Whitney - Forever Turned Around Balsam fir d'Séil

Eng nei Woch, an domadder och en neien Album vun der Woch. Déi Kéier eppes zimlech Ronnes, erausgepléckt vum Jamie Reinert. Leschte Freideg koum nämlech deen neie Whitney Album eraus, "Forever Turned Around".

Jamie Reinert / cbi

Whitney
Foto: Olivia Bee

Subtilitéit a Séisst stécht an hire Fangerspëtzen. Déi zwee Käpp vu Whitney - den Julien Ehrlich an de Max Kakacek, sinn 2016 um amerikaneschen Indie Circuit opgedaucht. Mat engem immens geschmeidegen an onschëllege Pop-Soul Sound.

Déi vill Concerten zanterhier, an déi ongewéinlech Existenz op Tournée, hunn déi zwee Nerds vu Chicago nach méi zesummegeschweesst. "Forever Turned Around" zelebréiert Frëndschaft an all hire Facetten. An d'Stécker sinn nawell häerzlech produzéiert.

Dem Julien Ehrlich seng Stëmm ass liicht a kloer. Seng fragil Melodië goufe wéi um Debut schuckeleg agepaakt an arrangéiert. Et wéilt ee bal feel good music soen, mee dat gëtt hirem Asaz op hirer zweeter Scheif net gerecht.

Emotional, mee ouni Pathos

Op "Forever Turned Around" héiert ee Musek, déi schmunzelen deet. Och wa se net frontal ass, geet se dofir de schlechte Gefiller awer net aus dem Wee. Häerzwéi an Einsamkeet gi mat Liichtegkeet vertount. Bléiser, déi defteg an eenheetlech spillen, d'Emotiounen opwullen, ouni dobäi pathetesch ze ginn. A Straicher, déi mat enger ähnlecher Sensibilitéit d'Musek ophiewen.

Um Opener "Giving Up" ëmwéckelt den onëmgängleche Wurlitzer dem Ehrlich säi Gesang. Dréchen akustesch Gittaren-Akkorde leeden déi séiss Ballade "Before I Know It". Et héiert ee vill holzeg a waarm Téin eraus. Aus der Bass-drum, dem dompege Bass, de verwässerte Keys. D'Resultat ass op alle Fall ënnerdriwwen a luet an.

Whitney ass och eng Band, déi vun engem Batteur, dee séngt, gefront gëtt. An den Julien Ehrlich gëtt dem Levon Helm an Dennis Wilson gerecht. Seng zeréckhalend Attitüd erméiglecht de villen anere Kläng sech ze entfalen.

Op "Forever Turned Around" krut d'Band Hëllef vu Produzente wéi den Jonathan Rado vu Foxygen oder de Brad Cook, dee vill mat Hiss Golden Messenger oder mam William Tyler zesummeschafft.

Schlussendlech ass Whitney awer erëm zeréck op Chicago gaangen. Hir Heemecht an do wou och hir éischt Plack entstanen ass. An de Sound ass deementspriechend familiär. 60s Soul, 70er Folk-Pop, an eng bescheiden Indie-Attitude sti weiderhin um Programm. Déi zwee Hären aus der lëfteger Stad hunn net enttäuscht. "Forever Turned Around" ass Balsam fir d'Séil.

An der Mediathéik:

Album vun der Woch / / Jamie Reinert
Lauschteren

Méi zum Thema

Joan Shelley
Joan Shelley - Like The River Loves The Sea

D'Singer-Songwriterin Joan Shelley ass fir hir siwent Plack "Like The River Loves The Sea" bis op déi magesch Insel Island gereest. D'Musek vun der Joan Shelley ass einfach, filigran a poetesch.

Marika Hackman
Marika Hackman - Any Human Friend

Den drëtten Album vun der britescher Singer-Songwriterin verbënnt Pop-Experimentation mat enger natierlech presentéierter Intimitéit. De Marc Clement presentéiert eisen Album vun der Woch.

Programm

  • Notturno

  • On air

    Notturno

  • Virum Dag

  • Moies-Magazin

  • Iwwer Mëtteg

Dossieren

  • 76. Filmfestival zu Venedeg

    Zu Venedeg ass déi 76. Editioun vum Filmfestival. Den Tom Dockal ass fir de radio 100,7 op der Plaz. All Dag pickt hie sech ee Film eraus, fir deen da méi genee ënner d'Lupp ze huelen.

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen