Google-Datenzenter zu Biissen Viraussiichtlech keng gréisser Obstakelen

Déi éischt strategesch Ëmweltprouf fir ee Google-Datenzenter ass ofgeschloss. Dat huet de Jos Schummer, Buergermeeschter vu Biissen, op Nofro hi präziséiert. D'Fro vum Waasserverbrauch wier nach net gekläert.

Pia Oppel / cbi

Google Headquarters zu Mountain View, CA
Google wëll eventuell en Datenzenter zu Biisse bauen. Foto: Wolterk / Bistock.

D'Gratiszeitung L'Essentiel hat gemellt, datt d'Prozedure fir de Projet viru kéimen. Den Nohaltegkeetsministère kann elo nach méi detailléiert Analyse froen.

Wéi vill Drénkwaasser gëtt gebraucht?

Méi problematesch wier d'Fro vum Waasserverbrauch. Do géif een zesumme mat Google no enger technescher Léisung siche fir esou mann wéi méiglech, respektiv iwwerhaapt keen Drénkwaasser fir d'Kille vun de Serveren ze benotzen. D'Zesummenaarbecht mat Google wier awer net schwiereg.

Genee Informatiounen, wéi vill Waasser Google effektiv brauch, hätt hien net. Hien hätt awer d'Impressioun, datt jiddwereen dorunner interesséiert wier sécherzestellen, datt d'Ëmwelt esou mann wéi méiglech, respektiv iwwerhaapt net leit.

Google huet nach keng Decisioun geholl

De Jos Schummer sot, et kéint een net duerch eng Gesellschaft "e ganzt Land brooch leeë mam Drénkwaasser". Drénkwaasser wier nämlech "dat Kostbarst", wat een am Land hätt. D'Decisioun, ob de Google-Datenzenter effektiv gebaut gëtt, wier awer nach net gefall, esou de Jos Schummer. Hien hofft awer, datt am Hierscht éischt Detailer vum Projet kéinte presentéiert ginn.


D'Pia Oppel am Gespréich mam Jos Schummer:

Lauschteren

Méi zum Thema

google.jpg
Digital Ekonomie

D'Pläng fir en Datacenter vu Google an der Gemeng Biissen wäerte sech 2018 konkretiséieren. Enger gutt informéierter Source no ass déi prinzipiell Decisioun fir de Bau vun engem Datacenter gefall.

Net verpassen

  • Dëse Sonndeg um 11:00 LIVE aus der Congresshalle zu Saarbrécken

    DRP

    Eng Symphonie mat Piano - Esou gëtt dacks dem Johannes Brahms säin zweete Pianosconcerto beschriwwen. De russesche Pianist Nicolai Lugansky spillt dëst Wierk an där nächster Matinée vun der Deutschen Radio Philharmonie Saarbrücken Kaiserslautern, déi de radio 100,7 zesummen mat SR2 KulturRadio e Sonndeg, 15. Dezember 2019, vun 11.00 Auer u live aus der Congresshalle zu Saarbrécken iwwerdréit.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen