net averstane mat der neier Linn vum President Luc Frieden an dem Bistum, Proprietär vum Groupe Saint-Paul.

Programm

  • Virum Dag

  • On air

    Moies-Magazin

  • Iwwer Mëtteg

  • Resonanzen

  • Spektrum

Dossieren

  • Europawahlen 2019

    Vum 23. bis de 26. Mee gëtt an der EU en neit Europaparlament gewielt. Zu Lëtzebuerg gëtt Sonndes, de 26. Mee gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Festival de Cannes 2019

    Alleguer d'Artikele vum Festival de Cannes 2019.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen