Wagner-Festival De Gréngen Hiwwel als Sécherheetszon

D'Aktualitéit huet dëst Joer staark Repercussiounen op d'Bayreuther Festspiller. Déi nei "Parsifal"-Produktioun mat hirer reliounskritescher Interpretatioun hat scho laang virun der Ouverture vum Wagner-Festival fir Diskussioune gesuergt. No den Evenementer déi lescht Deeg zu München, Würzburg, Reutlingen an Ansbach gouf de Sécherheetsdispositif nach eemol verstäerkt.

Guy Engels / ys

Police zu Bayreuth
Poliziste virum Festspillhaus zu Bayreuth (Foto: picture alliance/Timm Schamberger)

Kee rouden Teppech fir d'Prominenz, keng Visite vun der Bundeskanzlerin Angela Merkel - den Optakt vun den 105. Bayreuther Festspiller e Méindeg war anescht ewéi gewinnt. D'Sécherheet stoung am Mëttelpunkt. D'Police ass ronderëm de legendäre Gréngen Hiwwel patrulléiert, d'Invitéë goufe grëndlech kontrolléiert, éier si an d'Festspillhaus hunn dierfen eran.

Trotz dem héijen Opwand u Personal a Material bleiwen awer nach genuch Lächer. Wie ka stänneg d'Bühnenentrée iwwerblécken, d'Gewulls vun de Mataarbechter, déi d'Kulissen, d'Requisiten an anert Geschir permanent eran- an eraustransportéieren?

D'Angela Merkel hat hir Präsenz allerdéngs scho viru Wochen ofgesot. De Grond ware Sécherheetsbedenken. Fir d'Ouverture vun de Festspiller 2016 stoung nämlech eng nei "Parsifal"-Inzenéierung vum Uwe-Eric Laufenberg um Programm, déi sech ganz speziell mat der reliéiser Dimensioun vum Wagner sengem "Bühnenweihfestspiel" ausenanersetzt. Reliounskritesch oder - nach méi geziilt - islamkritesch, dat war d'Fro, hannert där déi Responsabel och ee gewësse Risikofacteur gesinn hunn.

De Regisseur Uwe-Eric Laufenberg plädéiert um Enn fir méi Mënschlechkeet a manner Relioun - a kritt duerfir och vill Applaus.

Noutléisung als Glécksgrëff

Ee wesentlech méi grousse Risiko bei dësem "Parsifal" war den Dirigent Hartmut Haenchen. Den Haenchen ass wuel ee Wagner-Expert, huet awer d'lescht Woch kuerzfristeg misse fir den Andris Nelsons asprangen. Fir stante pede an enger fuschneier Produktioun den Orchester an d'Sänger ze dirigéieren, ass een Challenge, deen den Haenchen meeschterhaft bestanen huet.

Den Hartmut Haenchen dirigéiert "Parsifal" (Foto: Thomas Brill)

Den Andris Nelsons hat sech zeréckgezunn, well de musikaleschen Direkter vu Bayreuth, de Christian Thielemann him stänneg a seng Aarbecht drageschwat huet. Dee Réckzuch kéint elo ee grousse Problem fir Bayreuth ginn, well den Andris Nelsons 2020 eng nei "Ring"-Produktioun dirigéiere sollt. Schonn d'lescht Joer hat den Thielemann mam Kirill Petrenko, den Dirigent vum aktuelle Castorf-"Ring" ewechgemobbt.

Castorf-Ring am véierte Joer

Dem Frank Castorf seng nihilistesch, pessimistesch Lecture vum "Ring des Nibelungen" geet an hiert véiert Joer. Si gëtt vu villen Experten als déi bescht Ring-Produktioun zanter dem Patrice Chéreau senger Mise en scène vun 1976 consideréiert.

D'nächst Joer steet eng nei Produktioun vun "Die Meistersinger von Nürnberg" an d'Haus, mam Klaus Florian Vogt, deen aktuell als Parsifal grousse Succès huet. Fir 2018 ass d'Sopranistin Anna Netrebko ugekënnegt, déi hiren Debut zu Bayreuth als Elsa am "Lohengrin" soll maachen.


De Jean-Paul Bettendorf ass zu Bayreuth a mellt sech vum 25. bis den 29. Juli all Dag mat enger Korrespondenz am Kulturmagazin.

Bayreuth - 25.07.

Bayreuth - 26.07.


De Site vum Festival: http://www.bayreuther-festspiele.de/

Méi zum Thema

Gustavo Gimeno
Gustavo Gimeno

Zanter dem Hierscht 2015 steet de Gustavo Gimeno un der Spëtzt vum OPL. De Maestro kuckt zefridden op seng éischt Saison zréck an ass optimistesch, wat d’Entwécklung vum Orchester ugeet.

Lewon.jpg
International Classical Music Awards

De Marc Lewon krut bei den International Classical Music Awards de Präis fir déi beschten CD-Produktioun an der Kategorie "Early Music". Am Interview erkläert hien, wat him un där Musek gefällt.

Programm

Net verpassen

  • Offre d'emploi: 1 journaliste (m/f)

    Offre d'emploi: 1 journaliste (m/f)

    L'Etablissement de Radiodiffusion Socioculturelle, opérateur de la radio de service public radio 100,7, recrute, pour entrée immédiate ou à convenir, un(e) journaliste sous contrat à durée déterminée pour une durée de 12 mois et à plein temps.

Dossieren

  • Affär Traversini/Dieschbourg

    De Roberto Traversini ass als Buergermeeschter an Deputéierten zeréckgetrueden. Hannergrond sinn Autorisatioune fir d'Aarbechten un engem Gaardenhaischen an d'Fro, ob hie bevirdeelegt ginn ass.

  • CinÉast 2019

    Et ass déi zwieleften Editioun vum CinÉast Filmfestival. Vum 3. bis den 20. Oktober ginn iwwer 65 Featuren a 50 Kuerzfilmer aus 20 Länner aus Mëttel- an Osteuropa gewisen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen