Ronettes D'Ronnie Spector ass dout

D'Ronnie Spector ass mat 78 Joer u Kriibs gestuerwen. Déi amerikanesch Sängerin war Ufanks de 60er Jore bekannt als Sängerin vum Trio The Ronettes - eng aflossräich Band fir d'Entwécklung vum moderne Pop. Den Yves Stephany mat engem Portrait.

Yves Stephany / dpa / cbi

Ronnie Spector
D'Ronnie Spector an de 70er Joren. Foto: picture alliance / Avalon/Retna | Michael Putland

"Ech hat hir Stëmm esou gär", schreift de Brian Wilson vun de Beach Boys op Twitter - et brécht mir d'Häerz. D'Beach Boys waren eng vun den éischte Bands, déi Ufanks de 60er direkt vum Sound vun de Ronettes beaflosst goufen.

Léif Melodien, léif Meedercher an eng phänomenal Produktioun, dat war d'Rezept fir de Succès vun de Ronettes. Enn de 50er Joren hat d'Ronnie mat hirer Schwëster Estelle an hirer Cousine Nedra Talley e Gesangstrio gegrënnt.

Sex als Selling Argument

De Produzent Phil Spector huet déi jonk Dammen entdeckt. Et war eng schwaarz Girl-Group, déi hei wäiss Popmusek interpretéiert huet. Mat déckem Make-Up, héich-toupéierten Hoer a kuerze Juppen hu si mam onschëllegen Optriede vun hire meeschte Kolleeginne kontrastéiert. Sex als Selling Argument am Pop war gebuer.

De Phil Spector huet déi gréissten Hits vun de Ronettes produzéiert. Op dësen Opnamen héiert ee fir d'éischte Kéier säi legendäre "Wall of Sound": seng Symphonie fir d'Rock n Roll Generatioun. Déck opgedroe Sträicher-Arrangementer, déi mam Hall vun Echo Chambers zousätzlech opgeblose goufen.

Vun 1968 u wat d'Ronnie Spector fir eng Rei Jore mam Phil Spector bestuet. 1990 huet si hir Memoire verëffentlecht - dora beschreift si e jalousen a gewalttätege Mann. Hien hätt si geschloen a mam Doud menacéiert.

De Produzent a verurteelte Mäerder Phil Spector war d'lescht Joer a Kalifornien am Prisong gestuerwen. De Phil Spector hat och mat bekannten Nimm wéi de Beatles, dem Elvis Presley oder der Tina Turner geschafft. 2009 war hien zu 19 Joer Prisong verurteelt ginn, well hien d'Actrice Lana Clarkson ëmbruecht hat.

An der Mediathéik:

Musek Aktuell / / Yves Stephany
Lauschteren

Méi zum Thema

Neil Young & Crazy Horse
Album vun der Woch

Véier eeler Häre ginn an eng Scheier aus dem 19. Joerhonnert fir en Album opzehuelen. D'Resultat ass en authentescht Stéck Musek, dat duerch säi réie Charme ze iwwerzeege weess.

Net verpassen

Programm

Dossieren

  • Kulturjoer Esch2022

    Esch, zesumme mat anere ProSud-Gemengen a franséische Grenzgemengen, ass 2022 europäesch Kulturhaaptstad. An eisem Dossier fannt Dir alles iwwer d'Hannergrënn an d'Projeten, déi fir d'Kulturjoer entstoe wäerten.

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen