Rockhal "Jukebox vun enger ganz breeder Clientèle"

Den Direkter vun der Rockhal weist Kritiken un der Programmatioun zeréck. Déi Jonk, déi deemools d'Hal gefrot hunn, komme lo Megadeth kucken, seet den Olivier Toth. Duerch d'Recettë vu Musicals a Ballete kéint een edukativ Projete finanzéieren.

Yves Stephany

Rockhal
Foto: Archiv

D'Rockhal ass just nach eng Tutuhal. Sou d'Kritik vun der Josée Hansen Enn Januar an der Wochenzeitung Lëtzebuerger Land. De Grond sinn eng ganz Rëtsch russesch Balleten, déi an der Rockhal affichéiert ginn. Dës Produktioune wiere reegelrecht "Machines à sous" fir privat Promoteuren a géifen duerch d'Lokatioun och Suen an d'Kees vum Etablissement Public spillen. Den Direkter Olivier Toth géif sech ëmmer méi zu engem Portier vun engem Luxus Centre Polyvalent entwéckelen, sou déi fréier Presidentin vum Verwaltungsrot vun der Rockhal.

D'Diversifizéierung vum Programm vun der Rockhal géif et erméiglechen, en anere Publikum z'erschléissen, seet den Olivier Toth. An duerch esou Aktivitéite kéint een aner Projete realiséieren. Am "pur kulturellen" an edukative Beräich hätt een d'Evenementer iwwert d'Jore kéinten opstocken, ouni méi Suen ze froen. "Iergendwou musse se hierkommen. Dat heescht, si ginn erschafft."

Al Männer oder Cutting Edge?

Och de reng musikalesche Volet vun der Affiche vun der Rockhal ass net dat, wat een als Cutting Edge géif bezeechnen. Artiste wéi Ringo Starr, Megadeth, The Offspring oder Toto haten hir bescht Zäit viru Joerzéngten. "Wann een d'Affiche kuckt, an et gesäit ee just déi doten, dann - mengen ech - muss een d'Affiche besser kucken", seet den Olivier Toth. "Do ass ganz vill Cutting Edge dran. Ech géif mir och wënschen, wann deen och méi Attentioun géif kréien, wéi d'Tutuen."

D'Iddi vun de Leit, déi sech zënter den 80er Jore fir d'Schafe vun enger Rockhal agesat hunn, war e Concertssall fir Rockmusek, a fir e jonke Publikum. Déi musikalesch Programmatioun cibléiert momentan éischter en eelere Publikum. "Alleguerten déi Jonk, déi deemools d'Hal gefrot hunn, sinn déi, déi haut Megadeth kucke kommen", seet den Olivier Toth.

D'Rockhal wier kengem seng perséinlech Jukebox. "Eng Rockhal ass eng Jukebox vun enger ganz breeder Clientèle, déi en Interesse huet a Showen." Weder hien, nach soss ee kéint sech umoossen ze soen, datt de Publikum vun dësen Evenementer kee Goût hätt.

Rocklab goes Incubator

D'Raimlechkeete vum Rocklab ginn zënter Mëtt 2017 renovéiert a restrukturéiert. D'Aarbechte wiere bal ofgeschloss. Den Olivier Toth confirméiert, datt niewent de Bureaue fir d'Mataarbechter vum Rocklab, en Incubator fir d'Museksbranche soll entstoen. Niewent de Proufsäll wéilt d'Rockal an dëse Raimlechkeeten och anere Beruffer aus dem Secteur e Pied-à-terre bidden.

Olivier Toth

Méi zum Thema

Laurent Loschetter - Olivier Toth
Atelier a Rockhal

D'Rockhal respektéiert net de géigesäitegen Accord tëschent Concerts-Organisateuren, kritiséiert den Atelier. Den Etablissement Public huet de Sting um Dag vum Atelier sengem Festival gebucht.

Vu lénks no riets: Pim Knaff, Ralph Waltmans, Andreas Wagner, Guy Arendt.
Esch 2022

D'Gemeng Käerjeng hätt eng positiv Approche géintiwwer der Participatioun un Esch 2022. Et misst elo en transparente Mapping fir all Gemeng a vun alle Projeten erstallt ginn, seet den Andreas Wagner.

Roger Hamen
Musikalesch Visittekaart

De Roger Hamen huet ganz vill mat Musek a mat der Lëtzebuerger Zeen ze dinn. Dofir weess hien iwwer déi Titelen, déi hien op seng musikalesch Lëscht gesat huet, déi eng oder aner Geschicht z'erzielen.

Toth_Rockhal.JPG
Musikalesch Visitekaart

Wann den Direkter vun der Rockhal de musikalesche Programm vun der Emissioun zesummestellt, da kann et wuel nëmme rocken! Oder dach net?

Net verpassen

  • Dëse Sonndeg um 11:00 LIVE aus der Congresshalle zu Saarbrécken

    DRP

    Eng Symphonie mat Piano - Esou gëtt dacks dem Johannes Brahms säin zweete Pianosconcerto beschriwwen. De russesche Pianist Nicolai Lugansky spillt dëst Wierk an där nächster Matinée vun der Deutschen Radio Philharmonie Saarbrücken Kaiserslautern, déi de radio 100,7 zesummen mat SR2 KulturRadio e Sonndeg, 15. Dezember 2019, vun 11.00 Auer u live aus der Congresshalle zu Saarbrécken iwwerdréit.

Dossieren

  • Google-Datenzenter

    Google wëllt op Lëtzebuerg kommen: op engem Feld zu Biisse wëllt déi amerikanesch Internetentreprise en Datenzenter bauen. Kritik gëtt et ënner anerem um méigleche Waasser- a Stroumverbrauch.

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen