D'Planéite vum Gustav Holst sinn esou bekannt, an hir Wierkung ass esou grouss, datt sech eng ganz Rei Filmkomponisten dorunner inspiréiert hunn. Esou zum Beispill den John Williams, deem säin Imperiale Marsch un de Saz "Mars" erënnert.
Während sech den John Williams um Gustav Holst sengem Wierk inspiréiert huet, huet een anere Filmkomponist ganz Melodië kopéiert a gouf 2006 dowéinst souguer vun der Gustav Holst Foundation verklot. Rieds ass vum Hans Zimmer a sengem Soundtrack zum Film "Gladiator". Mee firwat passt dem Gustav Holst säi Wierk "D'Planéiten" esou gutt op d'Leinwand?
"Ech mengen et ass well et esou lieweg ass, am Sënn vun der Faarf a vum Rhythmus. Ech menge 'Mars' ass vu ville Komponisten - et kann ee scho bal soe - plagiéiert ginn. Et ass Musek mat ganz vill Energie."
Colin Matthews
Pluto - En onnéidegen Zousaz?
De Colin Matthews ass Komponist an ee vun den Direktere vun der Britten-Pears-Foundation, déi Organisatioun zu där och d'Gustav Holst Archive Project gehéiert. Doriwwer eraus gouf hien 2000 vum Kent Nagano engagéiert, fir en aachte Saz mam Titel Pluto ze komponéieren. Dëst Stéck huet den deemolege Chefdirigent vum Hallé Orchestra nach am selwechte Joer uropgefouert. Allerdéngs war net jidderee frou iwwer dësen Zousaz:
"Ech versti firwat datt verschidde Leit mengen, et wier en onnéidegen Zousaz. Mee ech hunn et genoss mech a seng Musek eranzeschaffen an ze probéieren, datt et an 'D'Planéiten' erapasst, ouni den Holst ze imitéieren."
2006 gouf de Pluto vun engem Planéit zu engem Zwergplanéit deklasséiert. Dëst stellt d'Existenzberechtegung vum Colin Matthews sengem Saz a Fro. Wéi war also dem Komponist seng Reaktioun, wéi dës Decisioun bei enger Generalversammlung vun der International Astronomical Union geholl gouf?
"Ech wousst ëmmer schonn, datt et wahrscheinlech kee wier. Souguer am Programmheft vun der éischter Opféierung hunn ech gesot, datt et just marginal e Planéit wier. Meng eege Reaktioun war mengen ech zu engem gewësse Grad Enttäuschung. Zemools elo, wou ech déi erstaunlech Fotoe vum Pluto gesinn hunn, déi e Fuerschungssatellit vun der NASA virun zwee/dräi Joer gemaach huet. Et fillt sech nach ëmmer u wéi e Planéit.
"Eng komesch Mixtur"
Dem Colin Matthews säi Saz gëtt zanter der Deklasséierung vum Planéit nëmme méi seele gespillt. D'Faszinatioun fir dem Holst seng siwe Sätz ass awer ongebrach. Musikalesch gesi wier d'Wierk zu enger Zäit entstanen, wou hie grad säin eegene Stil fonnt hätt - eng Mixtur vu lauter verschiddenen Aflëss. Inspiréiert hätt sech den Holst un de Komponisten Arnold Schönberg, Claude Debussy an Igor Strawinsky. Do dernieft fënnt ee souwuel englesch Volleksmusek wéi och Spuren aus der Sanskrit-Literatur a senge Wierker erëm, seet de Colin Matthews.
"Et ass also eng komesch Mixtur. 'D'Planéiten' sinn iergendwéi genee zum richtegen Zäitpunkt entstanen, wou hien alles matenee verbanne konnt, esou datt et och funktionéiert."
E Succès mat enger negativer Säit
"D'Planéiten" sinn dat bekanntst Wierk vum Gustav Holst. De Succès war esou grouss, datt seng Heemechtsstad Cheltenham am Joer 1927 e ganze Festival fir hien organiséiert huet. Natierlech dreemt all Komponist dovunner fir op d'mannst eemol am Liewen e Wierk ze schreiwen, dat esou en Erfolleg huet. Fir de Gustav Holst hat de Succès vu senge Planéiten awer och en negativen Aspekt, deen hien zum Deel och belaascht huet.
"Et stellt bal all seng aner Wierker an de Schied. An ech mengen hie selwer huet fonnt, datt et schwéier war, domadder ëmzegoen. [...] Hien ass net ganz en Ee-Wierk-Komponist, mee de Rescht vu senge Wierker ass bei Wäitem net esou bekannt, wéi et sollt."
Mee wat wier gewiescht, wann de Gustav Holst ni seng Planéite komponéiert hätt? Vläicht wier hien deem engen oder aneren an England haut nach bekannt. Am Rescht vun der Welt, wou de Gustav Holst dacks just mat senge Planéiten an de Programmhefter vun de grousse Concertshaiser opdaucht, wier hien héchstwahrscheinlech vergiess ginn.