Cate Le Bon - Reward Um Peak vun der Verzweiwlung an trotzdem

Op hirem entretemps fënnefte Longplayer "Reward" glänzt d'Cate Le Bon erëm mat klengen Diamante vu Lidder. Och wann déi dacks enorm verspillte Musek ufanks nach oflenke kann, esou dréngt vu Song zu Song eng déif Verzweiwlung ëmmer méi staark duerch, fënnt d'Vicky Stoll.

Vicky Stoll / cbi

Cate Le Bon
D'Cate Le Bon live zu Kopenhagen an Dänemark, den 3. Juni 2019. Foto: picture alliance / Photoshot

Un der ofgelutschter Behaaptung, datt déi bescht Konscht aus der Verzweiwlung eraus entsteet, soll jo eppes dru sinn. Villäicht läit dat einfach dorun, datt een a sengem Leed maximal authentesch an éierlech ass, well ee keng Energie méi fir d'Verstellung huet. Dës Iddi zeechent och déi nei Plack "Reward" vun der Cate Le Bon aus.

Dat lescht Stéck um Album, "Meet The Man", markéiert an dëser Equatioun de Peak vun der Verzweiwlung an zerleet sech um Ënn vum selwen.

Nom 2016 verëffentlechten Album "Crab Day" huet d'Cate Le Bon sech eng Auszäit geholl. Déi Walisesch Sängerin a Komponistin ass aus der Metropol Los Angeles an de Lake District an England geplënnert. Do ass si ee Joer laang all moies mat anere Fraen an de Séi schwamme gaangen, huet Handwierkerworkshops gemaach a geléiert, wéi ee Still baut.

An där Zäit huet si sech och bewosst isoléiert a probéiert, net duerchzedréinen.

D'Cate Le Bon gehéiert zu deene Kënschtlerinnen, déi hiren eegene Sound sou raffinéiert hunn, datt ee si um éischten Toun erëmerkennt. Hir Stëmm an dee liicht manieréierte waliseschen Accent droe natierlech staark zu dësem Effekt bäi, mee et ass och déi verspillte Lëftegkeet, mat där si hir Lidder arrangéiert.

Schwaarzen Humor a Witzer op eege Käschte gehéiere geneesou zum Arsenal vun enger Cate Le Bon. Op dem Track "Sad Nudes" sengt si dovun, wéi déif ee sech selwer erniddregen kann, wann ee sech eleng a verlooss fillt.

Och op "Reward" vermëscht d'Cate Le Bon nees avantgardistesch ugemaachte Poplidder, déi mol liicht punkeg rumpelen oder verdreemt an hypnotesch dréinen. Ëmmer awer kléngt si liicht exzentresch, liicht geckeg.

An dat läit mol un engem klenge Jauchzen hei, un engem schife Saxofon do oder un engem verluerene Beat. Eenzeg den Track "Magnificent Gestures" erënnert a senger dadaistescher Nervositéit un DRINKS, hire Nieweprojet mam Tim Presley vun der amerikanescher Indieband "White Fence".

"Holding the door for my own tragedy" - genee dat mécht d'Waliserin hei. Et kéint ee menge, si hätt sech zeréckgezunn, fir der eegener Tragedie d'Dir opzehalen. Mëssverstane Léift deet si als - Zitat - "konkav Empathie" oder als faul a sténkeg Blummen of.

Trotz der heiterer musikalescher Grondstëmmung ass "Reward" een déiftrauregen Album, deen een do pickt, wou een et am beschte spiert. De "Reward" - d'Belounung also - vun dëser karthagescher Plack ass mat Sécherheet och d'Gewëssheet, datt d'Cate Le Bon hir Verzweiwlung zu eppes Schéinem subliméiert huet.


An der Mediathéik:

Album vun der Woch / / Vicky Stoll
Lauschteren

Méi zum Thema

Mac DeMarco
Album vun der Woch

De Kanadier DeMarco huet en neien, relaxen Album erausbruecht. "Here Comes The Cowboy" heescht den Disk an ass eisen Album vun der Woch. Den Tom Dockal stellt vir.

O Terno
O Terno - <atrás/além>

Fir eisen Album vun der Woch geet et déi Kéier a Brasilien. An zwar bei den Trio O Terno. Hiren neien Disk "<atrás​/​além>" ass einfach nëmme fir ëmzefalen, mengt op alle Fall den Jamie Reinert.

Free Design
The Free Design – Heaven/Earth (1969)

Himmlesch Vocal Harmonien a grandios Arrangementer vun der Derrick Famill. Den drëtten Album vun der psychedelescher Sunshine Pop Grupp verféiert mat villen onschëllege Momenter.

Aldous Harding
Aldous Harding - Designer

D'Aldous Harding danzt tëschent dem Gefill, alles ze kënnen, an der Impressioun, vum Universum erdréckt ze ginn. Den neien Disk "Designer" vun der Neuseelännerin ass eisen Album vun der Woch.

Programm

  • Notturno

  • On air

    Virum Dag

  • Moies-Magazin

  • Iwwer Mëtteg

  • Resonanzen

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen