"A Little Less Home" géif d'Geschicht erziele vun zwee Leit, déi sech net sécher sinn, ob si sech schonn eng Kéier getraff hunn, seet de Georges Goerens. Um Enn vum Lidd géife si sech bësse manner doheem fillen. Doduerch, datt ee sech an tëschemënschleche Bezéiunge kéint gebuergen an doheem fillen, wier d'Konzept vum Doheemsi guer net sou un en Uert gebonnen.
De Sänger stellt a sengem neie Lidd Staatsgrenzen a Fro. Heemecht ass éischter e Gefill, wéi eng Plaz, sou seng Thes. Am Wahljoer, wou zu Lëtzebuerg vill iwwer Identitéit diskutéiert gëtt, ass dat scho bal e subversive Message. Als Kënschtler wier ee verflicht, fir Stellung ze bezéien, seet de Georges Goerens.
Wann an Däitschland e Ministère fir Heemecht géif geschaaft ginn, wier et wichteg, datt ee sech iwwerleet, wat Heemecht iwwerhaapt ass, a wéi een dee Begrëff kéint nei besetzen. "Natierlech ass dat och e politesche Statement." Wann Heemecht e Gefill wier, misst een dat Gefill och entstoe loossen, zum Beispill wann ee Refugiéë géif ophuelen. "Wann ech soen: Du kanns hei ni doheem sinn, well s de hei net gebuer bass (...), dann ass d'Diskussioun och schonn eriwwer."
Op Aenhéicht mam Publikum
Obwuel Bartleby Delicate e Folk-Projet ass, hält de Georges Goerens net vill vu musikaleschen Traditiounen. Am amerikanesche Folk géifen zum Beispill ëmmer déi selwecht Motiver opdauchen. Dat wier scho bal humoristesch. "Beim Johnny Cash lant hien ëmmer iergendwann am Prisong, nodeems hien Droge geholl huet."
De Georges Goerens hätt sech dowéinst d'Fro gestallt: "Wat hues du ze soen?" Wann ee Wierder géif sangen, wier et wichteg sech ze froen, firwat ee géif Wierder sangen. Hie wéilt sech léise vu Stereotyppen an originell an authentesch Geschichten erzielen.
"Déi eent-zu-eent-Relatioun mam Public ass onbezuelbar", seet de Georges Goernes. Dowéinst wier hie sech net sécher, ob hien als Bartleby Delicate en Ensemble ronderëm sech wéilt hunn. "Déi grouss Stäerkt vum Projet ass et, de Leit op Aenhéicht ze begéinen. Als Individuum an net als Kollektiv." D'Grenz tëscht dem Artist an dem Mënsch géif op eemol komplett verschwammen. "Georges a Bartleby, heiansdo weess ech selwer net méi, wie wien ass." Ugeschwat op de Bühnepersonnage erkläert hien, de Bartleby wier dat, wat de Georges net kéint sinn, well hien ze villschichteg wier.
Den 9. Mee presentéiert de Bartleby Delicate säin éischten EP an de Rotonden.
Lauschtert dat ganzt Gespréich vum Yves Stephany mam Georges Goerens