Fräie Mikro Vill Gefasel an der Chamber

Déi lescht Seancë vun dëser Legislatur kënnege sech an der Chamber un. Wat awer an de leschte Wochen do gelaf ass, huet déi wéinegst Bierger vum Hocker gerass, mengt de Laurent Moyse am Fräien Mikro.

Laurent Moyse

Meenung Laurent Moyse

Wa mir den 14. Oktober wiele ginn, droe mir zu der Erneierung vun der Chamber bäi, andeems mir eis Stëmm deene Kandidaten oder där Lëscht ginn, déi an eisen Aen am beschten d'Interesse vun eisem Land fir déi nächst fënnef Joer verteidege wäerten. Fir richteg misst ee vun de Chamber- a Regierungswahle schwätzen, well opgrond vun de Resultater, déi deen Owend erauskommen, wäert sech och eng Regierung bilden, déi nom neie Kräfteverhältnis déi néideg Majoritéit kritt.

D'Parlament ass eng fundamental Institutioun vun eiser Demokratie, ënner anerem well si e Resonanzbuedem fir d'Diskussiounskultur hei am Land ass. An deem Sënn kéint een erwaarden, datt d'Parteien, déi do vertrueden sinn, een anert Bild ofginn, wéi dat an den leschte Méint de Fall war. Et kann ee sech froen, wat dat fir en Zweck huet, datt verschidden Deputéierte kuerz virum Enn vun der Legislatur hiert Mandat engem Parteikolleg iwwerloossen, fir datt deen nach an d'Chamber erarutscht a sech domat fir déi nächst Wahle besser positionéiere kann. All déi grouss Parteien hunn deen Trick ugewannt, woubäi et kloer ass, datt dee Wiessel reng kosmetescher Natur ass, an der Aarbecht an der Chamber esou kuerz viru Schluss kaum nëtzlech ass.

Virgezeechent Ritualer

Dat selwecht gëllt fir de geplangten Optrëtt vu verschiddene Regierungsmemberen an der Chamber, déi engem Ritual follegen, deen zu dësem Zäitpunkt kaum nach Sënn mécht. Wéi de Staatsminister seng lescht Deklaratioun zur Lag vun der Natioun viru Kuerzem virgedroen huet, gouf allgemeng bedauert, datt hie sech op e Bilan vun der ausgehender Regierung begrenzt huet a sech net an d'Zukunft projezéiert huet. Mä wat fir e Sënn mécht et fir d'Chamber, e puer Méint virun de Wahlen esou en Exercice ze plangen, wou jidderee weess, datt ausser Bäifall vun der Majoritéit a Kritik vun der Oppositioun net vill Konkretes aus der Debatt ze zéien ass?

Och déi jäerlech Flichtübung vun anere Membere vun der Regierung gläicht ëmmer méi engem virgezeechente Ritual, dee kaum nei politesch Erkenntnisser bréngt. Sou zum Beispill dem Ausseminister seng Ried iwwer d'Aussepolitik, bei där een dacks méi iwwer seng Gefiller a perséinlech Usiichte vun der Weltpolitik - a muenchmol och seng Frustratiounen - gewuer gëtt, wéi iwwer iergendwellech strategesch Visiounen. Deen Exercice erlaabt et him, senger selektiver Indignatioun iwwer d'Virgoensweis vu verschiddene politesche Verantwortlechen an Europa oder anerwäerts fräie Laf ze ginn oder d'europäesch Flüchtlingspolitik ouni grouss Convictioun ze verteidegen, déi a Wierklechkeet zimlech erbäermlech Resultater opweist.

D'Grenze vun der Portmonnisdiplomatie

Och d'Entwécklungspolitik, déi alljährlech an der Chamber vum zoustännege Minister virgestallt gëtt, gläicht all Kéier enger Lobeshymne vum Ee-Prozent-Bäitrag vu Lëtzebuerg a Saachen Hëllef fir aarm Länner - eng Leeschtung, déi souwuel Majoritéit wéi Oppositioun net midd ginn ze ënnersträichen. Natierlech ass dee budgetären Effort an deem Beräich ze begréissen, mee wann ee weltwäit déi laangfristeg Evolutioun vun der Entwécklungspolitik ënnersicht, kënnt ee gär zur Conclusioun, datt déi joerzéngtelaang Beméiungen zimlech bescheiden ausfalen an d'Portmonnisdiplomatie seng Grenzen opweist.

Doduerch, datt d'Substanz an der Politik dacks ze kuerz kënnt an d'Chamber dacks als Bühn fir vill Gefasel mëssbraucht gëtt, wonnert et kaum, datt d'Parteie sech als alleréischt mat hire Kandidaten an der Ëffentlechkeet breet maachen an eréischt vill méi spéit mat hirem Programm an de Wahlkampf zéien. E Programm, deen an der Regel och esou verfaasst gëtt, datt d'Parteie sech Dieren oploossen, fir an der nächster Regierungskoalitioun matmaachen ze kënnen.


Mam Zil, déi ëffentlech Debatt ze fërderen, invitéiert de radio 100,7 am Fräie Mikro Leit aus der Zivilgesellschaft fir aktuell Themen ze kommentéieren. De Fräie Mikro spigelt reng d'Meenung vu sengem Auteur erëm.

An der Mediathéik:

Fräie Mikro / / Laurent Moyse
Lauschteren

Méi zum Thema

Jean-Claude Franck Analys
Etat de la Nation

D'Regierung huet hire Bilan am Etat de la Nation net offensiv verdeedegt, esou d'Analyse vum 100,7-Chefredakter Jean-Claude Franck. De Projet vun der Dräierkoalitioun wier eriwwer.

Regierungserklärung 2018
Etat de la Nation

Sechs Méint virun de Chamberwahlen huet de Xavier Bettel an der Deklaratioun virun allem e Bilan vun der Regierungsaarbecht presentéiert. Nei Mesure goufe quasi keng annoncéiert.

Michel Wolter an der Chambe3r
Chamberwahlen 2018

De Michel Wolter ass iwwerzeegt, datt déi blo-rout-gréng Koalitioun no de Wahle vum 14. Oktober virufiert, wann et arithmetesch méiglech ass. Souguer mat 31 Sëtz. Do wier hie "ganz sécher", seet den CSV-Politiker.

Programm

Dossieren

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

  • Dateschutz

    De 25. Mee trëtt an der EU en neit Dateschutzreglement a Kraaft. Wat bedeit dat fir d'Bierger an d'Betriber? A wat ännert wierklech? Detailer an eisem Themeschwéierpunkt.

Communiquéen

  • Une nouvelle application mobile « radio 100,7 »

    radio 100,7 vient de lancer sa nouvelle application pour appareils mobiles. L'appli, simple à installer et facile à utiliser, permet d'écouter le programme de la radio 100,7 en direct et en différé en puisant dans la médiathèque de la radio. 

  • Yann Logelin, nouveau chef de la programmation à radio 100,7

    radio 100,7 annonce la nomination de M. Yann Logelin au poste de chef de la programmation. Yann Logelin prendra le relais de M Claude Mangen qui, après 25 ans à ce poste, assumera la direction du Mierscher Kulturhaus à partir du 1er novembre 2018.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen