Klassik-CD vun der Woch Parallel Linnen

Hellgro, duerchsiichteg Sträifen, déi sech iwwer de Cover vum Disk zéien. Hannendrun: eng Foto vum Pianist Julien Libeer virun engem schwaarzen Hannergrond. Dësen Design ass net wierklech gelongen. Duerch déi Kombinatioun vum hell Groen, Duerchsiichtegen, mat der gréisstendeels schwaarzer Foto, huet een d'Gefill eng al verstëbsten CD am Grapp ze halen. Opgeholl gouf se 2018 am Concertgebouw Bruges. Eppes muss een deem Cover awer loossen: mat dësem Visuell ass den Titel vum CD "Lignes Parallèles" och optesch vertrueden. Mat dësem roude Fuedem weess den Disk op ganzer Linn ze iwwerzeegen.

Luc Boentges

CD Woch

Amplaz op engem normale Fligel ze spillen, huet sech de Solist Julien Libeer fir ee vum Pianosbauer Chris Maene entscheet. Dës ass en Instrument bei deem d'Säiten alleguerte parallel verlafen. Normalerweis kräize sech déi méi laang, déif Säite mat de méi kuerzen hellen. Dat spuert op där enger Säit Plaz, huet op där anerer Säit awer och en Impakt op de Klang. Bei de Virgänger vum moderne Piano waren d'Säiten all parallel gespaant. Dës Bauweis huet de Chris Maene iwwerholl a moderniséiert. Seng Instrumenter sinn de Versuch, eppes vun der Klangcharakteristik vun den ale Pianoe mat den technesche Méiglechkeeten an dem Klangvolume vun haut ze kombinéieren. Wéi am Booklet ze liesen ass, krut de Chris Maene 2013 den Optrag fir dëst Instrument vum Daniel Barenboim. D'Resultat ass en immens kloren a renge Klang.

Parallellen och am Orchester

Mat dësem Instrument zitt de Julien Libeer eng parallel Linn zum Orchester, deen ee sengersäits als parallellen Ensembel zu historesche Formatioune betruechte kann. Ähnlech wéi beim Piano, ass den Orchester just un der aler Zäit inspiréiert: Si zéie Réckschlëss aus der historescher Opféierungspraxis fir d'Interpretatioun, spillen awer zu gréissten Deeler op modernen Instrumenter.

E koherente Programm

"Lignes Parallèles" bezitt sech net nëmmen op d'Soloinstrument an d'Approche vun de Museker, mee och op de Programm. Op der Affiche steet nieft enger Sinfonie vum Joseph Haydn an dem leschte Pianosconcerto vum Wolfgang Amadeus Mozart dem Dinu Lipatti säi Concertino "am klassesche Stil". An dësem Wierk vun 1936 kombinéiert hie Stilelementer aus der Klassik mat enger neier, moderner Klangsprooch.

Präzis interpretéiert

Passend zum klore Klang vum Piano spillt de Julien Libeer transparent a präzis. All Nout ass däitlech erauszehéieren, während hie gläichzäiteg - virun Allem beim Mozart - immens tëschent der Melodie an der Begleedung differenzéiert. Den Orchester iwwerzeegt duerch seng Vitalitéit a staark accentuéiert Rhythmik. Eenzege Manko ass d'Balance, déi deelweis ze staark op de méi déiwe Sträicher läit.

An der Mediathéik:

Lauschteren

Méi zum Thema

Klassik CD vun der Woch
Klassik-CD vun der Woch

Den Orchestre national d'Île-de-France huet dem Darius Milhaud seng Balletsmusek fir Orchester a Pianola "La bien-aimée" ausgegruewen a fir d'éischt op CD opgeholl.

Musek am Gespréich
D'Chouerwiesen zu Lëtzebuerg

D'Chouersangen huet zu Lëtzebuerg Traditioun. Joerzéngtelaang war et kee Problem Sänger ze rekrutéieren. Mëttlerweil ass d'Situatioun eng aner. D'Veräinsliewen hëlt of an Alternative musse sech bewären.

Orchestre national de Metz
E Belsch zu Metz

De laangjärege Chefdirigent vum Orchestre national de Metz Jacques Mercier ass an d'Pensioun gaang. Nofolger gouf den David Reiland, dee sech géint 171 aner Kandidaten duerchsetze konnt.

Benjamin Schäfer
Jorma-Panula-Concours

"Der Adrenalinschub ist natürlich immens." De Perkussionist an Dirigent Benjamin Schäfer huet d'Halleffinall vum renomméierte Jorma-Panula-Concours bestridden a gëtt en Abléck a seng Erliefnesser.

Programm

Dossieren

  • Sozialwahlen 2019

    Am Mäerz si Sozialwahlen. A ronn 3.500 Betriber, an deene méi wéi 15 Leit schaffen, ginn d'Personaldelegatioune bestëmmt. An déi 60 Vertrieder an der Salariatskammer ginn nei gewielt.

  • Pierre Werner

    "Pierre Werner, e Mënsch a sengem Joerhonnert" ass eng nei Podcast-Serie, déi de radio 100,7 zesumme mam Center for Contemporary and Digital History vun der Uni.lu entwéckelt huet.

Communiquéen

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen