Eis Selektioun fir d'Feierdeeg 10 besënnlech Wierker fir Chrëschtdag

Gutt Iessen, e Chrëschtbeemchen a Cadeaue gehéieren einfach dozou. Mä wat wier Chrëschtdag ouni déi passend Musek? Hei sinn zéng klassesch Stécker, fir an déi richteg Stëmmung ze kommen.

Luc Boentges

10 Wierker fir Chrëschtdag

1. Franz Liszt: De Chrëschtbeemchen

Neen, dëst ass keng musikalesch Vertounung vun engem Chrëschtbeemchen, och wann dat sech bestëmmt interessant unhéiere géif. Et ass e Cadeau fir ënnert de Chrëschtbeemchen. De Franz Liszt huet dës Suite fir seng Enkelin geschriwwen an hir déi zwielef kleng Stécker Chrëschtdag virgespillt.


2. Johann Sebastian Bach: Chrëschtoratorium

Genee esou wéineg wéi e Chrëschtbeemchen an der Stuff, däerf op dëser Lëscht de Chrëschtoratorium vum Johann Sebastian Bach net feelen. A sechs Deeler verzielt hien d'Geschicht vu Chrëschtdag. De Bach feiert dëst Fest wuertwiertlech mat Pauken an Trompetten.


3. Ralph Vaughan Williams: Den éischte Chrëschtdag

Obwuel de Ralph Vaughan Williams en Agnostiker war huet hie sech - méi wéi aner gleeweg Komponisten - vun der Chrëschtdagsstëmmung verzaubere gelooss. Deementspriechend vill Stécker huet de Williams ronderëm dëst Fest geschriwwen. Dat schéinst dovunner ass wuel "The First Nowell".


4. Pjotr Iljitsch Tschaikowski: Den Nësskréckert

Dat klengt Clara kritt fir Hellegowend e schéinen, faarwegen Nësskréckert geschenkt. An der Nuecht dreemt d'Clara, datt den Nësskréckert lieweg wier a mat enger Arméi vu Spillzaldote géint de Mauskinnik Krich féiert. Nodeems d'Schluecht gewonnen ass, verwandelt sech den Nësskréckert an e Prënz a reest mam Clara an d'Land vun de Séissegkeeten, wou si der Zockerfee begéinen.


5. Gustav Holst: Chrëschtdag

Esou richteg a Chrëschtdagsstëmmung kennt ee mam "Christmas Day" vum Gustav Holst, enger Fantasie iwwer al englesch Lidder. Weltbekannt ass seng Vertounung vu "God rest you merry gentlemen" (vun der Minutt 1 un).


6. Hector Berlioz: L'enfance du Christ

Ganz besënnlech gëtt et am Hector Berlioz sengem Oratorium "L'enface du Christ". Am Mëttelpunkt vun dësem Wierk steet den "Adieu des bergers". An dëser Episode wënschen d'Hierten dem Jesus a senger Famill alles Guddes fir d'Zukunft.


7. Benjamin Britten: A Ceremony of Carols

Et mussen net ëmmer Pauken an Trompette sinn, fir Chrëschtdag ze feieren. Dem Benjamin Britten sinn e Chouer an eng Harf duer gaangen. D'Resultat ass zwar net esou bekannt wéi dem Bach säi Weihnachtsoratorium, et lount sech awer op alle Fall entdeckt ze ginn.


8. Wolfgang Amadeus Mozart: Et incarnatus est

Och wann de Wolfgang Amadeus Mozart seng grouss Mass an Do Mineur net direkt fir Chrëschtdag komponéiert huet, gëtt et awer ee Passage, deen ëmmer nees ëm dës Zäit ze héieren ass: Den Air "Et incarnatus est", wou et ëm d'Gebuert vum Jesus geet. Komponéiert huet de Mozart dësen Air fir seng Fra, d'Constanze Weber.


9. Johann Sebastian Bach: In dulci jubilo

E Stéck, dat a kengem Chouerrepertoire feelen däerf: "In dulci jubilo" vum Johann Sebastian Bach. Zemools an Däitschland héiert een dëse Choral ëmmer nees an der Chrëschtzäit, sief et an der Kierch oder um Chrëschtmaart. Datt dëst Stéck an England awer op d'mannst genee esou gutt gesonge gëtt wéi an Däitschland, beweisen d'King's Singers.


10. Francis Poulenc: Quatre motets pour le temps de Noël

Véier Motetten huet de Francis Poulenc fir d'Chrëschtzäit geschriwwen. Kombinéiert huet hien déi Joerhonnerten al Traditioun vun der Motett mat der Tounsprooch aus dem 20. Joerhonnert. Erauskomm si véier atmosphäresch kuerz Stécker, déi trotz hiren Dissonanzen immens harmonesch sinn.


Méi zum Thema

Ravel-Streckbréif
E Komponist am Profil

Ee vun deene weltbeschten Orchestrateuren, en international renomméierte Komponist, e Patriot am Éischte Weltkrich an e lidderege Student. Léiert de Maurice Ravel kennen. De Komponist vum Mount Dezember.

halloween playlist
Halloween

Halloween ass d'Nuecht vun den Doudegen, den Hexen an de Geeschter. Dir braucht eng passend Playlëscht mat klassesche Wierker? Hei sinn déi zéng grujelegst Stécker aus der Museksgeschicht.

Programm

Dossieren

  • Mënscherechter

    Den 10. Dezember 1948 sinn zu Paräis déi universell Mënscherechter deklaréiert ginn. Um 70. Joresdag vun dëser Deklaratioun steet de Programm vum radio 100,7 ganz am Zeeche vun de Mënscherechter.

  • Chamberwahlen 2018

    De 14. Oktober gëtt eng nei Chamber gewielt. De radio 100,7 bericht iwwer d'Kandidaten an d'Enjeue vun dëse Wahlen.

Communiquéen

  • Offre d'emploi: Directeur général (M/F)

    L'Etablissement de Radiodiffusion Socioculturelle, opérateur de la radio de service public radio 100,7, recherche un directeur général (m/f)

  • Communiqué du Conseil d’administration du 100,7

    Le Conseil a décidé de créer un comité de transition présidé par Mme Nancy Braun pour la période du 15/12/2018 jusqu'à l'entrée en fonction du nouveau Directeur (m/f). Mme Michèle Vallenthini est nommée suppléante.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen