Staatsbudget 2017 Eng Milliard Defizit

De Budget vum Zentralstaat wäert d'nächst Joer en Defizit vu ronn enger Milliard Euro maachen. Dat weist de Staatsbudget 2017, deen de Finanzminister Pierre Gramegna (DP) de Moien an der Chamber deponéiert huet.

Jean-Claude Franck

Budget 2017
D'Presentatioun vum Budget. Foto: CHD

Trotz gudde Wirtschaftsprognosen enregistréiert de Budgetsprojet vun der blo-rout-grénger Regierung am Joer 2017 beim Zentralstaat en Defizit vun 980 Milliounen Euro, d.h. -1,7 Prozent vum PIB. D'Gesamtschold vum Staat soll doduerch d'nächst Joer op 13,5 Milliarden Euro klammen, also 23,6 Prozent vum PIB. Am Fréijoer hat d'Regierung fir d'nächst Joer nach méi eng niddereg Staatsschold vun 13,3 Milliarden Euro virgesinn.

D'Regierung freet d'Autorisatioun, fir am Joer 2017 1,12 Milliarden an am Joer 2018 1,625 Milliarden ze léinen. Fir déi nächst zwee Joer sinn also Staatsemprunte vun 2,75 Milliarden Euro virgesinn. Och dëst Joer gëtt nach e Staatsemprunt gemaach, wann d'Maartkonditioune stëmmen, heescht et am Budgetsprojet.

Wéinst der gudder Situatioun vum Budget vun der Sécurité sociale an de Gemengen (cumuléierten Iwwerschoss vun 1,1 Milliarden Euro), wäerten déi gesamt ëffentlech Finanzen d'nächst Joer en Iwwerschoss vun 150 Milliounen Euro (0,3 Prozent vum PIB) maachen.

Wéinst der geplangter Steierreform rechent d'Regierung d'nächst Joer mat engem Ausfall bei de Staatsrecettë vun 370 Milliounen Euro.

Et ass dee leschte Staatsbudget, dee vum héije Fonctionnaire Jeannot Waringo koordinéiert gouf. Den Direkter vun der Inspection Générale des Finances (IGF) geet den 1. November an d'Pensioun.

Programm

Net verpassen

Dossieren

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun hire Bierger? Mir weise konkret Beispiller.

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen