LaClaireau Kloert Waasser plätschert net

LaClaireau ass eng Formatioun vu Gent, an d'Liewe geruff vun der Gabriela Arnon. D'Wierk "Fate Of The Poet" ass eng spannend Mëschung nom Motto "Musique de Chambre meets Singer/Songwriting".

Fred Medernach / ys

LaClaireauCD.jpg

Den opklappbare Cover vum Album "Fate Of The Poet" ass an douce Pastellfaarwe gehal. Dat gëtt déi musikalesch Grondstëmmung vun der Formatioun LaClaireau gutt erëm. Zousätzlech sollt ee sech eng Sekonn fir de Bandnumm huelen: La Claire Eau, dat rouegt a kloert Waasser. An da weess een, op wat ee sech bei der Equipe ronderëm d'Gabriela Arnon aléisst: op eng roueg musikalesch Rees.

Wou Folk a Pop anenee fléissen a wou den Jazz a klassesch Kompositiounen hir Spueren hannerlooss hunn. Mat akusteschen Instrumenter, wéi Gei, Gittar a Mandolinn, Piano a Bouzouki, Bassklarinett a Dobro. Eng Zort Rees zréck a vergaangen Zäiten, wou alles nach méi ent-schleunegt ofgelaf ass. Wou een net ëmmer huet missen erreechbar sinn. Wou d'Momenter fir Saache gemittlech vu bausse wierken ze loossen nach méi heefeg waren.

Kee rouege Floss

Den Album plätschert awer net wéi e laange rouege Floss viru sech hin. Dacks iwwerraschen d'Museker, briechen de Rhythmus op ongewinnte Plazen, fléie vum Mëttellalterschlass an d'Neizäit. Fir dann erëm Rou, Harmonie a symphonesch Poesie erëmzefannen. LaClaireau ass, wéi wann Dir Iech Barden an Troubadouren heem invitéiert hätt. Där vun elo, Singer-Songwriter vun der haiteger Generatioun, déi hir Geschichten erziele kommen an dobäi Traditionelles mat méi modernen Akzenter an iwwerluechtenen Arrangementer verbannen.

D’Gabriela Arnon selwer kënnt vun New York. si fillt sech awer als Parisienne de coeur. Hir Matmuseker sinn am flämeschen Deel vun der Belsch zu Gent doheem. Si faszinéieren net nëmme mat der Manéier wéi si hir Geschichten an Nouten ëmsetzen, mee och duerch hir Stëmmen . Ob Solo oder am Chouer, d'Stëmmen si wéi gemaach fir d'Kompositiounen an deene si agesat ginn. Onopdrénglech an awer omnipresent, waarm a ronn.

Dat verhëlleft "Fate Of The Poet" zu enger eenzegaarteger, entspaanter Ambiance. Ee Ganzt, wou et trotz aller Harmonie zu jiddwer Moment eppes z’entdecke gëtt. De verzauberte Noutebësch deen ee betrëtt ass mystesch, relax an nawell spannend. Dat ass net evident ëmzesetzen. Awer LaClaireau schafft dësen Defi. Wie sech mat hirem Sound ufrënne kann, deem sief och de Solo-Album vum Gabriela Arnon nogeluecht. "Pyramid Lake", dee parallel zum Bandwierk erauskomm ass ähnlech opgereegt a faszinéierend. Inner World Music nennt si hire Stil, dee live mat Projektiounen, Theater an Danz kombinéiert gëtt. Och do kënnt et op d'Balance un tëscht deene verschiddenen Ingredienten, déi an de Schmëlzdiggel geheit ginn. Och do stëmmen se.

An der Mediathéik:

Album vun der Woch / / Fred Medernach
Lauschteren

Méi zum Thema

paul_simon.jpg
Album vun der Woch

Mat 75 Joer wot de Paul Simon op "Stranger to Stranger" dezent Soundexpérimenter. Den New Yorker gräift op de confirméierte Songwriting mat vill Perkussioun zréck. Hie geet awer net deen einfache Wee.

Cyclorama
Radioen

Komponiste kloen, et géif net genuch Lëtzebuerger Musek op de Lëtzebuerger Radioe gespillt ginn. De Prozentsaz ass effektiv niddereg. Dofir sinn zum Deel awer d'Kënschtler selwer responsabel.

Programm

Net verpassen

  • The English guy is coming!

    Jim Kent.jpg

    "I'm really happy to be back on air in the Grand Duchy, which is where it all started for me and will endeavor to fill the airwaves with humorous and insightful observations on Luxembourg life combined with the best guests and music that you have come to expect from 100,7."

Dossieren

  • Mäin Europa

    Europa ass e feste Bestanddeel am Alldag vu senge Bierger. Mee mécht sech d'EU am deegleche Liewe vun den Europäer bemierkbar? Wat bréngt d'Europäesch Unioun senge Bierger? Mir weise konkret Beispiller.

  • Weltdag vun de Kannerrechter

    Den 20. November ass de Weltdag vun de Kannerrechter. De radio 100,7 presentéiert an deem Kader verschidde Reportagen an Interviews, fir iwwer d'Rechter vun de Kanner opmierksam ze maachen.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen