Dem Claude Debussy seng zwee Zyklen "Images" gehéieren zu deene wichtegste Wierker vun der Pianosliteratur iwwerhaapt a ginn deemno och dacks gespillt an enregistréiert. Dat war fir d'Cathy Krier kee Grond, "Images" net och opzehuelen. D'Pianistin ass nämlech ëmmer drop aus, kohärent Programme fir hir Disken zesummenzestellen. Bei där neier Produktioun sinn "Images" vum Debussy a "Masques" vum Szymanowski déi perfekt Kombinatioun.
"Ech hunn et ganz einfach interessant fonnt, béid Zyklen zesummenzesetzen", seet d'Pianistin. "Et ass Musek, déi immens visuell ass."
Dem Claude Debussy seng ganz atmosphäresch Schreifweis huet dem Cathy Krier et ugedoen. "Den Debussy gouf schonn zu Liefzäiten als Impressionist consideréiert, wat him guer net gefall huet. Hien huet léiwer vun Atmosphäre geschwat!"
An déi Atmosphären erëmzeginn, dat ass déi grouss Erausfuerderung fir den Interpret - nieft deenen enormen techneschen Ufuerderungen.
Begeeschterung fir de Szymanowski
Déi zwee Zyklen "Images" bestinn aus jeeweils dräi kuerze Stécker mat Titele wéi "Reflets dans l'eau" oder "Poisson d'or". "Dës Titele si ganz wichteg", seet d'Cathy Krier. Si ginn eng gewëss Stëmmung un, "an dann ass et um Interpret, seng Fantasie spillen ze loossen. Duerfir ginn déi Stécker och ni langweileg!"
Déi selwecht Begeeschterung wéi fir den Debussy huet d'Cathy Krier och fir dem Karol Szymanowski seng Musek. De polnesche Komponist war ganz frankophil - dat héiert een och a senger Musek. "An ob emol mécht hien eng 180-Grad-Kéier, a mir fannen eis an enger ganz anerer musikalescher Welt erëm", erkläert d'Cathy Krier.
De Karol Szymanowski schreift säin Zyklus "Masques" 1915/1916, ronn zéng Joer nom Debussy sengen "Images". "'Masques ginn zu Onrecht siele gespillt!" Eleng dat war schonn een Argument fir d'Cathy Krier, sech mat der Partitur ausenanerzesetzen. "Et ass eng mystesch Musek, d'Spigelbild vun hirem Komponist."