Et wiere keng Sanktioune vis-à-vis vun der Sylvie Mischel ausgeschwat ginn, mee si wier fräiwëlleg zeréckgetratt. Wéi jiddwereen, dee vun engem Posten zerécktrëtt, kéint si sech erëm fir politesch Poste mellen, "wa si denkt, et wier un der Zäit erëm politesch aktiv ze ginn", esou de Jean Schoos.
Eng Grenz iwwerschratt
D'Sylvie Mischel war iwwer de Weekend an d'Kritik geroden, well si der Regierung op Facebook virgeheit hat, si géif net genuch fir Lëtzebuerger am Land maachen. Doropshi war si ënner anerem als Vizepresident vun der Partei an als Presidentin vun der Fraesektioun bei der ADR zeréckgetratt.
D'Sylvie Mischel hätt mat hirem ëmstriddene Facebook-Post "eng Grenz" bannen der ADR iwwerschratt, seet dem ADR-President Jean Schoos. Déi mëttlerweil demissionär Vizepresidentin vun der ADR hat d'Migratiounspolitik vun der Regierung op Facebook kritiséiert mam Hiweis, et géif net genuch fir d'Lëtzebuerger am Land gemaach ginn.
Den ADR-President sot eis, déi Themen dierften net matenee vermëscht ginn; et dierft ee kee vergiessen, mee et wéilt een net "déi eng géint déi aner" ausspillen, esou de Jean Schoos. E Posting wéi vun der Sylvie Mischel "wier net vun der Partei komm".
Hir Partei huet sech mëttlerweil vu verschiddene Reaktiounen op dee Post distanzéiert. De Jean Schoos erkläert, datt d'Sylvie Mischel Verantwortung iwwerholl hätt, wéi hir déi "ganz Saach aus den Hänn gerutscht ass".
D'Konsequenzen droen
D'Parteiexekutiv hätt festgehalen, datt Posten, déi zwee Theme vermëschen, net méi solle gemaach ginn. Kloer Reegelen hätt d'Partei awer net festgeschriwwen. All Parteimember wier selwer responsabel fir déi Saachen, déi hien online post a misst spéider dofir riicht stoen.
D'ADR géif fir d'Meenungsfräiheet stoen a jiddweree wier fräi, seet de Jean Schoos: "Dat heescht jiddwereen ass [fir sech] responsabel. Dat huet awer dann och d'Konsequenz, datt een och d'Konsequenze vun der Responsabilitéit droe muss."