Literaturpräis vun der Europäescher Unioun "In the Shadow of Rooster Hill" - eng Rees op d'Riga vun 1905

Den Osvalds Zebris gräift a sengem Wierk d'Russesch Revolutioun vu 1905 op. De Protagonist ass e lettesche Schoulmeeschter. Ronn Dausend sinn deemools bestrooft ginn, well si géint de russesche Regime waren.

Nathalie Bender / fk

Osvalds Zebris
(Foto: Foto: Kristaps Kalns)

Dem Osvalds Zebris säi Roman, deen an der englescher Iwwersetzung den Titel "In the Shadow of Rooster Hill" huet, gouf dëst Joer mam Literaturpräis vun der Europäescher Unioun ausgezeechent. D'Wierk ass am Kader vum Projet "We. Latvia. The 20th Century" zustane komm. Et ass Deel vun enger ganzer Serie vu Bicher iwwert d'Geschicht vum 20. Joerhonnert an de baltesche Länner an a Lettland.

2018 feiert Lettland nämlech de Centenaire vun senger Onofhängegkeet. Bis 1918 war den Territoire vum russeschen Zare-Regime an däitsch-baltesche Grondbesëtzer dominéiert.

Historesch Schlësselmomenter verschaffen

Eng bekannt lettesch Schrëftstellerinnen, d'Gundega Repse, hätt viru véier Joer d'Iddi gehat, all d'Schlësselmomenter vun der lettescher Geschicht am 20. Joerhonnert an enger Serie vu Romaner ze verschaffen. Eenzeg Konditioun, fir an dëser Serie publizéiert ze gi war, datt d'Buch ee vun dëse Momenter misst opgräifen. De letteschen Auteur Osvalds Zebris ass deen Éischten, dee säi Buch an dëser Rei publizéiert huet. Hie war domat och fir den "Latvian Literature Award" nominéiert. Vun den dräizéng Auteuren, déi zougesot hätten, wieren der zéng scho publizéiert, seet den Osvalds Zebris. Dräi kéimen der nach eraus.

Wéi den Auteur d'Geschicht soll opgräifen, ass net definéiert. Et wieren allerdéngs keng historesch Bicher, seet den Osvalds Zebris. Et kéint zum Beispill e Spionage Roman oder eng Libesgeschicht sinn.

Synopsis

Dem Osvalds Zebris säi Roman fänkt ee Joer nom Ufank vun de revolutionäre Beweegunge vun 1905 a Russland un. Eng 1000 lettesch Schoulmeeschtere wieren deemools gestrooft ginn, well si géint de Regime waren, seet den Auteur.

"Den Haaptpersonnage am Roman war och Schoulmeeschter. D'Geschicht dréit engersäits ronderëm déi moralesch Choixe vun dësem Mann während der Revolutiounszäit. An anerersäits ëm d'Bestriewunge vun enger Natioun, fir fräi ze ginn."

Um Schluss kidnappt de Protagonist dräi Kanner, well hie virdrun, ouni et ze wëllen, e Kand blesséiert hat. A senger Virstellung wëll hien dat erëm guttmaachen, andeems hien deenen dräi eng Iwwerraschung fir Chrëschtdag mécht. De Schoulmeeschter, deen der Revolutioun net gewuess ass, probéiert seng Scholdgefiller quasi ofzebezuelen.

Lettesch Schoulmeeschter goufe bestrooft

1906 huet den Zar ugefaangen déi Revolutionär ze bestrofen, seet den Osvalds Zebris. A sengem Roman géifen d'Schoumeeschter stellvertriedend dofir stoen.

"Mir waren eng ganz jonk Natioun an hunn eis esou just eis Onofhängegkeet kënne virstellen. Schoulmeeschtere spillen a sou Situatiounen eng grouss Roll, wat den Opbau vun engem Eenheetsgefill vun enger Natioun ugeet. Fir Lettland ass et schwéier an d'Gewiicht gefall, datt ronn dausend Enseignanten esou gestrooft goufen."

D'Majoritéit vun de Kanner goufen deemools vu russesche Schoulmeeschteren op Russesch enseignéiert. Awer et gouf eben och lettescht Léierpersonal, dat déi verschidde Fächer op Lettesch gehalen huet. Si si vum Regime an direkt Verbindung mat de revolutionären Iddie gesat an dofir bestrooft ginn.

D'Literatur vu klenge Länner an d'Welt erausdroen

Den Osvalds Zebris begréisst, datt een als Gewënner vum Literaturpräis vun der Europäescher Unioun Visibilitéit iwwert d'Grenzen eraus géif kréien. "Dat ass kruzial, besonnesch fir kleng Sproochen a kleng Länner. Fir datt d'Literatur vu klenge Länner iwwerlieft ass et wichteg, datt si iwwert de Wee vun Iwwersetzungen op grouss Marchéë ka kommen."

An der Mediathéik:

Kultur / / Nathalie Bender
Lauschteren

Méi zum Thema

barnes valerija.JPG Tipp
Buchtipp fir de Summer

De russesche Komponist Dmitri Schostakowitsch an d'Willkür vun der Muecht. Dem englesche Schrëftsteller Julian Barnes ass mat sengem Roman "Der Lärm der Zeit" ee Meeschterwierk gelongen.

Petrescu Tipp
Buch-Tipp fir de Summer

"Déi erfrëschendst an déi ironeschst Stëmm aus der aktueller russeschsproocheger Literatur," seet den Andreï Kurkov iwwer de Vladimir Lortchenkov. Do kann een dem ukraineschen Auteur nëmmen zoustëmmen.

Programm

Dossieren

  • CinÉast 2017

    Schonn déi zéngten Editioun vum Lëtzebuerger Filmfestival, deen e breede Panorama vum "Art et essai"-Kino aus Mëttel- an Osteuropa bitt. Eng 100 Projektioune vu Wierker aus 19 europäesche Länner.

  • Gemengewahlen 2017

    Den 8. Oktober kënnen d'Bierger aus de 105 Gemengen am Land hir lokal Vertrieder nei bestëmmen.

Communiquéen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen