Psychedelic Rock Den Danz um Vulkan

E psychedelesche Vulkan dee mysteschen an héich ästhetesche Sound späizt. "Volcano" ass den zweete Longplayer vun Temples. Trotz méi poppegen Arrangementer, bleiwen d'Brite sech selwer trei.

Philippe Hansen / ys

Temples.jpg
Temples

Dräi Joer nom Debut-Longplayer "Sun Structures" mellt de britesche Psych-Quartet Temples sech zeréck. Dobäi gëtt et keng Spuer vum "zweeten Album Syndrom". Ënnert dem Sänger, Gittarist a Bandleader James Edward Bagshaw sengem enorme Krauselkapp war keng Platz fir sech Gedanken iwwert en zouverlässegen an éierbaren zweeten Album ze maachen. D'Iddien hunn zwee Joër laang gekacht. An der Press ass scho méi laang iwwert en neien Album rumouert ginn. Virun e puer Wochen huet de de Vulkan endlech gespaut, an d'Fans ënnert musikalescher Lava verstengert.

"Volcano" ass eng reusséiert Weiderentwécklung vun enger Band, déi hirem ganz originellen Toun trei bleift. D'Temples goufen am Ufank vun hirer Carrière als Nofolger vun der Sixties-Boyband The Zombies betruecht, well hiren Track "Move With The Season" staark "Time Of The Season" vun 1968 erënnert huet. Op "Vocano" maache si eng Evolutioun a Richtung Pop, ouni de Kär vun der Substanz ze verléieren.

Trotz Bubblegum nach ëmmer authentesch

Typech fir d'Temples sinn dem James Bagshaw säi Falsetto-Gesang, dem Gittarist a Keyboarder Adam Smith seng eegenaarteg Pedal-Sounds, dem Drummer Samuel Toms säi rhythméierten Donner, an dat ganzt ënnermoolt an subtil arrangéiert vum Bassist Thomas Walmsley. Véier dënn androgin Bouwen mat gigantesche Coiffuren... an mystesch , héich-ästheteschem Sound an der Kopp. Kee kléngt wéi d’Temples!

De Video zu Certainty

Net vill aktuell Formatioune sinn esou authentesch wéi Temples. Misst ee si an en Tirang stiechen, léiche si niewent zäitgenëssesche Psych-Rock a -Pop-Genie wéi MGMT, Pond an Tame Impala. Den Opening Track "Certainty" iwwerrascht mat engem Touch Retro-Dysney-Sound mat däischtere Conotatiounen. Et gëtt direkt kloer a wéi eng Richtung d'Temples sech beweegen. Déi jonk Rockformatioun léisst en Touch Pop a Bubblegum mat afléissen. An dat passt ganz einfach. Si ginn net méi schlecht dovun, ganz am Contraire. Sëllechen aner Titelen ewéi "Born Into the Sunset" "(I Want to Be Your) Mirror" an "Open Air" spruddelen nëmmen esou vun neien Iddien am gewinnten Toun. Räich Transitiounen, elaboréiert Brécken, familiäre Sound an dem Bagshaw seng Lyrics hiewen de Fan no der éischter Ecoute vun der Stratosphär an d'Mesosphär.

Beat a Wuppes

Et ass ëmmer nees spannend wéi d'Temples bis bei deen ominéise Chorus kommen. Zum Beispill beim Titel "Open Air" wou een net weess ob een dem Gittarist a Keyboarder Adam Smith senger Gittar oder sengem Moog nolauschtert.

"Volcano" steet an der Traditioun vu britesche Bands déi Pop-technesch ënnert dem Radar fléien. Supergrass a Blur wiere gutt Beispiller. D'Temples sinn awer e gudde Schotz méi individuell a manner kommerziell. Den zweete Longplayer vun den Temples ass e virsiichteg opgebaute Sequel mat Beat a Wuppes, mat helle Stëmmen a psychedelescher Approche vu véier jonken, héichtalentéierten Handwierker.

An der Mediathéik:

Lauschteren

Méi zum Thema

Mac De Marco
Album vun der Woch

Dem Mac DeMarco säin drëtten Album begeeschtert duerch ee Sound, deen net stéiert, awer den Nerv vun der Zäit trëfft. En Album vun engem jonken alen Hues, deen d'Nolauschterer a seng Musek awéckelt.

Programm

Net verpassen

  • Offre d'emploi: Un(e) rédacteur(rice) web

    Webjournalist

    L'Etablissement Public de Radiodiffusion Socioculturelle recrute, pour entrée immédiate ou à convenir, Un(e) rédacteur(rice) web sous contrat à durée déterminée pour une durée de 12 mois et à temps plein.

Dossieren

  • #beethoven20

    De Jean Muller gëtt an 32 Episoden en déiwen Abléck an de Kosmos vum Ludwig van Beethoven senge Pianossonaten.

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen