Cyber-Sécherheet Wann de Frigo zur kritescher Infrastruktur gehéiert

Eng Cyber-Attack huet leschte Weekend an Däitschland derzou gefouert, datt 900.000 Internet-Router net méi funktionéiert hunn. Den Incident huet op en Neits gewisen, datt d'Digitaliséierung och Sécherheetsrisike mat sech bréngt. Een Thema, dat an der Rifkin-Etude iwwer déi drëtt industriell Revolutioun zu Lëtzebuerg erstaunlech wéineg zur Sprooch kënnt.

Pia Oppel

Hacker
(© Bigstock)

Den US-amerikaneschen Auteur Jeremy Rifkin proposéiert a senger Etude d'Schafe vun engem Kommunikatiouns-Internet, engem Energie-Internet, an engem automatiséierten Transport- a Logistik-Internet. D'Konvergenz vun dësen dräi Reseauen, heescht et, wier de Kär vun der "Internet vun de Saachen"-Plattform, fir de Management, d'Undreiwen, an den Transport vu Gidder a Passagéier an enger Ekonomie vun der drëtter industrieller Revolutioun:

"The convergence of these three Internets comprise the kernel of the Internet of Things platform for managing, powering, and transporting goods and passengers in a Third Industrial Revolution economy"

Connectéiert Geméis an Uebst

Wat heescht dat konkret? Méiglechst vill Géigestänn solle connectéiert ginn, fir Informatiounen matenaner auszetauschen an esou méi effizient a méi intelligent ze ginn. De Wirtschaftsminister Etienne Schneider hat am Juni zum Aféiere vun intelligente Stroumcompteuren dëst Beispill genannt: Ee connectéierten Tiefkühler kéint da wëssen, datt en d'Killphas besser baussent de Spëtzenzäiten declenchéiert. Dat ass méi effizient an et kann ee Sue spueren.

Masse vu weidere Beispiller fënnt een an der Rifkin-Etude. Do geet souguer Rieds vu Sensoren, déi beim Transport vu Geméis an Uebst moossen, ob d'Wuer nach frësch ass a wéi wäit fort se nach kann transportéiert ginn.

Mee wa vum Auto bis zur Atomzentral alles mat engem Reseau connectéiert ass, wiisst natierlech de Sécherheetsrisiko. Da bedeit eng Hacker-Attack eventuell net méi just, datt d'Leit ee puer Stonne keen Accès zu Youtube hunn. Mee da si séier och kritesch Infrastrukture betraff, déi eng ganz Ekonomie zum Erleie brénge kënnen.

Exzellenz-Zentrum fir Datesécherheet

An der Rifkin-Etude fënnt een zu deem Thema vill Pisten awer wéineg Konkretes. Entreprisë sollte sech d'Fro stellen, wéi se a Cyber-Sécherheet mussen investéieren. Den Austausch vun Informatiounen iwwer Cyber-Attacke sollt tëscht Privat-Acteuren an dem Staat verbessert ginn.

A Lëtzebuerg kéint sech als Standuert positionéieren, fir Léisungen am Beräich Cyber-Sécherheet z'erfuerschen, z'entwéckelen an ze vermaarten. Zum Beispill duerch d'Schafe vun engem Exzellenz-Zentrum fir Datesécherheet, a vun engem speziellen Investmentfong.

Pionéiergeescht?

Dem Jeremy Rifkin no, soll Lëtzebuerg als Virreider d'Méiglechkeeten vun enger kompletter Digitaliséierung vun der Ekonomie testen. Fir datt dat net de Risiko vun engem digitale Super-GAU mat sech bréngt, misst d'Regierung bereet sinn, déi Thematik méi konkret unzegoen, wéi dat an der Etude de Fall ass. A si misst enorm finanziell Mëttel an d'Cybersécherheet investéieren.

Ob ee Land an deem nach viru Kuerzem Passwierder vu staatlechen Datebanken op PC-Ecrane gepescht gouf, d'Viraussetzungen erfëllt, fir an dësem Beräich Pionéieraarbecht ze leeschten, ass eng Fro.

Internet-Euphorie hannerfroen

Méi prinzipiell misst doriwwer diskutéiert ginn, ob d'Connectioun vun allem mat allem wierklech sou vill Virdeeler mat sech bréngt, datt et sech an all Fall lount an eng sophistiquéiert Infrastruktur fir d'Datesécherheet z'investéieren.

Den Internet-Theoretiker Evgeny Morozov schwätzt vu "Solutionismus", wann ee fir falsch definéiert Problemer, ëmmer den Internet als eenzeg Léisung proposéiert. Well géint de Stau hëllefen net onbedéngt Autoen, déi dank dem Transport-Internet ouni Chauffer kënne fueren ...

An der Mediathéik:

Wirtschaftschronik / / Pia Oppel
Lauschteren

Méi zum Thema

Laurent Moyse Meenung
Wuesstem

D'Rifkin-Etude ass guer net esou innovativ wéi et op den éischte Bléck schéngt a Villes gouf schonn thematiséiert. War et néideg, e bekannten Ekonomist deier ze bezuelen, freet de Laurent Moyse.

Nico Clement - Claude Wiseler - Michel Wurth
Wuesstem

Bei der Ëmstellung vun der Lëtzebuerger Wirtschaft op déi digital Welt soll och déi sozial Dimensioun respektéiert ginn. Doriwwer si sech OGBL, CSV a Chambre de Commerce eens.

Rifkin
Wuesstem

Wéi kann déi Drëtt Industriell Revolutioun zu Lëtzebuerg erreecht ginn? Dorëm geet et an der strategescher Etude vum Jeremy Rifkin, déi kierzlech presentéiert gouf. Wéi d'Iddien ëmsetzen?

cybersecurity dossier.JPG
Dateschutz

Mat der Digitaliséierung ginn d'Cyberattacke konstant an d'Luucht. Wéi positionéiert Lëtzebuerg sech am Beräich Internetsécherheet, wie sinn déi Kriminell a wéi kann ee sech schützen?

Smart Home Control
Energie an Dateschutz

Bannent deenen nächste véier Joer gëtt de Verbrauch vu Stroum a Gas mat intelligente Compteure gesammelt. Mee wat genee geschitt mat den Donnéen? A wéi sécher si se virun Zougrëff vun Drëtten?

 

Net verpassen

Programm

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen