De Mudam hat den Artisten en Atelier zur Verfügung gestallt, fir datt se mat hirer Aarbecht net ze vill Retard kréien. Donieft si se d'Ëmgéigend kucke gaangen. Do wieren hinne wichteg Saachen opgefall, wéi déi ënnerschiddlech Formen an Ëmrësser.
Déi ausgebilt Molerin Mary Reid an de Fotograf a Videast Patrick Kelley hu sech komplett positiv iwwert de Chantier Stad Lëtzebuerg ausgeschwat. Dat géif de Glawen an e liewegen Espace public demonstréieren. An Amerika wier dat den Ament éischter eng Raritéit, sou déi zwee Kënschtler. Obwuel vill Leit hinne recommandéiert hu Paräis oder Bréissel ze besichen, hunn se Tréier, Iechternach an d'Stad erausgesicht. D'Stad Lëtzebuerg wier total interessant an eenzegaarteg an hirer Physikalitéit.
Fusioun vun Drama, modern Literatur a Popkultur
Béid Kënschtler produzéieren an hirem Studio schwaarz-wäiss Animatiounsvideoen. Si verbanne verschidde Genren, wéi de klasseschen Drama, modern Literatur an zäitgenëssesch Popkultur. D'Resultat erënnert iergendwéi un d'Fréizäit vum beweegte Bild. D'Mary Reid schreift Texter an iwwerhëlt sämtlech Rolle mat den adequate Kostümer an dem Maquillage. D'Figure si bizar bis onheemlech. Verschiddener hunn eppes vun opblosbare Poppen aus dem Sexshop.
Am Video "The Syphilis of Sisyphus" geet et zum Beispill ëm eng schwanger Paräisser Fra aus dem 19. Joerhonnert, deemno d'Zäit vun der Bohème. Dat Ganzt ass och als Charles-Baudelaire-Parodie geduecht. D'Mary Reid ass e grousse Fan vu Baudelaire, wann et ëm seng Literatur a seng Analyse geet. D'Kënschtlerin huet awer kee Versteesdemech fir Aussoen ewéi "De Cauchemar wier et eng Fra ze sinn, zemools eng schwanger". Fraen, also déi Kéier anonym Sexaarbechterinnen, spillen och d'Haaptrollen a Filmer zum Thema éischte Weltkrich.
Fuerschung iwwert éischte Weltkrisch
D'Mary Reid Kelley ass eng passionéiert Fuerscherin. Si ass während hire Yale-Konschtstudien op den éischte Weltkrich gestouss. Do gouf u 44 Studente vu Yale erënnert déi als Zaldoten an Europa leie bliwwe sinn. Doropshin hunn d'Mary an de Patrick Kelley all Zaldotekierfechter an Europa besicht. Si hunn alles driwwer gelies mat der Iddi, den Texter Liewen anzehauchen.
"Ech hu mech gefrot, wéi een eng Connectioun zu Mënschen opbaut, déi scho laang dout sinn. Geet dat eleng doduerch datt een hir Griewer besicht? Datt een do en Text, vun hinnen oder iwwert si, haart virliest? "
Zaldotekierfechter kucken ze goe wier absolut keng verlueren Zäit, seet d'Mary Reid. Déi wieren esou gigantesch, datt een eng Iddi vu Mass, Gewulls, vum Obszöne géif kréien, awer och vum Verloscht vum Liewen an der ganzer Tragedie. D'Literatur wier awer dat eenzegt Mëttel fir d'Gefillswelt vun enger eenzeger Persoun ze penetréieren a fir säi perséinlechen Drama ze verstoen.
Präis fir "This is offal" - "Dëst ass Offall"
Op der renomméierter Konschtfoire Art Basel selektionéiert d'Bâloise all Joers Kënschtler fir de Bâloise Art Prize. Déi Kéier goung dee Präis un d'Mary Reid an un de Patrick Kelley fir hiert Wierk "This Is Offal", dëst ass Offall. D'Video erzielt d'Geschicht vum Dokter deen an der Pathologie d'Läich vun enger Fra preparéiert, déi sech suicidéiert huet. Iwwerdeems streiden hier Organer iwwer Sënn an Zweck vu Liewen an Doud. Dernieft geet et ëm Camus, déi schéin, roueg, doud Fra als éiwegt Thema a Konscht a Wëssenschaft. Och dëse Film ass den Ament am Mudam ze gesinn an e wäert och an der Kollektioun bleiwen: D'Versécherung huet dem Pei-Musée en Don gemaach.