Festival-Kultur E klengt Land mat ville Bühnen

De Rock-A-Field war dës Joer bal kuerzfristeg annuléiert ginn. An 2017 kann een nees mat engem Food For Your Senses rechnen. Dat gouf ee bei enger Diskussioun iwwer Festivalkultur zu Lëtzebeurg gewuer.

Yves Stephany

Musekfans um RAF
Musekfans um Rock-A-Field (© Tim Lecomte)

"Mir sinn extrem verwinnt zu Lëtzebuerg mat Eventer." Dat sot de Sam Reinard vum Rocklab. Bei enger Table Ronde iwwer Festival-Kultur am Grand-Duché gouf kritiséiert, dass d'Koordinatioun vun deene ville Manifestatioune komplizéiert wär. De Site Plurio.net, op deem Organisateuren aus der Groussregioun hir kulturell Manifestatioune kënnen androen, wär immens schwéier ze benotzen. E gemeinsame Kalenner kéint net funktionéieren, genee wéi d'Billetterie Centrale, sou de Laurent Loschetter vum Atelier: "Alles wat de Staat probéiert vun uewen erof z'organiséieren, wou dann och fënnef Staatsbeamten dofir responsabel sinn, dat wäert ni goen." D'Kulturzeen géif ënnert sech eens ginn.

De Maart zu Lëtzebuerg wär limitéiert, sou de Laurent Loschetter. Och wann ee ganz grouss Nimm géif buchen, kéim ëmmer just eng gewëssen Zuel vu Leit, sou de Laurent Loschetter. "Dat ass well mir ëmzéngelt si vu grousse Festivalen."

Prime-Time fir Lëtzebuerger Museker?

Fir Lëtzebuerger Gruppen zu enger gudder Auerzäit um Rock-A-Field spillen ze loossen, misst ee kämpfen. Etabléierten Artiste wéilten och zur Prime-Time optrieden. Den Organisateur gesäit et als "Coup de pouce", fir vereenzelte Lëtzebuerger Gruppe virun ee volle Site ze stellen.

"Mir si géint eng positiv Diskriminéierung," sot de Luka Heindrichs. D'Land wär ebe kleng, an net jidderee kéint um 11 Auer spillen. Den Organisateur vum Food For Your Senses fënnt, datt d'Gruppe vu Lëtzebuerg dat als Motivatioun sollte gesinn, fir besser ze ginn.

Problemer mam Site

De Food for Your Senses war 2015 an 2016 ausgefall, well d'Organisateure keen adaptéierte Site fonnt haten. De Problem wär awer ni bei de Gemenge gewiescht, sou de Luka Heindrichs. Et hätt ëmmer un environnementelle Contrainten oder Buedemkontaminatioune geleeën.

D'Asbl géif weider no engem Terrain sichen. De Luka Heindrichs ass zouversiichtlech, datt et 2017 nees ee "Food" wäert ginn: "Ech mengen, datt mir dat packen. An datt déi zwee Joer Paus eng gutt Saach waren, fir eis ze rezentréieren." De positiven Effekt wär och, datt d'Manifestatioun wéinst der Annulatioun vill an de Medie gewiescht wär. Bei der Sich no Sponsore kéint déi Bekanntheet elo hëllefen, sou de Luka Heindrichs.

Public Forum am Gudde Wëllen (Foto ©Forum)

Och de Rock-A-Field hat dëst Joer Problemer mam Site. De Commodo/Incommodo wär net acceptéiert ginn, well um Terrain zu Réiser guer kee Festival dierft organiséiert ginn, sou de Laurent Loschetter: "No zéng Joer ass iergend een Tëntepisser vum MDDI, deen dat erausfonnt huet." De Buergermeeschter vu Réiser wär schlussendlech beim Ministère intervenéiert, fir datt de gréissten Open-Air Festival vu Lëtzebuerg kéint iwwer d'Bühn goen.

Journalismus oder PR?

Och iwwer d'Roll vun der Press gouf diskutéiert. "Ech mengen net, datt si do si fir Promotioun ze maachen", sot de Sam Reinard. Et wär wichteg, datt Kulturjournaliste géife Positioun bezéien, an och mat Lëtzebuerger Museker kritesch wären.

Den Atelier géif mierken, datt d'Press extrem u Pouvoir verluer hätt. "Si si guer net méi Trendsetter", sou de Laurent Loschetter. D'Leit géife sech iwwer aner Weeër iwwer déi kulturell Offer informéieren. Allgemeng gouf et de Wonsch no onofhängege Fanzinen oder Bloggen. Duerch Initiative wéi De Bloe Baaschtert oder Disagreement wär d'Zeen iwwerhaapt mol un d'Rulle komm, huet de Marc Scheer vu Cooperations ënnerstrach.

D'Gespréichsronn "Festivalszene in Luxemburg - Kampf oder Kooperation" gouf vun der Zäitschrëft Forum organiséiert.


Audio: Déi integral Opnam vun der Table Ronde
​​

Um Gespréich bedeelegt waren:

Méi zum Thema

Cyclorama
Radioen

Komponiste kloen, et géif net genuch Lëtzebuerger Musek op de Lëtzebuerger Radioe gespillt ginn. De Prozentsaz ass effektiv niddereg. Dofir sinn zum Deel awer d'Kënschtler selwer responsabel.

ffys2.jpg
Festivalsaison 2016

D'Sich no engem adequaten Terrain ass nach net ofgeschloss: dofir fällt och dëst Joer de Festival Food For Your Senses aus. D'Organisateure maachen awer kengem ee Virworf.

Programm

Dossieren

  • 76. Filmfestival zu Venedeg

    Zu Venedeg ass déi 76. Editioun vum Filmfestival. Den Tom Dockal ass fir de radio 100,7 op der Plaz. All Dag pickt hie sech ee Film eraus, fir deen da méi genee ënner d'Lupp ze huelen.

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen