De Jerzy Skolimowski gouf dëst Joer um Film Festival zu Venedeg mam Gëllene Léif fir säi Liewenswierk ausgezeechent. Den 78 Joer ale polnesche Moler, Schauspiller a Regisseur ass duerch Filmer wéi "Deep End" oder "Four Nights with Anna" bekannt ginn. Hie gehéiert zum sougenannten "Drëtte Polnesche Kino" - dat si Jonk Artisten, déi nom Krich opgewuess sinn an déi déi kommunistesch Gesellschaft a Fro gestalt hunn. De Jerzy Skolimowski huet sech fir ee méi perséinleche Kino engagéiert an hien huet ënnert anerem mat sengem Compatriot Roman Polanski zesummegeschafft.
Fir säin neie Film "11 Minutes" huet de Jerzy Skolimowski sech sreng Ziler gesat. De ganze Film spillt sech an engem Mëtteg, zu Warschau, tëscht fënnef Auer an eelef Minutten op 5 of. De Realisateur huet sech ee populäre Film-Genre ugëeegent: Dee vu Mini-Geschichten an deenen d'Liewe vu verschidde Mënschen sech kräizen. Filmer wéi dem Paul Haggis säi "Crash" oder dem Alejandro Gonzalez Inarritu säi "Babel" si klassesch Beispiller.
De Jerzy Skolimowski dréit dëse Genre awer op d’Kopp. Am "11 Minutes" presentéiert hie keng Personnagen, déi duerch hier Problemer matenee verbonne sinn. Hien ënnersträicht wéi si vun enee getrennt sinn obwuel si sech iwwert de Wee lafen.
Eng Welt voller den Zoufall
Am Film begéint den Zuschauer engem Hot-Dog Verkeefer mat enger donkeler Vergaangenheet. Engem jalouse Mann. Deem senger attraktiver Fra, déi vun engem onmoralesche Produzent ausgefrot gëtt. Engem nervösen Drogeverkeefer, deen op sengem Motorrad duerch d’Stroosse vu Warschau düüst. An nach villen anere Personnagen. Si liewen an enger Welt an där näischt sécher ass. An där den Zoufall iwwerhand huet.
Dem Skolimowski seng Technik ass impressionnant. Déi verschidden Narrative gi spilleresch a fléissend aneneen iwwer. Repetitiv Elementer wéi ee Fliger deen iwwert d’Stad flitt, erlaben et dem Zuschauer, déi divers Geschichten zäitlech ze placéieren. Laangwiereg ass de Film net. Déi nervös Musek a Klanggestaltung ënnersträichen de Chaos, dee sech lues a lues opbaut. Déi hektesch Kameraféierung hält d’Tensioun op engem Maximum.
Plaz fir Interpretatioun
Den "11 Minutes’" ass ee Film vun engem ale Mann, en ass dofir awer net verstëbst. De Film léisst bewosst genuch Plaz fir Interpretatioun, déi vum explosive Schluss ofhängt."11 Minutes" kann een als Kritik vun de modernen Technologië gesinn. De Film spiggelt de Chaos erëm, deen duerch déi wuessend Präsenz vun den digitale Kamerae kreéiert gëtt. An e weist, wéi schlussendlech d’Bild d’Wourecht awer net festhale kann. Et ass en ergräifende Film, deen engem net esou schnell aus dem Kapp geet.
"Eleven Minutes" ass den 13. Oktober am Kader vum CinEast Festival gelaf a gëtt de Méindeg 17. Oktober nach emol gewisen.