Literatur CNL: Liesrees uechtert d'Land

Wann d'Leit net kënne bei d'Bicher kommen, da ginn d'Bicher bei d'Leit, ongeféier esou kann een déi nei Initiativ vum Mierscher Literaturzenter beschreiwen. Si schécken an Zesummenaarbecht mat der Federatioun vun de Lëtzebuerger Bicherediteure ronn 25 Lëtzebuerger Autorinnen an Auteuren op d'Rees duerch d'Land, wou déi dann an den diverse Kulturhaiser hir nei Publikatioune mat Liesunge virstellen.

Valerija Berdi / tt

CNL Liesrees
Foto: CNL

"Et muss ee wierklech soen, e literarescht Joer, wou et keng Walfer Bicherdeeg gëtt, e schwieregt Joer ass fir d'Editeuren an och fir d'Auteuren, fir un hire Public ze kommen. An doduerch war et néideg och déi Bicher an d'Vitrinn ze stellen, déi an de leschte Méint erauskomm sinn"

esou d'Nathalie Jacoby, Directrice vum Mierscher Literaturarchiv. D'Walfer Bicherdeeg maachen laut der Federatioun vun de Lëtzebuerger Bicherediteuren en Joresëmsaz vu 25 Prozent aus, dee bekannterweis d'lescht Joer ausgefall ass.

Ee Konzept mat Zukunft

D'Federatioun vun den Bicherediteuren huet sech dono un d'Kulturhaiser an och un de CNL adresséiert, fir Liesungen uechtert d'Land ze organiséieren:

"Mir sinn un der Quell a mir sinn an der Situatioun, wou mir als Haus, doduerch, datt mir just e klenge Sall hunn fir Manifestatiounen, näischt bei eis konnte maachen. Et ass esou schéin, wéi positiv an iwwerwältegend direkt d'Äntwert vun de Kulturhaiser war, déi direkt wollte matmaachen, déi och direkt bereet waren, eis d'Organisatioun ze iwwerloossen a gläichzäiteg hire Know-how ze Verfügung ze stellen, esou, datt mer elo richteg op eng Rees praktesch duerch d'ganzt Land ginn."

Duerch d'ganzt Land, dat heescht vun Diddeleng bis op Maarnech kann een an den diverse Kulturhaiser tëschent dem 4. Mee an dem 4. Juli der aktuellster Lëtzebuerger Literatur begéinen. Wéi d'Theateren et scho virgemaach haten, stellen déi grouss Haiser hire Raum de Produktioune vu méi klengen Haiser zur Verfügung.

D'Bicherediteuren hu fir d'Liesungen hir Autorinnen an Auteure proposéiert. Et sinn ëmmer zwee bis dräi Schrëftstellerinnen a Schrëftsteller, déi zesumme liesen an d'Liesunge sinn och thematesch zesummegestallt. "Sprooch ass méi wéi Wierder..." ass den Titel vun der Liesung an dem Gespréich mat der Ulrike Bail, dem Tom Hengen an dem Lambert Schlechter am Iechternacher Trifolion, "Le trésor ambulant" heescht de Liesowend mat der Anja Di Bartolomeo, dem Tom Reisen a Robert Schofield an der Escher Kulturfabrik.

D'CNL-Liesrees ass eng Initiativ, déi sech net misst op dës restriktiv Zäite beschränke fënnt d'Nathalie Jacoby:

"Et war vill Freed fir dat ze plangen, datt ech denken, mir wëllen dat weider maachen. (...) Wat mir virschwieft ass nach eng Kéier eng Liesrees duerch d'Kulturhaiser duerch d'Land an dat a Kombinatioun mam Summerdag vun der Literatur bei eis am CNL."

An der Mediathéik:

Kultur / / Valerija Berdi
Lauschteren

Méi zum Thema

Claude Mangen
Riicht Eraus

Mam Direkter vum Mierscher Kulturhaus a President vun der Theaterfederatioun geheie mere Bléck an d'Vergaangenheet an d'Zukunft vum Kultursecteur zu Lëtzebuerg. Moderatioun: Valerija Berdi.

Nathalie Jacoby
Nei Direktesch vum nationale Literatur-Zenter

D'Promotioun vun der Lëtzebuerger Literatur - besonnesch den Aspekt vun hirer Villsproochegkeet - ass ee Punkt, deen der neier Directrice vum nationale Literatur-Zenter (CNL) zu Miersch besonnesch um Häerz läit, sou d'Nathalie Jacoby.

Net verpassen

  • 17.10. De Gudden Toun

    De Gudden Toun.jpg

    Wann d'Deeg méi kal, gro a kuerz ginn, stécht deen een oder anere vläicht de Kapp nees méi an déi sozial Medien. An der Oktober Editioun schwätzen de Roland Meyer, Ian De Toffoli, Raoul Biltgen, Jeff Schinker an d'Anne Klein.

Programm

Dossieren

  • CinÉast 2021

    Et ass déi véierzéngt Editioun vum CinÉast Filmfestival. Vum 7. bis de 24. Oktober ginn Featuren a Kuerzfilmer aus Länner aus Mëttel- an Osteuropa gewisen. Siwe Filmer sinn an der Kompetitioun.

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen